އަމީނީ މަގުގައި ހުންނަ ސީގަލް ފުޑްސް އިމާރާތުގައި އަލިފާނުގެ ހާދިސާއެއް ހިނގައިފި އެވެ.
މި ހާދިސާގައި އެއްވެސް މީހަކަށް ޖިސްމާނީ ގޮތުން އަނިޔާއެއް ނުވެ އެވެ.
އެމްއެންޑީއެފްގެ ފަޔާ އެންޑް ރެސްކިއު އިން ވަނީ މިއަދު 11:45 ހާއިރު ރޯވި އަލިފާގަނޑު އޭގެ 35 މިނެޓެއްހާއިރު ކޮންޓްރޯލްކޮށްފަ އެވެ.
އަލިފާން ރޯވީ ގިނަ ދުވަސްވީ އެ އިމާރާތުގެ ހަތަރު ވަނަ ފަންގިފިލާގަ އެވެ. އެއީ ސީގަލްސް ކުންފުނީގައި ވަޒީފާ އަދާކުރާ ބިދޭސީންގެ އެކޮމަޑޭޝަނެކެވެ. އެތަނުގައި ނިދަނީ ބަންގްލަދޭޝް ދެ މީހުންނާއި އިންޑިއާ މީހެކެވެ. ރޯވި އިރު އެންމެން ވެސް ތިބީ ޑިއުޓީގަ އެވެ. އެހެންވެ އޭރު އެތަން ހުރީ ތަޅުލައިފަ އެވެ.
އެތަނާ ހަވާލުވެ ހުރި މީހަކު ބުނި ގޮތުގައި އެއީ ހަމައެކަނި ނިދާލަން ބޭނުންކުރާ ތަނެއް ކަމަށާއި އެއްވެސް ކަހަލަ މުދަލެއް ނުހުންނާނެ ކަމަށެވެ. އަދި އެއީ ކައްކާކެވޭ ގޮތަށް ހުރި ތަނެއް ނޫން ކަމަށް ވެސް އޭނާ ބުންޏެވެ.
"ބެލެވެނީ އޭސީ ޝޯޓެއް ކަމަށް. އެއީ ލަފާކުރެވޭ ގޮތަކީ،" އޭނާ ބުންޏެވެ.
އެ އިމާރާތާ ޖެހިގެން ފުރަގަހަށް ހުރީ ވަށައި ޓިނު ޖަހާފައި ހުރި ގެއެކެވެ. އެހެންވެ އަލިފާންގަނޑު ފެތުރުމުގެ ބިރު އޮތެވެ. އެކަމަކު އެމްއެންޑީއެފް އިން ވަނީ ކުޑަ ވަގުތުކޮޅެއްގެ ތެރޭ އަލިފާންގަނޑު ނިއްވާލައި ފެތުރުން ކޮންޓްރޯލްކޮށްފަ އެވެ.
