އއ. ރަސްދޫ ރައްޔިތުންގެ އެންމެ ބޮޑު އެއް ކަންބޮޑުވުންކަމުގައިވާ އެރަށުގައި ބިން ނެތުމުގެ ސަބަބުން އެރަށަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ގެނައުމަށް ރޭވުންތަކެއް ރާއްވަވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްްމަދު ސޯލިހު ވިދާޅުވެއްޖެ އެވެ.
ރައީސް މިހެން ވިދާޅުވީ، މިހާރު އއ. އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން ރަސްދުއަށް ވަޑައިގެން އެ ރަށުގެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުންނާ އެކު މިއަދު ބޭއްވި ބައްދަލުވުމުގެ ތެރެއިންނެވެ.
އެ ބައްދަލުވުމުގައި ރަސްދޫ ކައުންސިލުގެ ފަރާތުން ވަނީ ރަށަށް ކުރިމަތިވެފައިވާ ބިމުގެ ދަތިކަމާ އަދި އެ ދަތިކަމުގެ ސަބަބުން ދެން ކުރިމަތިވާ ބޯހިޔާވަހިކަމުގެ ދަތިކަން ހައްލުކުރުމަށް ރައީސަށް ދަންނަވައިފަ އެވެ.
ޖަވާބުގައި ރައީސް ވަނީ އަންނަ އަހަރުގެ ބަޖެޓުގައި ސަރުކާރުން ހިމަނާފައިވާ ބޯހިޔާވަހިކަމުގެ މަޝްރޫއިން އެ މައްސަލައަށް ވަގުތީ ހައްލެއް ލިބިގެންދާނެކަމަށް ވިދާޅުވެފަ އެވެ. އަދި ދާއިމީ ހައްލެއް ހޯދުމަށްޓަކައި ދިގު މުއްދަތުގެ ޕްލޭނެއް ރާއްވަވާނެ ކަމަށް ވެސް ރައީސް ވަނީ އެ ބައްދަލުވުމުގައި ވިދާޅުވެފަ އެވެ.
އެ ބައްދަލުވުމުގައި ރައީސް ވަނީ ކުރިޔަށް އޮތް ދެ އަހަރު ތެރޭ ސަރުކާރުން ރަސްދޫގައި މިހާރު ފަށާފައިވާ ހުރިހާ މަޝްރޫއުތަކެއް ނިމޭނެކަމުގެ ޔަގީންކަން އަނެއްކާ ވެސް ރަސްދޫ ކައުންސިލަށް އަރުވައިފަ އެވެ.
ރަސްދޫގައި ސަރުކާރުގެ ގިނަ މަޝްރޫތަކެއް މިހާރު ވެސް ކުރިޔަށް އެބަ ދެ އެވެ. އޭގެ ތެރޭގައި އެރަށުގެ އާރުއޯ ޕްލާންޓާއި ފެނުގެ ސްޓޮރޭޖް ޓޭންކެއް ގާއިމުކުރަން ހިންގާ މަޝްރޫއުގެ އިތުރުން، ފުޓުބޯޅަ ދަނޑު ތަރައްގީކުރުމުގެ މަޝްރޫއާއި އާ އިންޖީނުގޭގެ މަޝްރޫއު ހިމެނެ އެވެ.
އަމަލީ މަސައްކަތް ނުފެށި ހުރި ނަމަވެސް ރަސްދޫގައި ކުރިޔަށް ގެންދަން ޓެންޑާކޮށްފައި ހުރި މަސައްކަތްތަކުގެ ތެރޭގައި މަސްވެރިންނަށް އައިސް ޕްލާންޓެއް އެރަށުގައި ގާއިމުކުރުމާއި ރަސްދޫގައި ހުންނަ އަތޮޅު ތައުލީމީ މަރުކަޒުގެ 12 އާ ކުލާސްރޫމާއި މަލްޓި ޕާޕޮސް ހޯލް އިމާރާތްކުރުން ހިމެނެ އެވެ.
އެ ބައްދަލުވުމުގައި ރައީސް ވަނީ މިފަދަ ބައެއް މަޝްރޫއުތަކުގެ އެންމެ ފަހުގެ މައުލޫމާތު ކައުންސިލާ ހިއްސާކުރައްވާފަ އެވެ. ރައީސްއާއެކު ކައުންސިލުން ބޭއްވި ބައްދަލުވުމުގައި ވަނީ ރަސްދޫގައި ހުންނަ އަތޮޅު ހޮސްޕިޓަލަށް ކުރިމަތިވެފައިވާ ދަތިތަކާ ގުޅޭ ގޮތުން ވެސް މަޝްވަރާ ކުރައްވާފަ އެވެ.
އަދި ރަސްދޫގައި އަޅާފައިވާ ސީ ވޯލްއަށް ލިބިފައިހުރި ގެއްލުންތަކާ އެރަށުގައި ކުޅިވަރު އިތުރަށް ކުރިއަރުވަން ވެސް ކައުންސިލުން ވަނީ ރައީސްއާ މަޝްވަރާ ކޮށްފަ އެވެ. އަދި ކައުންސިލާއި ސަރުކާރުގެ އިދާރާތަކާއެކު ގުޅިގެން އިތުރަށް ރަށުގައި ކުރެވެން ހުރި ކަންކަމާ ގުޅޭ ގޮތުން ވެސް އެ ބައްދަލުވުމުގައި ވަނީ މަޝްވަރާ ކޮށްފަ އެވެ.
ރައީސް ސޯލިހު ރަސްދޫގައި. ރައީސް ވަނީ ރަސްދުއަށް ވަޑައިގެން އެރަށުގެ ގިރާ ސަރަހައްދަށް ޒިޔާރަތްކުރައްވާފަ.-- ފޮޓޯ: ރައީަސް އޮފީސް
އެފަހުން ރައީސް ވަނީ ރަސްދޫގައި ހުންނަ އަތޮޅު ހޮސްޕިޓަލަށް ޒިޔާރަތްކުރައްވާފަ އެވެ. އަދި އެރަށުގައި ގިރަމުންދާކަމަށް ފާހަގަކުރެވިފައިވާ ސަރަހައްދަށް ވެސް ރައީސް ވަނީ ޒިޔާރަތްކުރައްވާފަ އެވެ.
އާބާދީގައި ގާތްގަނޑަކަށް 1،200 އެއްހަ މީހުން ދިރިއުޅޭ ރަސްދޫއަކީ ރައީސްގެ ދެ ދުވަހުގެ މި ދަތުރުފުޅުގައި ވަޑައިގަތް ދެވަނަ މަންޒިލެވެ. އަތޮޅުވެރިކަން ކުރާ ރަސްދުއަށްފަހު އުކުޅަސް، މަތިވެރި، ބޮޑުފޮޅުދޫ އަދި ހިމަންދުއަށް ވެސް ރައީސް ވަޑައިގަންނަވަން ވަނީ ހަމަޖެހިފަ އެވެ.
