ސައުތު އޭޝިއަން ފުޓްބޯލް ފެޑެރޭޝަން (ސާފް)ގެ ފަރާތުން ފުޓްބޯޅައިގެ ތެރެއިން ރައްކާތެރިކަން ކަށަވަރުކުރަން ކުރެވޭ މަސައްކަތުގައި އެކުލަވާލި ސާފް ސޭފްގާޑިން ސްޓިއަރިން ކޮމިޓީ ލީޑުކުރުމުގެ ފުރުސަތު ލިބުނު ރާއްޖޭން ފުރަތަމަ ބައްދަލުވުން މާލޭގައި ކުރިއަށް ގެންގޮސްފި އެވެ.
ރާއްޖޭން ފުރަތަމަ ބައްދަލުވުން ބޭއްވީ މި މަހު 8 އާއި 9 ވަނަ ދުވަހު ހޮޓެލް ޖެންގެ ބޯލް ރޫމުގަ އެވެ.
މި ސެމިނާގައި އެފްއޭއެމްގެ އިތުރުން ސާފް ސަރަހައްދުގެ އެކި ގައުމުތަކުގެ ސޭފްގާޑިން އޮފިސަރުންގެ އިތުރުން އޭއެފްސީގެ އޮފިޝަލުންނާއި އެކި މެމްބަރު އެސޯސިއޭޝަންތަކުގެ އޮފިޝަލުން ބައިވެރިވި އެވެ.
މި ފަދަ ކަަމަކަށް އިސްނެގުމަކީ ރާއްޖެ އާއި ސާފް އިން ދެއްކި ނަމޫނާއެއްގެ ގޮތުގައި އޭއެފްސީގެ ޑެޕިއުޓީ ޖެނެރަލް ސެކްރެޓަރީ ވާހިދު ކަރްދާނީ ވަނީ ފާހަގަކުރައްވައިފަ އެވެ. ފީފާގެ ސޭފްގާޑިން ސީނިއާ އިވެންޓް މެނޭޖަރު ގްލޯރިއާ ވިސޭރަސް ވެސް ވަނީ ސޭފްގާޑިންގެ މަސައްކަތުގައި ސަރަހައްދީ ލެވަލްގައި ރާއްޖޭން އިސްނަގައިގެން މިކުރާ މަސައްކަތަށް ތަރުހީބު ދެއްވައިފަ އެވެ.
"ސޭފްގާޑިން 360" ގެ ނަމުގައި ކުރިއަށްގެންދިޔަ މި ސެމިނާގައި އެކި ގޮތްގޮތުން ރައްކާތެރިކަން ކަށަވަރުކުރަން ކުރިމަތިވާ ޗެލެންޖްތަކާއި އެކަންކަން ހުއްޓުވޭނެ އެކި ގޮތްގޮތް ފުޅާގޮތެއްގައި ވަނީ މަޝްވަރާކޮށްފަ އެވެ.
ފުޓްބޯޅައިގައި ހުރި އެކި ސޭފްގާޑިން މައްސަލަތަކުގައި އަމަލުކުރެވޭނެ ގޮތްތަކާއި ހައްލު ހޯދޭނެގޮތްތައް މި ސެމިނާގެ ބައިވެރިންނަށް ވަނީ ވަރަށް ރަނގަޅަށް އުނގަނައިދެވިފަ އެވެ.
މި ސެމިނާ ކުރިއަށް ގެންދިޔައީ އޭއެފްސީ އާއި ކޮމަންވެލްތުގެ ބައިވެރިވުން ހިމެނޭގޮތަށެވެ. މި ބައްދަލުވުމުގައި ބައިނަލްއަގުވާމީ ގޮތުން ސޭފްގާޑިންގެ ކަންކަން ކުރަމުން އައި ގޮތްގޮތަށް ނަޒަރު ހިންގާލާފައިވާއިރު، ސިޓީ ފުޓްބޯލް ގްރޫޕުން ކަންތައް ކުރާ ގޮތްތައް ވެސް ވަނީ ބަލައިފަ އެވެ. އަދި އާކް އިން ވަނީ އެފްއޭއެމްއާ އެކު ޗައިލް ސޭފްގާޑިން، ކުޑަކުދިންނަށް ފުޓްބޯޅައިގެ ތެެރެއިން ރައްކާތެރިކަން ކަށަވަކުރަން ގެންގުޅޭ ސިސްޓަމް ސެމިނާގެ ބައިވެރިންނަށް ބުނެދީފަ އެވެ.
މި ސެމިނާގައި އެފްއޭއެމްގެ ރައީސް ބައްސާމް އަދީލް ޖަލީލް، ކީޕިން ޗިލްޑްރެން ސޭފްގެ ޔޫކޭގެ ސޭރާ ބްލެކްމޯ، ސިޓީ ފުޓްބޯލް ގްރޫޕްގެ ސޭފްގާޑިން ޑިރެކްޓަރު ނިކް ސްކޮޓް، ކޮމަންވެލްތު އިސް ފަރާތްތަކެއް ވަނީ ބައިވެރިވެވަޑައިގެންފަ އެވެ. އޭގެ އިތުރުން ސާފް ގައުމުތަކުގެ ޓެކްނިކަލް ޑިރެކްޓަރުންނާއި ޖެނެރަލް ސެކްރެޓަރީން ވެސް ބައިވެރިވެފަ އެވެ.
