ޕެރިސް (އޮކްޓޫބަރު 23) - ލިއޮނަލް މެސީ ޕީއެސްޖީން ފެންނާނެ ކަމަަށް ދުވަހަކު ވެސް އުއްމީދު ނުކުރާ ކަމަށް މަޝްހޫރު ފުޓްބޯޅަ ލެޖެންޑް ރޮނާލްޑީނިއޯ ބުނެފި އެވެ.
ބާސެލޯނާއާ އެކު މެސީ ހަދާފައި އޮތް ކޮންޓްރެކްޓް މިދިޔަ ޖޫން މަހުގެ ނިޔަލަށް ހަމަވިއިރު، އޭރު ވެސް އެ ކްލަބުން ޔަގީންކަން ދެމުން އައީ މެސީ އާ އެއްބަސްވުމެއްގައި ސޮއިކުރާނެ ކަމަށެެވެ. މެސީ ވެސް ނިންމައިގެން ހުރީ އެ ގޮތަށެވެ. އެކަމަކު، މަންޒަރު ބަދަލުވީ އެންމެ ފަހު ވަގުތު އެވެ.
މެސީ ލައްވައި އާ ކޮންޓްރެކްޓެއްގައި ސޮއިކުރަން ބާސެލޯނާ އިން ބެލިއިރު، އެންމެ ބޮޑު މައްސަލަ އަކަށް ދިމާވީ ބާސެލޯނާގެ ހުރިހާ ކުުޅުންތެރިިންގެ ޖުމްލަ މުސާރަ އިންތިހާ އަށް ބޮޑުވެފައިވުމެވެ. ލަލީގާގެ މުސާރަ އޮނިގަނޑަށް ފައްތައިގެން މެސީ މަޑުކުރެވޭނެ އެއްވެސް ގޮތެއް ނެތިގެން ބާސެލޯނާ އަށް ޖެހުނީ އޭނާ ހިލޭ ދޫކޮށްލާށެވެ. މެސީ ޕީއެސްޖީ އަށް ސޮއިކުރީ ތިން އަހަރުގެ ކޮންޓްރެކްޓެއްގަ އެވެ.
ލައިޕްޒިގާއި ޕީއެސްޖީގެ މެޗު ފެށުމުގެ ކުރިން: ރޮނާލްޑީނިއޯ (ކ) އާއި މެސީ ދަނޑުމަތީގައި.
ޗެމްޕިއަންސް ލީގުގައި މި ހަފްތާގައި ޕީއެސްޖީން ފަހަތުން އަރައި ޖަރުމަނުގެ އާރްބީ ލައިޕްޒިގު ބަލިކުރި މެޗުގައި މެސީ ވަނީ ދެ ގޯލު ޖަހައިފަ އެވެ. އެ މެޗު ބަލަން ޕީއެސްޖީގެ ހާއްސަ ދައުވަތަކަށް ރޮނާލްޑީނިއޯ ވެސް ދިޔަ އެވެ. މެޗު ފެށުމުގެ ކުރިން މެސީ އާއި ރޮނާލްޑީނިއޯ ވަނީ ބައްދަލުކޮށްފަ އެވެ. ކުރިން ޕީއެސްޖީ އަށް ކުޅުނު ރޮނާލްޑީނިއޯ އަކީ މެސީ ބާސެލޯނާ އަށް ސީނިއާ ލެވަލްްގައި 2004 ވަނަ އަހަރު ކުޅެން ފެށިއިރު، އެ ޓީމުގައި މެސީ އަށް އެންމެ އެހީވެދިން އެއް ކުޅުންތެރިޔާ އެވެ.
"އަހަަރެން ޔޫރަޕްގައި އެންމެ ފުރަތަމަ ކުޅުނީ ޕީއެސްޖީ އަށް. އެ ޓީމުގެ ޖޯޒީގައި މެސީ ފެނުމުން އުފާވޭ. އެކަމަކު، ހަގީގަތަކީ މެސީ ޕީއެސްޖީން ފެނުމުން އަހަރެން ވަރަށް ހައިރާންވޭ،" ބްރެޒިލްގެ ނޫހަކަށް ދިން އިންޓަވިއުއެއްގައި ރޮނާލްޑީނިއޯ ބުންޏެވެ.
ޕެޕް ގާޑިއޯލާގެ ކޯޗަކަށް އައިތާ މާ ގިނަ ދުވަހެއް ނުވެ ރޮނާލްޑީނިއޯ ބާސެލޯނާ ދޫކޮށްލިއިރު، އޭނާ ބޭނުންކުރަމުން އައި 10 ނަމްބަރު ޖޯޒީ ދިނީ މެސީ އަށެވެ. ރޮނާލްޑީނިއޯ ބުނީ މެސީ ބާސެލޯނާގައި ހާސިލްކުރި ކަންކަމަށް ބަލާއިރު، އެއީ އެއްވެސް ކުޅުންތެރިއަކަށް ހަމަކުރެވޭނެ ކަންކަމެއް ނޫން ކަމަށެވެ.
"އަހަރެން ހީކުރީ މެސީ ކެރިއަރު ނިންމާލާނީ ބާސެލޯނާގައި ކަމަށް. އޭނާ ޕީއެސްޖީން ފެނުމަކީ އަހަންނަށް ސަޕްރައިޒެއް. ހަަމަ ލޮލަށް ފެންނައިރު ވެސް ގަބޫލުކުރަން އުނދަގޫ. އަހަރެންގެ ހިތުގައި ޕީއެސްޖީ އަށް އޮތް ލޯތްބަށް ބަދަލެއް ނާންނާނެ. މެސީ އެ ޓީމުން ފެނުމުން ވަރަށް ބޮޑު އުފަލެއް ލިބިއްޖެ،" ރޮނާލްޑީނިއޯ ބުންޏެވެ.
ބްރެޒިލްގެ ގްރެމިއޯ އިން 1998 ވަނަ އަހަރު ކެރިއަރު ފެށި ރޮނާލްޑީނިއޯ ޕީއެސްޖީއާ ގުޅުނީ 2001 ވަނަ އަހަރު ފަސް މިލިއަން ޔޫރޯ އަށެވެ. އެ ޓީމަށް ދެ އަހަރު ކުޅެދިން ރޮނާލްޑީނިއޯ 2003 ވަނަ އަހަރު ބާސެލޯނާ އަށް ބަދަލުވީ 30 މިލިއަން ޔޫރޯ އަށެވެ.
މެންޗެސްޓާ ޔުނައިޓެޑް ފަހަތަށް ޖައްސާލާފައި ބާސެލޯނާ އިން ރޮނާލްޑީނިއޯގެ ސޮއި ހޯދިއިރު، އޭނާ ވަނީ އެ ޓީމަށް ފަސް އަހަރު ކުޅެދީފަ އެވެ. ރޮނާލްޑީނިއޯ ބާސެލޯނާ ދޫކޮށް 2008 ވަނަ އަހަރު ބަދަލުވީ އިޓަލީގެ އޭސީ މިލާނަށެވެ. އެއީ ޔޫރަޕްގައި އޭނާ ކުޅުނު އެންމެ ފަހު ކްލަބެވެ.
