ޓޯކިޔޯ، ޖަޕާން (އޮކްޓޯބަރު 20) - ޖަޕާނުގެ އާސޯ ފަރުބަދަ ގޮވައި އެތައް ހާސް މީޓަރެއް އުހަށް ދުންތައް ފެތުރެން ފަށައިފި އެވެ.
ޖަޕާނުގެ ހުޅަނގު ދެކުނުގައި ހުންނަ މި އަލިފާން ފަރުބަދަ ބުދަ ދުވަހުގެ ހެނދުނު ގޮވާފައިވާ އިރު މިހާތަނަށް އެއްވެސް މީހަކަށް އަނިޔާވިކަމުގެ ރިޕޯޓެއް ނުލިބެ އެވެ.
ފަރުބަދައިން ހޫނު ގޭސްތައް ފެތުރެން ފެށުމުން އާއްމުން އެ ސަރަހައްދަށް ނުދިޔުމަށް ވަނީ އަންގާފަ އެވެ. އެއްވެސް މީހަކަށް އަނިޔާއެއްވިތޯ ބެލުމުގެ މަސައްކަތް ދަނީ ކުރަމުންނެވެ.
އާސޯ ފަރުބަދައިގެ ތިރީގައި ފަތުރުވެރިންގެ މެދުގައި މަގްބޫލު ދާރުލް އާސާރެއް ހުރެ އެވެ. ނަމަވެސް ދާރުލް އާސާރާ ހަމައަށް އަލިފާން ފައިބާފައެއް ނުވެ އެވެ.
ޖަޕާނުގެ މިޓިއޮރޮލޮޖިކަލް އެޖެންސީން ބުނީ ފަރުބަދައާ ކައިރި ހިސާބުތަކަށް ބޮޑެތި ގާ ފަދަ ތަކެތި ވިއްސައިގެން ދިޔުމުގެ ފުރުސަތު އެބަ އޮތް ކަމަށެވެ.
އާސޯ ފަރުބަދައާ ގުޅިގެން އެ އެޖެންސީން ވަނީ ލެވެލް ތިނެއްގެ އިންޒާރެއް ދީފަ އެވެ. އެއްވެސް ހަރަކާތެއް ނެތި 19 އަހަރު އޮތް އާސޯ ފަރުބަދަ 2016 ގައި ގޮވުމުން ވެސް އެ ލެވެލްގެ އިންޒާރު ނެރުނެވެ.
ޖަޕާނުގެ ހުޅަނގު ދެކުނުގައި އޮންނަ ކިޔޫޝޫ އައިލެންޑުގައި ހުންނަ 1،592 މީޓަރު އުސް މި އަލިފާން ފަރުބަދައަކީ ފަތުރުވެރިންގެ މެދުގައި މަގްބޫލު ތަނެކެވެ.
ޖަޕާނަކީ ދުނިޔޭގެ އަލިފާން ފަރުބަދަތަކުގެ ތެރެއިން އެންމެ ގިނައިން ހަރަކާތްތައް ހިނގާ އަލިފާން ފަރުބަދަތައް ހުންނަ ގައުމެވެ. ޖަޕާނު އޮންނަ "ޕެސިފިކް ރިންގް އޮފް ފަޔާ" އަކީ ގިނަ އަދަދެއްގެ ބިންހެލުމާއި، އަލިފާން ފަރުބަދަ ގޮވުން ފަދަ ކަންކަން ހިނގާ ހިސާބެކެވެ.
ނުވަދިހަ އަހަރުގެ ތެރޭގައި ޖަޕާނަށް ކުރިމަތިވި އެންމެ ނުރައްކާތެރި އަލިފާން ފަރުބަދަ ގޮވުމުގެ ހާދިސާ ދިމާވީ ސެޕްޓެމްބަރު 2014 ގައި އޮންޓަކޭ ފަރުބަދަ ގޮވުމުންނެވެ. އެ ފަހަރު 63 މީހުން މަރުވި އެވެ.
