ސޯލް، ދެކުނު ކޮރެއާ (އޮކްޓޯބަރު 21) - އުތުރު ކޮރެއާ އިން މިދިޔަ އަންގާރަ ދުވަހު ޓެސްޓު ކުރި މިސައިލާ ގުޅިގެން ފާޑުކިޔުން އަމާޒުވުމުން، އެމެރިކާ އަކީ ނަހަމަ އުސޫލު ގެންގުޅޭ ގައުމެއް ކަމަށް އުތުރު ކޮރެއާ އިން ބުނެފި އެވެ.
އުތުރު ކޮރެއާ އިން ޓެސްޓުކޮށްފައި ވަނީ މުޅިން އާ ވައްތަރެއްގެ ސަބްމެރީނުން ލޯންޗު ކުރާ ބެލިސްޓިކް މިސައިލެކެވެ. ފަހަކަށް އައިސް ގިނަ މިސައިލްތަކެއް އެ ގައުމުން ދަނީ ޓެސްޓު ކުރަމުންނެވެ.
އުތުރު ކޮރެއާގެ ފޮރުން މިނިސްޓްރީގެ ތަރުޖަމާނު ވިދާޅުވީ ޓެސްޓުތައް ކުރަމުން ދަނީ އެމެރިކާ އަށް ބިރު ދައްކަން ނޫން ކަމަށާއި އެއީ "ހަމައެކަނި އުތުރު ކޮރެއާގެ ދިފާއީ ގާބިލްކަން އިތުރު ކުރުމަށް" ކުރާ މަސައްކަތްތަކެއް ކަމަށެވެ.
"އެހެންވީމަ މިސައިލް ޓެސްޓު ކުރާތީ އެމެރިކާ އިން ކަންބޮޑުވެ ފިކުރު ކުރަން ޖެހޭ ސަބަބެއް ނެތް،" ކޭސީއެންއޭ ނިއުސް އެޖެންސީން އާއްމުކުރި ބަޔާނެއްގައި ތަރުޖަމާނާ ހަވާލަދީ ބުނެފައި ވެ އެވެ.
އޭގެ އިތުރުން އެމެރިކާ އަތުގައި މިހާރު ވެސް އޮތް ނުވަތަ އެމެރިކާ އިން އުފައްދަން މަސައްކަތް ކުރަމުންދާ ހަތިޔާރެއް އުތުރު ކޮރެއާ އިން ޓެސްޓު ކުރުމުން އެކަމާ ފާޑުކިޔުމަކީ އެމެރިކާ އިން ގެންގުޅޭ ނަހަމަ އުސޫލު ހާމަވާ ކަމެއްގެ ގޮތުގައި ސިފަކުރި އެވެ.
އުތުރު ކޮރެއާގެ ލީޑަރު ކިމް ޖޮންގް އުން ވަނީ ތިން ފަހަރެއްގެ މަތިން އެމެރިކާގެ ކުރީގެ ރައީސް ޑޮނަލްޑް ޓްރަމްޕްއާ ބައްދަލުކުރައްވާފަ އެވެ. ނަމަވެސް އުތުރު ކޮރެއާގެ ނިޔުކްލިއާ ޕްރޮގްރާމް ހުއްޓުމަކަށް ގެނެވޭނެ އެއްބަސްވުމަކަށް އާދެވިފައެއް ނުވެ އެވެ.
އެމެރިކާގެ މިހާރު ރައީސް ޖޯ ބައިޑެން ވިދާޅުވެފައި ވަނީ ޑިޕްލޮމެސީ އަށް އިސްކަން ދެއްވާނެ ކަމަށެވެ. ނަމަވެސް ބައިޑެންގެ ސަރުކާރުގައި އުތުރު ކޮރެއާގެ މައްސަލައިގައި މިހާތަނަށް މާ ބޮޑު ކުރިއެރުންތަކެއް ހޯދިފައެއް ނުވެ އެވެ.
މި މަހުގެ ކުރީކޮޅު އުތުރު ކޮރެއާ އިން ތުހުމަތު ކުރި ގޮތުގައި ދެ ކޮރެއާގެ ދެމެދުގައި ހަމަނުޖެހުން ހިނގަނީ އެމެރިކާއާ ހެދި އެވެ. އުތުރު އަދި ދެކުނު ކޮރެއާގެ ހަނގުރާމަ ނިމުނުކަން މިހާތަނަށް ވެސް ރަސްމީކޮށް އިއުލާނުކޮށްފައެއް ނުވެ އެވެ. އެހެންކަމުން ދެ ގައުމުގެ ހަތިޔާރުގެ ވާދަވެރިކަން ވަރަށް ބޮޑަށް އޮވެ އެވެ.
ފަހަކަށް އައިސް އުތުރު ކޮރެއާ އިން ހަތިޔާރު ޓެސްޓު ކުރާ މިންވަރު ވަނީ އިތުރުކޮށްފަ އެވެ. އެގޮތުން އަޑަށް ވުރެ ބާރަށް ދަތުރު ކުރާ ހައިޕަސޮނިކް މިސައިލާއި ދިގު ރާސްތާގެ ކްރޫޒް މިސައިލާއި އެންޓި އެއާ-ކްރާފްޓް ހަތިޔާރު ވެސް ޓެސްޓުކޮށްފައި ވެ އެވެ.
ބައެއް ހަތިޔާރުތައް ޓެސްޓު ކުރަމުން ދަނީ އެކަމާ ދެކޮޅަށް ބައިނަލްއަގްވާމީ ދަތިކުރުމުގެ ފިޔަވަޅު އަޅާފައި ވަނިކޮށެވެ. އދ. އިން އުތުރު ކޮރެއާ އަށް މަނާކޮށްފައި ވަނީ ބެލިސްޓިކް މިސައިލާއި ނިޔުކްލިއާ ހަތިޔާރު ޓެސްޓު ކުރުމެވެ.
