ގުދުސް (އޮކްޓޯބަރު 19) - ހުޅަނގު އައްސޭރީގައި ދިރިއުޅޭ ރައްޔިތުންގެ ގޮތުގައި ރަޖިސްޓްރީ ކުރުމުގެ ހުއްދަ ފަލަސްތީނުގެ 4،000 މީހުންނަށް 12 އަހަރަށް ފަހު އިޒްރޭލުން ދީފި އެވެ.
އިޒްރޭލުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގައި ދިރިއުޅޭ ރައްޔިތުންގެ ގޮތުގައި އަލަށް ރަޖިސްޓްރީ ކުރި މީހުންނަކީ މިހާރު ވެސް އެ ތަނުގައި އުޅެމުންދާ މީހުންނެވެ.
އޭގެ ތެރޭގައި "ސައްހަ ލިޔެކިޔުން ނެތް" ކަމަށް ކަނޑައަޅާފައިވާ 1،200 މީހުން ހިމެނެ އެވެ. އެގޮތަށް ކަނޑައެޅީ ފަލަސްތީނުގެ އާބާދީ ރަޖިސްޓްރީގައި އެ މީހުންގެ ނަން ނެތުމުންނެވެ.
އޭގެ އިތުރުން އިޒްރޭލުން ވަށާލައި ބަންދުކޮށްފައިވާ ގާޒާގައި ކުރިން ދިރިއުޅުނު ރައްޔިތުންގެ ގޮތުގައި ތިބި 2،800 މީހުން ވެސް ވަނީ ހުޅަނގު އައްސޭރީގެ ރައްޔިތުންގެ ގޮތުގައި ރަޖިސްޓްރީވެފަ އެވެ.
އިޒްރޭލުގެ ޑިފެންސް މިނިސްޓަރު ބެނީ ގާންޓްޒް ވިދާޅުވީ އަލަށް ރަޖިސްޓްރީ ވާން ހުއްދަ ދިނީ "އިންސާނީ" ހާލަތްތަކަށް ބެލުމަށް ފަހު "ފަލަސްތީނުގެ އިގްތިސާދާއި ފަލަސްތީނު ރައްޔިތުންގެ ދިރިއުޅުމުގެ ފެންވަރު ރަނގަޅު ކުރުމުގެ ސިޔާސަތުގެ" ދަށުން ކަމަށެވެ.
ނަވާރަ ސަތޭކަ ފަސްދޮޅަސް ހަތް ވަނަ އަހަރު ކުރި ހަ ދުވަހުގެ ހަނގުރާމަ އަށް ފަހު އިޒްރޭލުން އުޅެނީ ހުޅަނގު އައްސޭރި ހިފައިގެންނެވެ.
އިޒްރޭލުން ހިފާފައިވާ ފަލަސްތީނުގެ ބިންތަކުގައި އުޅޭ ފަލަސްތީނު މީހުންގެ ކަންކަން ބަލަހައްޓާ އިޒްރޭލް ސިފައިންގެ ގޮފިން ބުނީ މިއީ 2009 ވަނަ އަހަރަށް ފަހު ހުޅަނގު އައްސޭރީގައި ރަޖިސްޓްރީ ވާން ހުއްދަ ދިން ފުރަތަމަ ފަހަރު ކަމަށެވެ.
ކުރީގެ ބޮޑު ވަޒީރު ބެންޖަމިން ނަތަންޔާހޫގެ 12 އަހަރުވީ ވެރިކަމަށް ފަހު މި އަހަރު އަލަށް އައި ސަރުކާރުން ބޭނުން ވަނީ ހުޅަނގު އައްސޭރީގައި އުޅޭ ފަލަސްތީނު މީހުންގެ ދިރިއުޅުމުގެ ފެންވަރު ރަނގަޅު ކުރުމަށެވެ.
ހުޅަނގު އައްސޭރީގައި އިޒްރޭލުން ވަޒަންވެރިވުމުގެ ގޮތުން ހިންގާ ޕްރޮގްރާމުތަކުގެ ދަށުން 475،000 އަށް ވުރެ ގިނަ ޔަހޫދީން އެ ތަނުގައި ދިރިއުޅެ އެވެ. ނަމަވެސް އެ ތަނުގައި ޔަހޫދީން އާބާދު ކުރަނީ ބައިނަލްއަގްވާމީ ގާނޫނާ ހިލާފަށެވެ. އެއީ ހުޅަނގު އައްސޭރި އަކީ ފަލަސްތީނު ދައުލަތުގެ ބިމަކަށް ވާތީ އެވެ.
ފަލަސްތީނަކީ ވަކި ދައުލަތެއްގެ ގޮތުގައި ބަލައިގަންނަން މިހާރުގެ ބޮޑު ވަޒީރު ނަފްތާލީ ބެނެޓް ބޭނުންވެވަޑައިނުގަންނަވަ އެވެ. އަދި އިޒްރޭލާއި ފަލަސްތީނާ ދެމެދު ސުލްހައިގެ މަޝްވަރާ ނުކުރާނެ ކަމަށް ވަނީ ވިދާޅުވެފަ އެވެ.
