ވޮޝިންޓަން، އެމެރިކާ (އޮކްޓޯބަރު 18) - އެމެރިކާގެ ކަޅު ނަސްލުގެ ފުރަތަމަ ސެކެޓްރީ އޮފް ސްޓޭޓް ކޮލިން ޕަވަލް އަށް ކޮވިޑް ޖެހި، ފަރުވާ ކުރަމުން ދަނިކޮށް އުމުރުން 84 އަހަރުގައި އަވަހާރަވެއްޖެ އެވެ.
"އަޅުގަނޑުމެންނަށް ގެއްލިގެން އެ ދިޔެއީ އާދަޔާ ހިލާފު ލޯބިން ފުރިގެންވާ ފިރިއެއް، ބައްޕައެއް، ކާފައެއް އަދި އެމެރިކާ ރައްޔިތެއް،" ޕަވަލް އާއިލާ އިން ސޯޝަލް މީޑިއާގައި އާއްމުކުރި ބަޔާނެއްގައި ބުންޏެވެ.
އެމެރިކާގެ ހަތަރު ރައީސަކަށް ހިދުމަތް ކުރެއްވި ޕަވަލް އަކީ ސިފައިންގެ ކުރީގެ ޖެނެރަލެކެވެ. ސެކެޓްރީ އޮފް ސްޓޭޓް ކަމަށް އޭނާ ވަޑައިގެންނެވީ 2000 ވަނަ އަހަރު އެވެ.
"ޖެނެރަލް ޕަވަލް އަކީ އެމެރިކާގެ ބަތަލެއް، އެމެރިކާގެ ނަމޫނާއެއް އަދި އެމެރިކާގެ ފަހުރުވެރި ޝަހުސެއް،" އޭނާ އެ މަގާމަށް ކަނޑައެޅިކަން އިއުލާނު ކުރައްވަމުން ކުރީގެ ރައީސް ޖޯޖް ޑަބްލިއު ބުޝް ވިދާޅުވި އެވެ.
އެމެރިކާ އިން އިރާގަށް އަރަން ނިންމީ ނުރައްކާތެރި ހަތިޔާރު އެ ގައުމުގައި ހުރުމުން ކަމަށް އދ. ގެ ސަލާމަތީ މަޖިލީހުގައި ފެބްރުއަރީ 2003 ވަނަ ޕަވަލް ވިދާޅުވި އެވެ.
ނަމަވެސް އިރާގު ފަސްގަނޑުގައި އެފަދަ އެއްވެސް ހަތިޔާރެއް ނެތްކަން ސާބިތުވުމުން ޕަވަލް އަށް ކިޔާ ފާޑުކިޔުންތައް ވަރަށް ބޮޑަށް އިތުރުވި އެވެ.
"އެއީ ބޮޑު އޮޅުމެއް... އެކަން އަބަދުވެސް އަޅުގަނޑުގެ ރިކޯޑުގައި އޮންނާނެ. އެއީ ހިތްދަތި ކަމެއް. މިހާރު ވެސް ވަރަށް ހިތްދަތިވޭ،" އޭބީސީ ނޫހަށް 2005 ވަނަ އަހަރު ދެއްވި އިންޓަވިއުގައި އެކަމާ ގުޅޭ ގޮތުން ޕަވަލް ވިދާޅުވި އެވެ.
ޕަވަލް އަވަހާރަވުމާ އެކު އެމެރިކާގެ ސިޔާސީ އެކި ފަރާތްތަކުން ދަނީ ހިތާމަ ފާޅުކުރަމުންނެވެ. ޕަވަލްގެ އާއިލާއިން ބުނީ އޭނާ އަށް ކޮވިޑް ޖެހިވަޑައިގެންނެވީ ވެކްސިން ފުރިހަމަ ކުރައްވާފައި ވަނިކޮށް ކަމަށެވެ.
