ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރާއްޖޭގެ އެކި ރަށްރަށަށް މިހާރު ކުރައްވަމުން ގެންދަވާ ސިލްސިލާ ދަތުރުގެ ތެރެއިން މާދަމާ އަރިއަތޮޅު އުތުރުބުރި އަށް ދަތުރެއް ފައްޓަވާ ގޮތަށް ހަމަޖެހިއްޖެ އެވެ.
ރައީސްގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ އެމަނިކުފާނު މި ފަހަރު ދަތުރުކުރައްވާނީ އެ އަތޮޅު ތޮއްޑޫ، ރަސްދޫ، އުކުޅަސް، މަތިވެރި، ބޮޑުފުޅަދޫ އަދި ހިމަންދޫ އަށް ކަމަށެވެ.
"އެ ރަށްރަށުގައި ހިންގަމުންދާ މަޝްރޫޢުތައް ބައްލަވައިލައްވާ، ބައެއް މަޝްރޫޢުތަކުގެ ނިމުން ފާހަގަކުރައްވާނެ،" މަބްރޫކް ޓްވީޓްކުރެއްވި އެވެ.
މި އަތޮޅުގައި ދެން އޮންނަ މީހުން ދިރިއުޅޭ ރަށްތަކަކީ ފެރިދޫ އަދި މާޅޮހެވެ.
ރައީސް ދަތުރު މި ކުރައްވަނީ މިދިޔަ ފަސް ވަރަކަށް ދުވަހު ރާއްޖެ އަށް ކުރަމުން އައި ވިއްސާރަ އަލިވި ވަގުތުގަ އެވެ.
ރައީސް ވަނީ މިދިޔަ ހަފުތާ ބަންދުގައި ދަނޑުވެރިންގެ ދުވަހުގެ ހަރަކާތްތަކަށް ތ. އަތޮޅު ކަނޑޫދުއަށް އަށް ވަޑައިގެންފަ އެވެ. ރައީސް ވަނީ އެރަށުގެ ދަނޑުތައް ބައްލަވާލައްވައި، ދަނޑުވެރިންގެ ދުވަހާ ގުޅިވައިގެން އެރަށުގައި ހުޅުވި ކާބޯތަކެތީގެ މައުރަޒަށް ވެސް ޒިޔާރަތްކުރައްވާފަ އެވެ.
