ނިއުކާސަލް (އޮކްޓޫބަރު 22) - ނިއުކާސަލް ޔުނައިޓެޑްގެ ކޯޗުކަމުން ސްޓީވް ބްރޫސް ވަކިކުރިއިރު، އޭނައާ މެދު ކަންތައް ކުރީ ވަރަށް ބޭއިންސާފުން އިންސާނީ ކަރާމާތަށް ވެސް އިހުތިރާމް ކުޑަކޮށް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
ނިއުކާސަލް އިން ވަނީ ބްރޫސް، 60، މަގާމުން ދުރުކޮށްފައިވާކަން މީގެ އެއް ދުވަސްކުރިން ރަސްމީކޮށް އިއުލާންކޮށްފަ އެވެ.
ސައުދީ އަރަބިއްޔާ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ދާދި ފަހުން ނިއުކާސަލް ގަތުމާ އެކު، ބްރޫސް އެ މަގާމުން ވަކިކުރާނެ ކަމަށް ކުރިން ވެސް އޮތީ ބެެލެވިފަ އެވެ.
ނިއުކާސަލް ސަޕޯޓަރުންގެ ބަޔަކު ބްރޫސް ވަކިކުރުމުގެ ކުރިން ސޯޝަލް މީޑިއާގައި އެކި ގޮތްގޮތަށް ވާހަކަ ދެއްކިއިރު، ގިނަ ސަޕޯޓަރުން ވަނީ ބްރޫސްާ އޭނާގެ އާއިލާއާ ދިމާކޮށްލައިފަ އެވެ.
ސަޕޯޓަރުންގެ އެ ވާހަކަތަކަށް އިޝާރާތްކޮށް ބްރޫސް އިނގިރޭސި ނޫސް ޓެލެގްރާފަށް ދިން އިންޓަވިއުއެއްގައި ބުނީ އޭނާ އަށް ނިސްބަތްކޮށް ސޯޝަލް މީޑިއާގައި ދެކެވެމުން އަންނަ ވާހަކަތައް ފެންނަ ހިސާބުގައި އޭނާގެ މައިންބަފައިން ނެތުމަކީ ހިތްހަމަޖެހުމެއް ކަމަށް ބުނެފަ އެވެ.
"އޭނަ (ބްރޫސް)އާ މެދު އެ ކަންތައް ކުރީ ވަރަށް ބޭއިންސާފުން. އެއީ ކޯޗިން އަށް ވަންނަން ވިސްނައިގެން ތިބި މީހުންނަށް ދެވުނު ނުރަނގަޅު މެސެޖެއް. ފުޓްބޯޅަ އަށް ދެރައެއް މި ލިބެނީ،" އާޓެޓާ ބުންޏެވެ.
"ކޮންމެ މީހެއްގެ ވެސް ވިސްނުމެއް އޮންނާނެ. އެކަަމަކު، ކޯޗަކަށް ހުންނަ މީހެއްގެ އިއްޒަތާއި ކަރާމާތަށް ހުތުރުވާ ވަރަށް ބަސްބުނުން އެއީ ހިޔާލުފާޅުކުރުމެއް ނޫން. ބޭނުމެއް ނުހިފޭ ފަލަ މީހެކޭ ބުނެ ދިމާކޮށްލުމަކީ ފުޓްބޯޅައިގެ އަހުލާގުގެ އިތުރުން އިންސާނުންނަށް މުހާތަބު ވެސް ކުރަން ޖެހޭ ގޮތެއް ނޫން،"
އާޓެޓާ ބުނީ ބްރޫސް އަކީ ފުޓްބޯޅައިގެ ތެރޭގައި 40 ވަރަކަށް އަހަރު ވަންދެން އުޅެފައިވާ މީހެއް ކަމަށާއި އެ ވަރުގެ ފުޓްބޯޅައިގެ ހިދުމަތްތެރިއަކަށް އެ ފަދަ ގޮތަކަށް މުހާތަބު ކުރުމަކީ ފުޓްބޯޅަ އަށް ކުރެވޭ މަލާމާތެއް ކަމަށެެވެ. ފުޓްބޯޅައިގެ ފެއާޕްލޭ އަކީ މި ފަދަ ކަންކަން ވެސް ހުއްޓުވުން ކަމަށް އާޓެޓާ ވަނީ ބުނެފަ އެވެ.
