މެންޗެސްޓާ (އޮކްޓޫބަރު 20) - އޭނާ އަށް މީޑިއާ އިން އަމާޒުކުރަމުން އަންނަ ފާޑުކިޔުންތަކުގެ ސަބަބުން އަސަރެއް ނުކުރާ ކަމަށް މެންޗެސްޓާ ޔުނައިޓެޑްގެ ކޯޗު ނޯވޭ އަށް އުފަން އޮލެ ގުނަ ސޯލްޝެއާ ބުނެފި އެވެ.
ފަހަކަށް އައިސް ޔުނައިޓެޑުން ކުޅުނު މެޗުތަކުގައި ނަތީޖާތައް ނުކުމެފައިވާ ގޮތުން ސޯލްޝެއާ އަށް ވަނީ ޕްރެޝަރު ބޮޑުވެފަ އެވެ. ޔުނައިޓެޑްގެ ބައެއް ސަޕޯޓަރުންގެ ގްރޫޕްތަކާއި ޓީވީ އެނަލިސްޓުން ވެސް އަންނަނީ ޔުނައިޓެޑަށް ތަށި ހޯދޭނެ ފެންވަރުގެ މޮޅު ކޯޗެއް ގެންނަން ޖެހޭ ކަމަށް ބުނެ ސޯލްޝެއާ އަށް ފާޑުކިޔަމުންނެވެ.
"އަހަންނަށް އެ ވާހަކަ ތަކުން އަސަރެއް ނުކުރޭ. އަހަންނަށް އެބައޮތް އަމިއްލަ ނަފްސަށް އިތުބާރު. ކްލަބުން އަހަންނަށް ކުރާ އިތުބާރު ބަދަލުނުވާހާ ހިނދަކު، ވަކި ބަޔަކު އަހަންނަށް ކުރާ މަލާމާތެއް ނޫނީ ފާޑުކިޔުމެއް މުހިއްމެއް ނޫން،" ޔުނައިޓެޑަށް އާ ކޯޗެއް ބޭނުންވާ ކަމަށް ބުނެ ލިވަޕޫލްގެ ކުރީގެ ޑިފެންޑަރު އަދި ސްކައި ސްޕޯޓްސްގެ އެނަލިސްޓް ޖޭމީ ކެރަގާ ދެއްކި ވާހަކައާ ގުޅޭ ގޮތުން ކުރި ސުވާލުގެ ޖަވާބުގައި ސޯލްޝެއާ ބުންޏެވެ.
"އާދިއްތަ ދުވަހު އަހަރެމެންނާ (ޔުނައިޓެޑާ) ލިވަޕޫލްގެ މެޗު ވެސް އެބައޮތް،"
ޔުނައިޓެޑް އެންމެ ފަހުން ކުޅުނު ހަތް މެޗުގެ ތެރެއިން މޮޅުވީ ދެ މެޗުންނެވެ. ހަތަރު މެޗުން ބަލިވިއިރު، އެންމެ ފަހުން އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ލެސްޓާ ސިޓީ އަތުން ވަނީ 4-2 އިން ބަލިވެފަ އެވެ. އެ ނަތީޖާއާ އެކު 29 މެޗަށް ފަހު ޔުނައިޓެޑް ވަނީ ލީގުގައި ފުރަތަމަ ފަަހަރަށް ރަށުންބޭރުގައި ބަލިވެފަ އެވެ. ދޮޅު އަހަރު ދެމެހެއްޓި ރެކޯޑަކަށް ނިންމުން އައީ އެވެ.
"ކޮންމެ ޓީމެއް ވެސް އުނދަގޫ ދުވަސްތަކެއް ގުނާނެ. އޭގެ މާނަ އަކީ ކުރަމުން އަންނަ މަސައްކަތްތައް ހުއްޓާލަން ވީއެއް ނޫން. އަހަރެމެން ފޯކަސް ކުރަންވީ ރަނގަޅު ކުރެވޭނެ ކަންތައްތަކަށް،" މި ވަގުތު ފޯމު ގެއްލިފައި އޮތް އޮތުމަށް އިޝާރާތްކޮށް ސޯލްޝެއާ ބުންޏެވެ.
އިނގިރޭސި މީޑިއާ ރިޕޯޓްތައް ބުނާގޮތުން މި ވަގުތަށް ބަލާއިރު ޔުނައިޓެޑްގެ ބޯޑު މެމްބަރުންގެ ތާއީދު 100 ޕަސެންޓް ސޯލްޝެއާ އަށް އެބައޮތެވެ. އެކަމަކު، ކުރިއަށް ހުރި މެޗުތަކުގެ ނަތީޖާ ރަނގަޅު ނުކުރެވޭނަމަ ކަންކަން ބަދަލުވުމުގެ ފުރުސަތު އެބައޮތް ކަމަށް އެ މީޑިއާ ރިޕޯޓްތައް ބުނެ އެވެ.
ސޯލްޝެއާ ޔުނައިޓެޑްގެ ކޯޗުކަމާ ހަވާލުވީ 2018 ވަނަ އަހަރުގެ ޑިސެމްބަރު މަހު ހޯސޭ މޮރީނިއޯ ވަކިކޮށް ވަގުތީ އެއްބަސްވުމެއްގެ ދަށުންނެވެ. ވަގުތީ ކޮންޓްރެކްޓެއްގައި ތިން މަސް ދުވަސް ހޭދަކުރިއިރު، ސޯލްޝެއާގެ މަސައްކަތް ޔުނައިޓެޑަށް ރަނގަޅުވުމުން އެ ޓީމުން އޭނާ އަށް ދާއިމީ އެއްބަސްވުމެއް ދިނީ ތިން އަހަރުގެ މުއްދަތަށެވެ.
މި ސީޒަން ފެށުމުގެ ކުރިން ކުރިން އޮތް އެ އެއްބަސްވުން އިތުރު ތިން އަހަރަށް އާ ކުރި އެވެ. އެކަމަކު، މިހާރު ކަންތައްތައް ބަދަލުވަމުންދާ ގޮތަށް ބަލާއިރު، ސޯލްޝެއާ އަށް ކައިރި މުސްތަގުބަލެއްގައި ޔުނައިޓެޑްގެ ވަޒީފާ ގެއްލުމުގެ ބިރު އެބައޮތެވެ.
ޔުނައިޓެޑް މިރޭ ޗެމްޕިއަންސް ލީގުގައި ނުކުންނާނީ އިޓަލީގެ އެޓަލަންޓާއާ ދެކޮޅަށެވެ. މެޗު ފަށާނީ ރާއްޖެ ގަޑިން 12 ޖަހާއިރު އެވެ.
