މިއަދު ހެނދުނު ކ. ކާށިދޫ ކައިރިން ދަތުރުކުރަމުންދިޔަ ބޯޓަކުން ކަނޑަށް ވެއްޓި ގެއްލުނު މީހާ ފަތާފައި ގޮސް ކާށިދުއަށް އަރައިފި ކަމަށް ފުލުހުން ބުނެފި އެވެ.
އުމުރުން 22 އަހަރުގެ އެ ޒުވާނާ ކަނޑަށް ގެއްލުނީ މިއަދު 11 ޖަހާކަންހާއިރު އެވެ. އޭނާ ގެއްލުނީ އޭނާ މަސައްކަތްކުރާ ސަޕްލައި ދޯނި ބ. އަތޮޅަށް ދަތުރުކުރަމުންދަނިކޮށެވެ. ކާށިދޫ އަށް ނިސްބަތްވާ އެ ޒުވާނާ އަކީ އެ ދޯނީގައި ފަޅުވެރިޔެއްގެ ގޮތުގައި މަސައްކަތްކުރާ މީހެއް ކާށިދޫ ކައުންސިލް ރައީސް މުހައްމަދު އާމިރު ވިދާޅުވި އެވެ.
"އޭނާ ފަތާފައި އެރީ ރަށަށް. ދެން ނަސީބު ރަނގަޅުކަމުން ހުޅަނގު ފަރާތުން އޮޔާއެއްކޮށް ފަތާފައި އައިސް ރަށަށް އެރުނު ވަރަށް ފަސޭހައިން. އެއްވެސް އަނިޔާއެއް ނެތް މާ ބޮޑު. އެއީ ވަރަށް ރަނގަޅަށް ފަތަން ވެސް ދަންނަ ކުއްޖެއް،" އާމިރު ވިދާޅުވި އެވެ.
އެ ޒުވާނާއަށް އަނިޔާއެއް ލިބިފައި ނުވި ނަމަވެސް، އޭނާ މިވަގުތު ހުރީ ކާށިދޫ ސިއްހީ މަރުކަޒުގައި ކަމަށް އާމިރު ވިދާޅުވި އެވެ.
އެ ޒުވާނާ ގެއްލުނުއިރު ބޯޓު ދަތުރުކުރަމުންދިޔައީ ކާށިދުއާ ހަ ނޯޓިކަލް މޭލު ބޭރުން ކާށިދޫ ކަނޑުން ބ. އަތޮޅާ ދިމާލަށްކަމަށް އެމްއެންޑީއެފް ކޯސްޓްގާޑުން ވަނީ ބުނެފަ އެވެ. އަދި އޭނާ ހޯދުމުގެ މަސައްކަތް ވެސް ކޯސްޓްގާޑުން ވަނީ އޭރު ފަށައިފަ އެވެ.
