ވޮޝިންޓަން، އެމެރިކާ (އޮކްޓޯބަރު 22) - ކޮވިޑް ބަލިމަޑުކަމުގެ އަސަރުން އިގްތިސާދު އަރައިގަންނަން ފެށުމާއެކު އެމެރިކާގެ ބަޖެޓު ޑެފިސިޓް ހަނިވެ، 360 ބިލިއަން ޑޮލަރާ އެކު ޖުމްލަ 2.8 ޓްރިލިއަން ޑޮލަރަށް އަރައިފި އެވެ.
ސެޕްޓެމްބަރު 30 ވަނަ ދުވަހު ނިމުނު މާލީ އަހަރާ ހަމައަށް އެއްކުރި ތަފާސްހިސާބަށް ބަލާއިރު ކުރިން އަންދާޒާ ކުރި ވަރަށް ވުރެ އިގްތިސާދުގެ ހާލަތު ރަނގަޅު ކަމަށް އެމެރިކާ ސަރުކާރުން ހުކުރު ދުވަހު ބުންޏެވެ. އެގޮތުން ޓެކްސް އާމްދަނީ ވަނީ 600 ބިލިއަން ޑޮލަރަށް ވުރެ އިތުރުވެފަ އެވެ.
"މިއަދުގެ ބަޖެޓު ބަޔާނަކީ އެމެރިކާގެ އިގްތިސާދު އަލުން ހިނގައިގަނެފައިވާކަމުގެ އިތުރު ހެއްކެއް،" ޓްރެޝަރީ ސެކެޓްރީ ޖެނެޓް ޔެލެން ވިދާޅުވި އެވެ.
ސަރުކާރުގެ ހަރަދުތައް 6.8 ޓްރިލިއަން ޑޮލަރަށް އަރާފައި ވާއިރު، ކޮވިޑާ ގުޅިގެން 2020 ވަނަ އަހަރު އިއުލާނު ކުރި ސްޓިމިއުލަސް ޕެކޭޖަށް ވެސް ވަނީ ހަރަދުތަކެއް ކޮށްފަ އެވެ.
ޔެލެން ވިދާޅުވީ "އެހެން މުއްސަނދި ގައުމުތަކާ އަޅާ ބަލާއިރު އެމެރިކާ އިގްތިސާދުގެ ކުރިއެރުން ރަނގަޅު ނަމަވެސް އަދިވެސް ވަރަށް ބަލިކަށި" ކަމަށެވެ.
އެކަމަނާ ވިދާޅުވީ ރައީސް ޖޯ ބައިޑެން އިއުލާނު ކުރައްވާފައިވާ އިތުރު އިޖުތިމާއީ އަދި ތަރައްގީގެ ހަރަދުތައް ފާސްކޮށްފި ނަމަ "އިގްތިސާފު އިތުރަށް ފުޅާވެ، މަސައްކަތްތެރިންނާއި އާއިލާތަކަށް އެހީއަކަށްވެ، ގައުމުގެ ދިގު ރާސްތާގެ މާލީ ހާލަތު ރަނގަޅު ވާނެ" ކަމަށެވެ.
ބަޖެޓު ރިޕޯޓުގައިވާ ގޮތުން ފެޑެރަލް ބޮރޯވިން ވަނީ ފާއިތުވި އަހަރުގެ ތެރޭގައި 1.3 ޓްރިލިއަން ޑޮލަރުން އިތުރުވެ، 22.3 ޓްރިލިއަން ޑޮލަރަށް އަރާފަ އެވެ.
