ޕެރިސް (އޮކްޓޫބަރު 19) - ވޯލްޑް ކަޕް ކޮލިފައިން މެޗެއްގައި ބްރެޒިލަށް ކުޅެނިކޮށް ނޭމާ އަށް އަނިޔާވެފައިވާ ކަމަށް އޭނާ ކުޅެމުން އަންނަ ފްރާންސްގެ ޕީއެސްޖީން ބުނެފި އެވެ.
ޕްރެކްޓިހުގައި ބައިވެރިވި ނަމަވެސް ޗެމްޕިއަންސް ލީގުގައި މިރޭ އާރްބީ ލައިޕްޒިގާ ދެކޮޅަށް ކުޅޭ މެޗުގައި އުކުޅުވަޅަށް ލިބިފައިވާ އަނިޔާއެއްގެ ސަބަބުން ނޭމާ އަށް ނުކުޅެވޭނެކަމަށް ޕީއެސްޖީން ވަނީ މީޑިއާގައި ބުނެފަ އެވެ.
ޕީއެސްޖީން އުއްމީދު ކުރަނީ ފްރެންޗް ލީގުގައި މި މަހު މާސޭ އާއި އެންމެ ފަހުގެ ޗެމްޕިއަން ލިލްއާ ދެކޮޅަށް ކުޅޭ މެޗާ ހަމައަށް ދާން ވާއިރަށް ނޭމާ ފިޓްވުމެެވެ.
"އަހަންނަށް އެންމެ މުހިއްމީ ކުޅުންތެރިންގެ ސިއްހަތު. ނޭ (ނޭމާ) މި ވަގުތު ހުރީ އަނިޔާގެ ސަބަބުން ކުޅުމާ ދުރުގައި. މާ ދުވަހެއް ނުވެ އޭނާ އެއްކޮށް ފިޓްވެގެން އެނބުރި އަންނާނެ. ޕީއެސްޖީގައި ނޭ ކުޅޭ އެ މަގާމަށް ކުޅެވޭނެ ކުޅުންތެރިން އެބަތިބި،" ޕީއެސްޖީގެ ކޯޗު މަައުރޯ ޕޮޗެޓީނޯ ބުންޏެެވެ.
މި ސީޒަނުގައި މިހާތަނަށް ޕީއެސްޖީ އަށް ކުޅެދިން ހަތް މެޗުން ނޭމާ ޖަހާފައިވަނީ އެންމެ ގޯލެކެވެ. އެކަމަކު، ވޯލްޑް ކަޕް ކޮލިފައިންގައި އޭނާ އަންނަނީ މޮޅު ކުޅުމެއް ދައްކަމުންނެވެ.
ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި 2017 ވަނަ އަހަރު ޕީއެސްޖީއާ ގުޅުނު ނޭމާ ވަނީ އެ ކްލަބާ އެކު ދިގު މުއްދަތުގެ ކޮންޓްރެކްޓެއް ހަދައިފަ އެވެ. ލިއޮނަލް މެސީ މި ފަހަރު ޕީއެސްޖީ އަށް ގެނައުމުގައި އެންމެ އިސް ރޯލެއް ކުޅުނީ ނޭމާ އެވެ.
މިރޭ ލައިޕްޒިގާ ދެކޮޅަށް ކުޅޭ މެޗަށް ޕީއެސްޖީގެ އެންހެލް ޑި މާރިއާ ސަސްޕެންޑް ވެފައިވާއިރު، ލެއަންޑްރޯ ޕަރޭޑޭސް އާއި ސާޖިއޯ ރާމޯސް ހުރީ އަނިޔާގަ އެވެ. އަދި އާޖެންޓީނާގެ ފޯވާޑް މައުރޯ އިކާޑީ އާއިލީ ކަމެއްގައި މި ވަގުތު ހުރީ ޓީމާ ދުރުގަ އެވެ. މީޑިއާ ރިޕޯޓްތައް ބުނާގޮތުން އިކާޑީ އާއި އޭނާގެ ލޯބިވެރިޔާ ވަންޑަ ނާރާ މައްސަލަ ޖެހި ދެ މީހުން ވަނީ ވަކިވެފަ އެވެ.
