ފާއިތުވި ދެ ތިން ދުވަހުގެ ތެރޭގައި މުޅި ރާއްޖެއަށް މޫސުން ގޯސްވެ، ކަނޑުމަތީގެ ހިތާމަވެރި ގިނަ ހާދިސާތަކެއް ހިނގާފައިވަނިކޮށް، ކަނޑުގައި ދުއްވާ އުޅަނދުތަކުން ދަތުރުކުރާ ފަރާތްތަކުގެ މެނިފެސްޓާއެކު ލައިފް ޖެކެޓު ބެހެއްޓުން ފަދަ ސަލާމަތީ ގިނަ ފިޔަވަޅުތައް އަންނަ ޖެނުއަރީ މަހުގެ 16 ވަނަ ދުވަހުގެ ފުރިހަމަކުރުމަށް ޓްރާންސްޕޯޓް އޮތޯރިޓީއިން އަންގައިފި އެވެ.
އެ އޮތޯރިޓީން މިރޭ ކުރި އިއުލާނެއްގައި ބުނީ ކަނޑުގެ ސަރަހައްދުގައި ދަތުރުކުރާ އުޅަނދު އުޅަނދުފަހަރުގެ ސަލާމަތާބެހޭ ގަވައިދުގެ ދަށުން ޖުމްލަ 11 ކަމެއް އަންނަ އަހަރުގެ ޖެނުއަރީ 16 ގެ ކުރިން ފުރިހަމަކުރަން އަންގާ ކަމަށެވެ.
އެގޮތުން، ލިސްޓުކޮށްފައިވާ ކަންކަމުގެ ތެރޭގައި އެންމެ ބޮޑަށް ފާހަގަކޮށްލެވެނީ އުޅަނދުތަކުން ދަތުރުކުރާ ފަރާތްތަކުގެ މެނިފެސްޓު އެނގެން އޮތުމާއި ލައިފް ޖެކެޓާއި ލައިފް ބޮއި ހުުރުން ލާޒިމުކުރުމެވެ.
އޭގެ އިތުރުން، އުޅަނދުތަކުގައި މުއާސަލާތީ އާލަތްތައް ހުރުމާއި، އުޅަނދުތަކުގައި ވެސެލް ޓްރެކިން ޑިވައިސެއް ހަރުކުރަންޖެހޭނެ ކަމަށް އެ ގަވައިދުގެ ދަށުން ޓްރާންސްޕޯޓް އޮތޯރިޓީން ވަނީ ލާޒިމުކޮށްފަ އެވެ.
ޖެނުއަރީ 16ގެ ކުރިން ފުރިހަމަކުރަންޖެހޭ އެހެން ކަންކަން
- އޮއިލް ޕޮލިއުޝަން އެންޑް ޕްރިވެންޝަން ސެޓްފިކެޓު ހެއްދުން.
- ނުރައްކާތެރި މުދަލާއި ފަސޭހައިން އަލިފާން ހިފާ މުދާ އުފުލުމާބެހޭ ސެޓްފިކެޓް ހެއްދުން.
- ސުވޭޖް ސެޓްފިކެޓް ހެއްދުން.
- އުޅަނދުފަހަރު މަރާމާތުކުރަން އެހެލުމަށްފަހު ދޫކުރާ ލިޔުން ނެގުން.
- ކެޕްޓަނުންނާއި، ފަޅުވެރިންނާއި، އަދި މެރީން މެކޭނިކުންގެ އަތުގައި ލައިސެންސް އަދި ސަނަދުތައް އޮތުން.
- ބޮޔަންޓް އެޕެރޭޓަސް ހުރުން.
- ކެޕްޓަނާއި ފަޅުވެރިންގެ މެޑިކަލް އަދި ވަޒީފާގެ އެއްބަސްވުން ހުށަހެޅުން.
ޓްރާންސްޕޯޓް އޮތޯރިޓީން ބުނީ އަންނަ ޖެނުއަރީ މަހުގެ 16 ވަނަ ދުވަހުގެ ކުރިން އެކަންކަން ފުރިހަމަކޮށްފައިނުވާ އުޅަނދުތަކަށް ދޫކޮށްފައިވާ ސީ ވާދިނަސް ސެޓްފިކެޓް ބާތިލުކުރެވޭނެ ކަމަށެވެ.
ހިތާމަވެރި ހާދިސާތަކެއް
ޓްރާންސްޕޯޓް އޮތޯރިޓީން މިފަދަ އިއުލާނެއް ނެރެފައިވަނީ ފާއިތުވި ދެ ތިން ދުވަހުގެ ތެރޭގައި ކަނޑުމަތީގެ އެތައް ހާދިސާއެއް ހިނގައި، އުޅަނދުތަކުގެ ސަލާމަތީ ކަންކަން ތަންފީޒު ނުކުރެވޭތީ ކަމާބެހޭ އިދާރާތަކަށް ބޮޑެތި ފާޑުކިޔުންތަކެއް އަމާޒުވަމުންދިޔަ ދަނޑިވަޅެއްގަ އެވެ.
މިދިޔަ ހޮނިހިރު ދުވަހުގެ ހަވީރުގެ ވަގުތެއްގައި މާލެއިން ފުރައިގެން ވ. އަތޮޅަށް ދަތުރުކުރި ލޯންޗަކަށް ރާޅެއް ޖަހައި، އެ ބޯޓުގައި ދަތުރުކުރި އަންހެނެއް ވަނީ މަރުވެފަ އެވެ. އެ ހާދިސާގައި އެ އަންހެން މީހާގެ ދަރިފުޅު ގެއްލިފައިވާއިރު، އަދި ވެސް އެ ކުއްޖާ ފެނިފައެއް ނުވެ އެވެ.
މުޅި ރާއްޖެއަށް ޔެލޯ އެލާޓް ނެރެފައިވަނިކޮށް، އެ ލޯންޗުގައި ތިބި އެއްވެސް މީހަކު ލައިފް ޖެކެޓެއް ނާޅަ އެވެ.
އޭގެ ފަހުން އިއްޔެ ކާށިދޫ ކަނޑުން ދަތުރުކުރި ސަޕްލައި ދޯންޏަކުން ޒުވާނަކު ކަނޑަށް ވެއްޓުނެވެ.
އޭނާ ސަލާމަތްވީ، ދެ ގަޑިއިރެއްހާއިރު ވަންދެން ފަތާފައި ގޮސް ކާށިދޫއަށް އަރައިގެންނެވެ.
