ޓިއުރިން (އޮކްޓޫބަރު 20) - ޔުވެންޓަސް އިން ކްރިސްޓިއާނޯ ރޮނާލްޑޯ ގަންނަން ނިންމި ނިންމުމަކީ އެ ކްލަބަށް މުހިއްމު ކަމެއް ނޫން ކަމަށް އިޓަލީގެ ފުޓްބޯޅަ ފެޑެރޭޝަންގެ ރައީސް ގަބްރިއެލް ގްރަވީނާ ވިދާޅުވެއްޖެ އެވެ.
މީގެ ތިން އަހަރު ކުރިން، 2018 ވަނަ އަހަރު ޔުވެންޓަސް އިން ރޮނާލްޑޯގެ ސޮއި ހޯދީ ރެއާލް މެޑްރިޑަށް 120 މިިލިއަން ޑޮލަރުގެ ޓްރާންސްފާ ފީ އެއް ދެއްކުމަށް ފަހު އެވެ. ޔުވެންޓަސް އިން ރޮނާލްޑޯ ގަތް އެންމެ ބޮޑު ބޭނުމަކީ 1996 ވަނަ އަހަރަށް ފަހު ފުރަތަމަ ފަހަރަށް ޗެމްޕިއަންސް ލީގު ކާމިޔާބު ކުރުމަށެވެ. އެކަމަކު، ރޮނާލްޑޯ މި ފަހަރުގެ ޓްރާންސްފާ މާކެޓްގައި ޔުވެންޓަސް ދޫކޮށްލަން ޖެހުނީ އެކަން ހާސިލްނުވެ އެވެ.
"އަހަަންނަށް ފެނުނު ޔުވެންޓަސް ފިލޯސަފީގައި ކަންތައްތައް ހިނގި ގޮތަށް ބަލާއިރު ޔުވެންޓަސް އިން ރޮނާލްޑޯ ގަންނަން ނިންމުމަކި ގޯސް ނިންމުމެއް. ރޮނާލްޑޯ ޔުވެންޓަސް އަށް އައުމަކީ އިޓަލީ ފުޓްބޯޅަ މާކެޓް ކުރަން ރަނގަޅު ކަމެއް. އެކަމަކު، ޔުވެންޓަސް އަށް އޭގެ ސަބަބުން ފުޓްބޯޅައިގެ ނަޒަރުން ވީ ފައިދާއެއް ފެންނަން ނެތް،" އިޓަލީގެ ޓީވީ އަކަށް ދިން އިންޓަވިއުއެއްގައި ގްރަވީނާ ވިދާޅުވި އެވެ.
މި ފަހަރުގެ ޓްރާންސްފާ މާކެޓްގައި ޔުވެންޓަސް އިން މެންޗެސްޓާ ޔުނައިޓެޑަށް ރޮނާލްޑޯ ވިއްކާލީ 23 މިލިއަން ޑޮލަރަށެވެ. މީގެއިން އެންމެ ފުރަތަމަ ޔުވެންޓަސް އަށް ލިބެނީ 17 މިލިއަން ޑޮލަރެވެ. ބާކީ ލިބޭނީ ރޮނާލްޑޯގެ ދެ އަހަރުގެ ކޮންޓްރެކްޓްގެ މުއްދަތުގެ ތެރޭގަ އެވެ. ރޮނާލްޑޯ ޔުނައިޓެޑަށް ސޮއިކުރީ ދެ އަހަރުގެ ކޮންޓްރެކްޓެއްގައި އިތުރު އެއް އަހަރަށް އާ ކުރެވޭ ގޮތަށެވެ.
ދިހަ އަހަރު ތެރޭ ފުރަތަމަ ފަހަރަށް މިދިޔަ ސީޒަނުގައި ޔުވެންޓަސް އަށް އިޓާލިއަން ލީގު ގެއްލުނުއިރު، އެ ޓީމު މި ފަހަރުގެ ސީޒަން ފަށަން ޖެހުނީ ވަރަށް އުނދަގޫ ފައްތަރެއްގަ އެވެ. ފުރަތަމަ މެޗުތަކަށް ފަހު ރެލިގޭޝަން ޒޯނުގައި ޔުވެންޓަސް އޮތް ނަމަވެސް މިހާރު ޖެހިޖެހިގެން ލީގުގެ ހަތަރު މެޗުން މޮޅުވެ، ޔުވެންޓަސް ވަނީ ކުރިއަށް ޖެހިލައިފަ އެވެ.
ގްރަވީނާ ވިދާޅުވީ މި ވަގުތަށް އޭނާ އަށް ފެންނަ މަންޒަރުތަކަށް ބަލާއިރު، ލީގުގެ ރޭހުގައި އޮތީ ނަޕޯލީގެ އިތުރުން އޭސީ މިލާނާއި އިންޓަ މިލާން ކަމަށެވެ. އެކަމަކު، ލީގު ކުރިއަށްދާ ވަރަކަށް ޔުވެންޓަސް ވެސް ރޭހަށް ވަނުމުގެ ފުރުސަތު އޮތްކަން ގްރަވީނާ ފާހަގަކުރެއްވި އެވެ.
