ފާހާނާކުރަން ދޯނީގެ ފަހަތުކޮޅަށް ގޮސް އޭނާ ހުއްޓުނުއިރު ކުރިމަތިން ފެންނަނީ ކާށިދޫ ކަނޑުގެ ބިޔަ ރާޅުތަކެވެ. މިއީ އާދަޔާހިލާފަށް މޫސުން ގޯސް ދުވަސްވަރެއްކަމުން، ގަދަ ކަމަށް މަޝްހޫރު ކާށިދޫ ކަނޑުގެ ބިރުވެރިކަން މިއަދު އަދި މާބޮޑެވެ. އެހެން ހުއްޓާ ކުއްލިއަކަށް ޖެހި ރާޅެއްގައި ދޯންޏަށް އެރި ގުޑުމާ އެކު އޭނާ ކަނޑަށް ވެއްޓުނީ އެވެ.
އޭނާ އަށް ހަޅޭއްލަވާނެ ފުރުސަތެއް ނުލިބުނެވެ. ކަނޑަށް ވެއްޓުނު ގޮތަށް ފުރަތަމަ ވެސް ދިޔައީ އަޑިއަށެވެ. ވަރަށް މަސައްކަތުން މައްޗަށް އެރިއިރު ދޯނި އޮތީ ދުރަށް ގޮއްސަ އެވެ. އެހިސާބުން ހަޅޭއްލަވައި، އޭނާ ވެއްޓުނުކަން ދޯނީގައި ތިބި މީހުންނަށް އަންގަން މަސައްކަތްކުރި އެވެ. އެކަމަކު ދޯނީގައި ތިބި މީހުންނަކަށް އެ އަޑެއް ނީވެ އެވެ. އިންޖީނުގެ އަޑާއި ޖަނަރޭޓަރުގެ އަޑުގެ ސަބަބުން އޭނާގެ ހަޅޭކުގެ އަޑު ފަޅުވެރިންގެ ކަންފަތާ ހަމަޔަށް ފޯރާ ގޮތެއް ނުވި އެވެ.
"އެހެން ގޮސް ދޯނި ގެއްލުނީ ލޯމައްޗަށް، ވަރަށް ދެރަވި އެވަގުތުކޮޅު. ދެން އޮތީ ފުރާނަ އަތަށް ލައިގެން،" އޭނާ ކިޔައިދިނެވެ.
އެއީ މިއަދު ކާށިދޫ ކަނޑުން ދަތުރުކުރި ސަޕްލައި ދޯންޏަކުން ކަނޑަށް ވެއްޓުނު އިބްރާހިމް ލީވާންގެ ވާހަކަ އެވެ. އޭނާ ހޯދަން ސިފައިން މަސައްކަތްކުރަނިކޮށް އިވުނީ ފަތާގައި ގޮސް ކައިރީގައި އޮތް އުފަން ރަށް ކާށިދޫ އަށް އެރި ހަބަރެވެ.
އުމުރުން 22 އަހަރުގެ ލީވާން ބުނި ގޮތުގައި ކާށިދޫ ކަނޑުގައި އޭނާ ހޭދަކުރީ އިންތިހާ އަށް ބިރުވެރި ވަގުތުކޮޅެކެވެ. ސަލާމަތްކޮށްދޭނެ މީހެއް ނެތެވެ. ލައިފްޖެކެޓެއް ނެތެވެ. ހިކިފަސްތަނެއް ފެންނާކަށް ނެތެވެ. ވަށައިގެން ފެންނަނީ ބޮޑެތި ރާޅުތަކެވެ. ބިޔަ ބާނިތަކެވެ.
"ގާތްގަނޑަކަށް ދެ ގަޑިއިރު ވަރުވާނެ ކަނޑުވެފައި. ވަރަށް ބިރުގަތް އެ ގަޑީގަ. ކާށިދޫ ކަނޑަކީ ހަމަ އެންމެ ގަދަ އެއް ކަނޑުތާ. ދެން މިއަދު އަދި އެހާ ވިއްސާރަކޮށް އޮއްވާ އެހެންވީމާ ވަރަށް ބިރުގަތް،" ލީވާން ކިޔައިދިނެވެ.
އެކަމަކު އޭނާ އަށް އިތުރު ގޮތެއް ނެތެވެ. އެހެންވެ ކަށިން ހިތްވަރު ނެރުނެވެ. އަދި މަޑުމަޑުން، އެކަމަކު ގަދަ ހިތްވަރާ އެކު ކާށިދޫ ކަނޑުގެ ބިޔަ ރާޅުތަކާ އެކު ހަނގުރާމަކުރަން ފެށި އެވެ. ވިސްނުންތެރިކަމާ އެކު ދަނޑިވަޅެއް ހޯދައި ރަށާ ދިމާލަށް ފަތައިގަތެވެ.
"ވަރުބަލި ވުމުން ފްލޯޓް ވެލާފަ އަނެއްކާ ވެސް ފަތައިގަންނަނީ،" އޭނާ ބުންޏެވެ.
ލީވާނަކީ މޮޅަށް ފަތަން ދަންނަ ޒުވާނަކަށް ވާތީ އެކަމުގެ ފައިދާ މިއަދު ކުރި އެވެ. އޭނާގެ ނަސީބު ވެސް ރަނގަޅީ އެވެ. އޮއި ހުރީ ރަށާ ދިމާލަށްކަމަށް ކަމުން ދެ ގަޑިއިރު ތެރޭ ރަށުގެ ފަރާ ހަމަޔަށް އޭނާ ފޯރި އެވެ. އޭނާ ދޯނިން ވެއްޓުނީ ކާށިދޫއާ ތިނެއް ނުވަތަ ހަތަރު މޭލު ބޭރުން ގާތްގަނޑަކަށް ހެނދުނު 10 ޖެހިއިރު އެވެ. ރަށާ ހަމަޔަށް ފޯރިއިރު 12 ޖަހާ ބޮޑުވެދާނެ އެވެ.
"ފުރަތަމަ ވެސް އަރާ ވަރުބަލި ފިލުވާލާފައި ހެއްދެވި ފަރާތަށް ޝުކުރު އަދާކުރީ،" ލީވާން ބުންޏެވެ.
އޭނާ އަށް ރަށަށް އެރުނީ ރަށުގެ ވަލު ފަރާތުންނެވެ. އެތާ ކުޑަ މަގެއް އޮވެ އެވެ. އެމަގުން ގޮސް އެންމެ ފުރަތަމަ ވެސް ޖެހޭނީ އޭނާގެ އާއިލާ މީހެއްގެ ގެޔަކާ އެވެ. އެ ގެޔަށްގޮސް ވީ ގޮތް ކިޔައިދިނުމުން ބޭބެއާއެއްކޮށް ސައިކަލުގަ ޕޮލިސް ސްޓޭޝަނަށް ގެންދިޔަ އެވެ.
"އެތަނުން އެއްޗެހި ބަދަލުކޮށްގެން ދެން ދިޔައީ ސިއްހީ މަރުކަޒަށް،" ލީވާން ކިޔައިދިނެވެ.
އޭނާ އަށް ބޮޑު އަނިޔާއެއް ނުވެ އެވެ. ހަމައެކަނި ލިބުނު ހާނިއްކަ އަކީ ފަރުމައްޗަށް އެރިއިރު ފައިގެ ދަށްފުށް މަށައިގެން ދިއުމެވެ.
މިއަދުގެ ހާދިސާއާ އެކު އެންމެން އަހާ ސުވާލަކީ މިހާ ގަދައިގައި ދަތުރުކުރީ ކީއްވެ ހެއްޔެވެ؟ ލީވާން ބުނި ގޮތުގައި ކައްޕި ހުރީ ނުފުރާ މަޑުކޮށްގެން ކަމަށެވެ. އެކަމަކު ސަޕްލައި ދޯނީގެ ވެރި ފަރާތުން އެންގުމުން އިތުރު ގޮތެއް ނެތުނީ ކަމަށް އޭނާ ބުންޏެވެ.
"އެހެން އޮވެފައި ރޭ ދަންވަރު ފުރީ އެންމެ ފަހުން،" އޭނާ ބުންޏެވެ.
ގަދަ ހިތްވަރުން ސަލާމަތްވެ އެއްގަމަށް އެރުމުން ލީވާނުގެ ކަންފަތުގައި ޖެހުނީ ހިތްހަމަނުޖެހުނު އަޑެކެވެ. އޭނާ ދޯނިން ފުންމާލީ އަމިއްލަ އަށް ކަމަށް ބުނެ ބައެއް މީޑިއާތަކުން ރިޕޯޓްކުރީ އެވެ. ލީވާން އެ ވާހަކަތައް ދޮގުކުރެ އެވެ.
"އަޅުގަނޑަކީ އުމުރުން 22 އަހަރުގެ ފިރިހެނެއް. އަޅުގަނޑު އަދި މިހުރީ ހަމަ ބުއްދީގަ. ދޯނިން ފުންމާލަންވީ އެއްވެސް ސަބަބެއް ނެތް ހަމަ. އެއީ ހުސް ދޮގު،" ލީވާން ބުންޏެވެ.
