ލިވަޕޫލް (އޮކްޓޫބަރު 16) - ސައުދީ އަރަބިއްޔާ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ދާދި ފަހުން ގަތް ނިއުކާސަލް ޔުނައިޓެޑަކީ މިހާރު ޔޫރަޕިއަން ސުޕަ ލީގު ފެންވަރުގެ އެއް ޓީމު ކަމަށް ބުނެ، ލިވަޕޫލްގެ ކޯޗު ޔާގެން ކްލޮޕް ފާޑުކިޔައިފި އެވެ.
ޕީއައިއެފް އިން މެޖޯރިޓީ ހިއްސާާާއާ އެކު ނިއުކާސަލް ގަންނަން ޖުމްލަ 408 މިލިއަން ޑޮލަރު ހޭދަކުރި އެވެ. ނިއުކާސަލްގެ މެޖޯރިޓީ ހިއްސާ އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ. މިއީ ފުޓްބޯޅަ ކްލަބެއް ހިންގާ ބައެއްގެ އެންމެ ބޮޑު މިލްކިއްޔާތެވެ. ދެން އެ ޓީމާ އެންމެ ކައިރި ކުރަނީ މެންޗެސްޓާ ސިޓީ ހިންގަމުން އަންނަ ސިޓީ ފުޓްބޯލް ގްރޫޕްގެ ވެރިޔާ ޔޫއޭއީގެ ޝެއިހް މަންސޫރެވެ. އޭނާގެ މިލްކިއްޔާތުގައި 32 ބިލިއަން ޑޮލަރު އެބަހުއްޓެވެ.
ނިއުކާސަލްގެ ޑީލް ކުރިއަށްދިޔައީ ފައިނޭންޝިއަލް ފެއާޕްލޭ (އެފްއެފްޕީ)ގެ ގަވާއިދުގެ ތެރެއިން ތޯ ކަަށަވަރުކުރަން ޕްރިމިއާ ލީގުގެ ބައެއް ކްލަބްތަކުން ޕްރިމިއާ ލީގުގެ ބޯޑުގައި އެދުނެވެ. އޭގެ ތެރެއިން އެންމެ އިސްކޮށް އުޅެނީ މެންޗެސްޓާ ސިޓީ އެވެ.
ނިއުކާސަލްގެ މި ޑީލާ ބެހޭގޮތުން ނޫސްވެރިއަކު ސުވާލުކުރުމުން ލިވަޕޫލްގެ ކޯޗު ކްލޮޕް ބުނީ މީގެ ދުވަސްތަކެއް ކުރިން ގިނަ ބަޔަކަށް މައްސަލަ އަކަށްވީ ޔޫރަޕިއަން ސުޕަ ލީގު އަންނަން އުޅޭތީ ކަމަށާއި މިހާރު ނިއުކާސަލް އަކީ ސުޕަ ލީގު ލެވަލްގެ ޓީމެއް ކަމަށެވެ.
"މުޅި ދުނިޔެ ހިތްހަމައެއް ނުޖެހުނު ސުޕަ ލީގު އަންނާތީ. އަހަރެން ބުނެލަން އޮތީ މިހާރު އެއް ކްލަބަށް ބަލާއިރު (ނިއުކާސަލް އަށް ބަލާއިރު) މި އޮތީ ހަަަމަ ސުޕަ ލީގުގެ ހާލަތު. އެ މީހުންނަށް މުޅި ލީގު އެއްކޮށް ވެސް ގަނެލެވޭހާ ފައިސާ އެބައޮތް. ކުރިއަށް އޮތް 20-30 އަށް އަހަރު ނިއުކާސަލް ދުނިޔޭގެ ފުޓްބޯޅަ ޑޮމިނަންޓް ކުރާ ޓީމުތަކުގެ ތެރޭގައި ހިމެނޭނެ،" ކްލޮޕް ބުންޏެވެ.
ކްލޮޕް ބުނީ ނިއުކާސަލް އަކީ ދުނިޔޭގެ ފުޓްބޯޅައިގައި ވަކި ގައުމަކަށް ނިސްބަތްވާ ތިން ވަނަ ކްލަބް ކަމަށެވެ. އަދި މި ތިން ކްލަބް ވެސް އޮތީ ދުނިޔޭގެ އެންމެ މަހުޖަނު އާއިލާތަކާ ގުޅިފައި ކަމަށް ކްލޮޕް ބުނެފައިވެ އެވެ.
"މިއީ އަހަންނާ ބެހޭ ކަމެއް ނޫން. އެކަމަކު އަހަރެންގެ ހިޔާލަކަށް އެހީމަ ދައްކާ ވާހަަކަ. އަހަރެން އަބަދުވެސް ބުނާ ވާހަކަ އަކީ ފުޓްބޯޅަ އަކީ ހަމައެކަނި ފައިސާއިން ވާ ކަމެއް ނަމަ. ބޮޑު ހަރަދުކުރާ ޓީމުތައް އަބަދުވެސް އޮންނާނީ އެންމެ ކުރީގައި. އެކަަމަކު ވަނީ އެހެނެއް ނޫން،" ކްލޮޕް ބުންޏެވެ.
ޕީއައިއެފް އިން މިދިޔަ އަހަރު ނިއުކާސަލް ގަންނަން ހުރިހާ ލިޔެކިއުންތަކެއް ހުށަހަޅައި މަސައްކަތްތައް ކުރިއަށްގެންދިޔަ ނަމަވެސް ތަފާތު ގިނަ ޕްރެޝަރުތަކަކާ ހެދި ޕްރިމިއާ ލީގުން ނިއުކާސަލްގެ އާ ބޯޑު ރަޖިސްޓްރީ ނުކޮށްދިނެވެ. އެއީ މި ޑީލްގައި ސައުދީ ސަރުކާރާ ގުޅޭ ބައިވެރިވުން އޮތުމުން ސިޔާސީ ގޮތުންނާއި އެހެނިހެން ގޮތްގޮތުން ކުރިމަތިވެފައިވާ ފާޑުކިޔުންތަކާ ހެދި އެވެ. އެންމެ ފަހުން އޭރު ޕީއައިއެފް އިން ނިންމީ ޑީލް އަނބުރާ ގެންދާށެވެ. އެކަމަކު، މި ފަހަރު އެ ޑީލް މި ނިންމައިލީ މީގެކުރިން ހުރި ޗެލެންޖްތަކާ ކުރިމަތިލައި ހައްލު ހޯދައިގެންނެވެ.
ޕްރިމިއާ ލީގުގެ ގިނަ ކްލަބްތަކުން އަންނަނީ ނުސީދާކޮށް ވެސް ނިއުކާސަލްގެ މި ޑީލްގެ ކަންތައްތަކާ މެދު ހިތްހަމަ ނުޖެހުން ފާޅުކުރަމުންނެވެ. އެ ކްލަބްތަކުގެ ތެރޭގައި މެންޗެސްޓާ ޔުނައިޓެޑާއި ލީޑްސް ޔުނައިޓެޑް އަދި އެސްޓަން ވިލާ ހިމެނެ އެވެ.
