ލަގްޒެމްބޯގް (އޮކްޓޯބަރު 19) - އަންނަ ބުރާސްފަތި ދުވަހު އިރާނުގެ ނިޔުކްލިއާ މަޝްރޫއާ ގުޅޭ މަޝްވަރާތައް އަލުން ފަށަން ނިންމިކަން އެނގިފައި ނުވާ ކަމަށް ޔޫރަޕިއަން ޔޫނިއަން (އީޔޫ) އިން ބުނެފި އެވެ.
އިރާނުގެ ޕާލިމެންޓު މެމްބަރު އަހްމަދު އަލީ ރެޒާބެއިގުއި ފާރްސް ނިއުސް އެޖެންސީ އަށް ވިދާޅުވީ ބުރާސްފަތި ދުވަހު މަޝްވަރާ ފަށާނެކަން ފޮރިން މިނިސްޓަރު ހުސެން އާމިރް އަބްދުއްލާހިއާން ކަށަވަރު ކޮށްދެއްވި ކަމަށެވެ.
މިދިޔަ އާދީއްތަ ދުވަހު އަލީ ރެޒާބެއިގުއި އާއި އަބްދުއް ލާހިއާން އާ ދެމެދު ބޭއްވި ބައްދަލުވުމަކަށް ފަހު އަލީ ރެޒާބެއިގުއި ވިދާޅުވީ ދުނިޔޭގެ ބާރުގަދަ ގައުމުތަކާއެކު ބުރާސްފަތި ދުވަހު މަޝްވަރާ ފަށާނީ ބްރަސެލްގައި ކަމަށެވެ.
ނަމަވެސް އީޔޫގެ ތަރުޖަމާނު ނަބީލާ މަސްރާލީ ވިދާޅުވީ ބުރާސްފަތި ދުވަހު ބައްދަލުވުމެއް ނޯންނާނެ ކަމަށާއި ބައްދަލުވުމެއް އޮންނާނެކަން ޔަގީންކަމެއް މި ވަގުތު ނެތް ކަމަށެވެ.
އެކަމަކު އިރާނުގެ ފޮރިން މިނިސްޓްރީން ބުނެފައި ވަނީ މަޝްވަރާތަކުގައި އެ ގައުމުގެ ފަރާތުން ބައިވެރިވާ މަންދޫބު އަލީ ބަގޭތީ ބްރަސެލްސް އަށް ވަޑައިގެންނެވުމަށް ހަމަޖެހިފައިވާ ކަމަށެވެ.
އިރާނާއެކު ނިޔުކްލިއާ މަޝްވަރާ ކުރާ ގައުމުތަކަކީ އދ. ގެ ސަލާމަތީ މަޖިލީހުގައި ހިމެނޭ ދާއިމީ ހަތަރު ގައުމު ކަމުގައިވާ އިނގިރޭސި ވިލާތް، ޗައިނާ، ފްރާންސް އަދި ރަޝިއާ އެވެ. އޭގެ އިތުރުން ޖަރުމަނު ވެސް މަޝްވަރާގައި ބައިވެރިވެ އެވެ.
އިރާނާއި އެ ފަސް ގައުމު އެކުގައި މަޝްވަރާތައް އަލުން ފެށީ މިދިޔަ އޭޕްރިލް މަހު ވިއެނާގަ އެވެ. ޔޫރަޕިއަން ޔޫނިއަން (އީޔޫ) ވެސް ބައިވެރިވާ އިރު، އެމެރިކާ އިން ބައިވެރިވަނީ ނުސީދާ ކޮށެވެ.
އިރާނުގެ ނިޔުކްލިއާ މަޝްރޫއާ ގުޅޭ ބައެއް ހަރަކާތްތައް މަޑު ޖައްސާލުމުން އެ ގައުމާ ދެކޮޅަށް އަޅާފައިވާ ދަތިކުރުމުގެ ބައެއް ފިޔަވަޅުތަކަށް ލުއިދޭން އެއްބަސްވީ 2015 ވަނަ އަހަރު އެވެ. އެ އެއްބަސްވުމުގެ ކޯޑިނޭޓަރުގެ ގޮތުގައި އުޅެނީ އީޔޫ އެވެ.
ނަމަވެސް އެމެރިކާގެ ކުރީގެ ރައީސް ޑޮނަލްޑް ޓްރަމްޕް 2018 ގައި އެއްބަސްވުމަށް އަމަލުކުރުން ހުއްޓާލެއްވުމާއެކު އިރާނުން ވެސް ނިޔުކްލިއާ މަސައްކަތް އަލުން ފެށި އެވެ.
ނަމަވެސް އެމެރިކާގެ މިހާރުގެ ރައީސް ޖޯ ބައިޑެން ބޭނުންވެވަޑައިގަންނަވަނީ އެއްބަސްވުން އަލުން ތަންފީޒު ކުރުމަށެވެ. އެކަމަކު އެކަމާ ގުޅޭ މަޝްވަރާތައް ހުއްޓުނީ އިރާނުގެ ރައީސް ކަމަށް އިބްރާހިމީ ރައިސީ އިންތިހާބުވެވަޑައިގެންނެވި ހިސާބުންނެވެ.
