މުޅި މާލެ ވައިފައި ކުރުމުގެ މަޝްރޫއުއަށް އުރީދޫ އާއި ދިރާގުން ޝައުގުވެރިކަން ފާޅުކޮށްފައިވާ ކަމަށާއި، މިއަހަރު ތެރޭ އެ މަޝްރޫއުގެ މަސައްކަތް ފެށިގެން ދާނެ ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
"އަދަދު" އާ ވާހަކަދައްކަވަމުން މުއިއްޒު އިއްޔެ ވިދާޅުވީ މާލެ ވައިފައި ކުރުމުގެ މަޝްރޫއު މިއަހަރު ނިމުމުގެ ކުރިން އިފްތިތާހު ކުރާނެ ކަމަށާއި، ދިރާގާއި އުރީދޫއިން ހުށަހެޅި ޕްރޮޕޯސަލްތައް އެ މަޝްރޫއުގެ މަސައްކަތްތައް ކުރިއަށް ގެންދާ ސިޓީ ކައުންސިލްގެ ކޮމިޓީގައި ދިރާސާކުރަމުން ގެންދާ ކަމަށެވެ.
މޭޔަރު ވިދާޅުވީ ހިލޭ ވައިފައި ބޭނުންކުރެވޭނީ ވަކި ވަގުތެއްގައި ކަމަށެވެ. އޭގެ ފަހުން ބޭނުންކުރާ ނަމަ ޖެހޭނީ ކޫޕަނެއް ގަންނާށެވެ. އެއީ ދުނިޔޭގެ ބޮޑެތި ގައުމުތަކުގައި ގެންގުޅޭ އުސޫލުކަމަށް މުއިއްޒު ވިދާޅުވި އެވެ.
މުއިއްޒު ވިދާޅުވީ މި ޕްރޮޖެކްޓާ އެކު ދަރިވަރުންނާއި އާއްމުންނަށް ވައިފައި ބޭނުންކޮށްގެން މަސައްކަތްކުރެވޭނެ ގޮތަށް މައިޒާންތައް ހަދާނެ ކަމަށެވެ.
