މާލޭން ވ. އަތޮޅަށް ދަތުރުކުރަމުން ދިޔަ ލޯންޗެއް ރާޅެއްގައި ޖެހި އޭގެ ތެރެއިން ކަނޑަށް ވެއްޓި ރޭ މަރުވި މ. ގްރީން ޕީކް މަރިޔަމް ނާހިދާ، 33، ގެ ހަށިގަނޑު މިއަދު ހެނދުނު މާލެ ގެނެސްފި އެވެ.
އެމްއެންޑީއެފްއިން ބުނީ ނާހިދާގެ ހަށިގަނޑު މާލެ ގެނައުމަށް ކޯސްޓްގާޑުން އެހީތެރިކަން ފޯރު ކޮށްދީފައިވާ ކަމަށާއި އޭނާގެ ހަށިގަނޑު މާލެ ގެނެވުނީ ހެނދުނު 7:30 ހާއިރު ކަމަށެވެ.
އޭނާއާ އެކު ކަނޑަށް ވެއްޓުނު އޭނާގެ ދެ ކުދިންގެ ތެރެއިން އެއް ކުއްޖަކު އަދި ނުފެނެ އެވެ. އަނެއް ކުއްޖާ ވަނީ ސަލާމަތްކޮށްފަ އެވެ. ގެއްލުނީ އުމުރުން 4 އަހަރުގެ ފިރިހެން ކުއްޖެކެވެ.
އެ ކުއްޖާ ހޯދުމުގެ މަސައްކަތް ހުއްޓާނުލާ ކުރިއަށް ގެންދާ ކަމަށް އެމްއެންޑީއެފް އިން ބުންޏެވެ.
ނާހިދާ އާއި އޭނާގެ ފިރިމީހާ އަދި ދެ ކުދިން އިއްޔެ މާލޭން ފުރީ ފިރިމީހާގެ ރަށަށް ޗުއްޓީއަކަށް ދިއުމަށެވެ.
މި ހާދިސާ ހިނގިއިރު ލޯންޗުގައި 13 މީހުން ދަތުރުކުރަމުން ދިޔަ އެވެ.
ހާދިސާ ހިނގުމުން ނާހިދާ ގެންދިޔައީ ކ. ގުރައިދޫއަށެވެ. ނަމަވެސް އެރަށު ސިއްހީ މަރުކަޒަށް ގެންދިޔަ އިރުވެސް އޭނާ އޮތީ މަރުވެފަ އެވެ.
ލޯންޗުގައި ހުރި މީހަކު ބުނި ގޮތުގައި ހާދިސާ ހިނގީ ކަނޑުގަދަކަމުން ކުރިއަށް ނުދެވިގެން ލޯންޗު އަނބުރާލަން އުޅުނު ވަގުތު ކަމަށާއި ދަތުރުމަތީ އެއްވެސް މީހަކު ލައިފް ޖެކެޓް ނާޅާ ކަމަށެވެ.
އޭނާ ބުނި ގޮތުގައި މާލޭން ދަތުރަށް ފެށިއިރު ވެސް ކަނޑު ވަރަށް ގަދަ އެވެ. އެކަމަކު އިއްޔެ ހެނދުނު ވެސް އެ ލޯންޗު ދަތުރެއްކޮށްފައިވާތީ ކެޕްޓަނަށް އިތުބާރު އޮތުމުން ފުރީ ކަމަށް އޭނާ ބުންޏެވެ.
"ކެޕްޓަން އަށް ކޮންފިޑެންސް އޮތީމާ ނައްޓާލީ،" އޭނާ ބުންޏެވެ.
އެކަމަކު ވަކި ހިސާބަކުން ދަތުރުކުރެވޭ ގޮތް ނުވުމުން އޮޅުވެލި ރިސޯޓް ކައިރިން މާލެއާ ދިމާލަށް އަނބުރާލަން މަޖުބޫރުވީ ކަމަށް އޭނާ ބުންޏެވެ. އެ ވަގުތު ލޯންޗު ތެރެއަށް ރާޅެއް ބިންދާލީ އެވެ. އަދި ބިންދާލި ރާޅާއެކު އެރި ލޮޅުމުގައި ނާހިދާ އާއި އޭނާ ދެ ކުދިން ކަނޑަށް ވިއްސައިގެން ދިޔަ އެވެ.
"އެވަގުތު ލޯންޗުގައި ތިބި އެއްވެސް މީހަކު ލައިފްޖެކެޓެއް ނެތް. އަދި ސަލާމަތީ ފިޔަވަޅުތަކެއް އަޅާފައެއް ނެތް،" އޭނާ ބުންޏެވެ.
ސަލާމަތްވި މީހުންނާ އެކު ލޯންޗު ގެންގޮސް ވެއްދީ ކައިރީގައި އޮތް ގުރައިދޫ ފަޅަށެވެ. އަދި ނާހިދާ ގުރައިދޫ މަރުކަޒަށް ގެންދިޔައިރު ވެސް އޮތީ މަރުވެފަ އެވެ. ގުރައިދޫ ހެލްތު ސެންޓަރުން މިވަގުތު ފަރުވާ ދެމުން އަންނަނީ އެންމެ މީހަކަށެވެ.
ގުރައިދޫ ކައުންސިލްގެ ނައިބު ރައީސް އިބްރާހިމް ޝަލީޒް ވިދާޅުވީ ހާދިސާގައި އިތުރު މީހަކަށް ބޮޑު އަނިޔާއެއް ލިބިފައި ނުވާ ކަމަށެވެ.
"ޑްރީމް ސްޕީޑް 2" އަކީ ވ. ފެލިދޫގައި އޮޕަރޭޓްކުރާ ލޯންޗް ސެކްޝަނެއްގެ ލޯންޗެކެވެ. އެ އުޅަނދު ހުކުރު ދުވަސް ފިޔަވައި ކޮންމެ ދުވަހަކު މާލެ އަށް ދެ ދަތުރު ކުރެ އެވެ. މީހުން ނަގަނީ ވ. އަތޮޅުގެ އެކި ރަށްރަށުންނެވެ.
