ގުދުސް (އޮކްޓޯބަރު 22) - ފަލަސްތީނުގައި އިސްކޮށް ހަރަކާތްތެރިވާ އަމިއްލަ ހަ ޖަމާއަތެއް "ޓެރަރިސްޓު ޖަމާއަތްތަކުގެ" ގޮތުގައި އިޒްރޭލުން ކަނޑައެޅުމުން ފަލަސްތީނު ސަރުކާރާއި، ބައިނަލްއަގްވާމީ އިންސާނީ ހައްގުތަކަށް މަސައްކަތް ކުރާ ގްރޫޕުތަކުން ނުރުހުން ފާޅުކޮށްފި އެވެ.
ފަލަސްތީނު ސަރުކާރުން ތުހުމަތު ކުރީ އެ ހަ ޖަމިއްޔާ އިން ސިއްރުން ޕޮޕިއުލާ ފްރަންޓް ފޯ ދަ ލިބެރޭޝަން އޮފް ޕަލެސްތީން (ޕީއެފްއެލްޕީ) އާއެކު މަސައްކަތް ކުރާ ކަމަށެވެ. ޕީއެފްއެލްޕީ އަކީ ޓެރަރިސްޓު ގްރޫޕެއް ކަމަށް ހުޅަނގުގެ ގިނަ ގައުމުތަކުން ދެކެ އެވެ.
އިޒްރޭލުން މަނާކުރި ގްރޫޕުތަކަކީ ޔޫނިއަން އޮފް ޕަލެސްތީނިއަން ވިމެންސް ކޮމިޓީޒް (ޔޫޕީޑަބްލިއުސީ)، އައްޑަމީޜް، ބިސާން ސެންޓާ ފޯ ރިސާޗް އެންޑް ޑެވެލޮޕްމަންޓް، އަލް ހައްގު، ޑިފެންސް ފޯ ޗިލްޑްރެން އިންޓަނޭޝަނަލް - ޕަލެސްތީން (ޑީސީއައި-ޕީ) އަދި ޔޫނިއަން އޮފް އެގްރިކަލްޗަރަލް ވޯކް ކޮމިޓީޒް (ޔޫއޭޑަބްލިއުސީ) އެވެ.
އެ ޖަމިއްޔާތައް ސިވިލް ސޮސައިޓީ ޖަމިއްޔާތަކުގެ ގޮތުގައި ހަރަކާތްތެރިވި ނަމަވެސް "ހަގީގަތުގައި ކޮންޓްރޯލް ކުރަނީ ޕީއެފްއެލްޕީގެ އިސް ލީޑަރުން" ކަމަށް އިޒްރޭލުން ތުހުމަތު ކުރި އެވެ. އަދި އެ ޖަމިއްޔާތަކުގެ މަސައްކަތުގައި ޓެރަރިސްޓު ހަރަކާތްތަކުގައި އުޅެފައި ތިބި މީހުން ހިމެނޭ ކަމަށް ބުންޏެވެ.
ޑިފެންސް މިނިސްޓަރު ބެނީ ގާންޓްޒް ވަނީ އެހެން ގައުމުތަކުން ވެސް އެ ޖަމިއްޔާތަކާ ގުޅިގެން އެއްވެސް ހަރަކާތެއް ނުހިންގުމަށް ގޮވާލައްވާފަ އެވެ.
އިޒްރޭލުގެ ނިންމުމާ މެދު ނުރުހުން ފާޅުކުރަމުން ފަލަސްތީނުގެ ފޮރިން މިނިސްޓްރީން ބުނީ ފަލަސްތީނުގެ ސިވިލް ސޮސައިޓީ އާއި އިންސާނީ ހައްގުތަކުގެ ދިފާއުގައި އުޅޭ މީހުންނަށް ދެމުންދާ ހަމަލާތައް ކުށްވެރިކުރާ ކަމަށެވެ.
އެމްނެސްޓީ އިންޓަނޭޝަނަލް އާއި ހިޔުމަން ރައިޓްސް ވޮޗް އިން ވެސް ބުނީ އެއީ "އިންސާފުވެރި ކަމެއް ނެތް ނިންމުމެއް" ކަމަށާއި އިޒްރޭލް ސަރުކާރުން އެ ހަމަލާދެމުން ދަނީ ބައިނަލްއަގްވާމީ އިންސާނީ ހައްގުތަކުގެ ހަރަކާތަށް ކަމަށެވެ.
