ބަގްދާދް، އިރާގް (އޮކްޓޯބަރު 11) - އެމެރިކާ އިން ހޯދަމުންދާ އިސްލާމިކް ސްޓޭޓް (އައިއެސް) ޓެރަރިސްޓު ގްރޫޕުގެ މާލީ ވެރިޔާ ސާމީ ޖާސިމް އަލް ޖަބޫރީ އިރާގުން ހައްޔަރުކޮށްފި އެވެ.
އިރާގުގެ ބޮޑު ވަޒީރު މުސްތަފާ އަލް ކަދޭމީ ޓްވިޓާގައި އިއުލާނު ކުރެއްވި ގޮތުގައި އޭނާ ހައްޔަރު ކުރީ އިރާގުގެ ބޯޑަރު ސަރަހައްދުގެ ބޭރުން ޖާސޫސީ އޮފިޝަލުންނެވެ.
އައިއެސްގެ މާލީ ވެރިޔާގެ އިތުރުން އައިއެސްގެ ކުރީގެ ލީޑަރު އަބޫ ބަކުރު އަލް ބަގްދާދީގެ ނައިބުގެ މަގާމުގައި ވެސް ޖަބޫރީ ހުރި ކަމަށް ތުހުމަތުކުރެވެ އެވެ.
ޖަބޫރީ ހައްޔަރު ކުރި ސީދާ ލޮކޭޝަން ހާމަ ނުކުރި ނަމަވެސް ކަދޭމީ ވިދާޅުވީ އޭނާ ހައްޔަރު ކުރުމަށް ބޮޑު "އެކްސްޓާނަލް އޮޕަރޭޝަނެއް" ހިންގަން ޖެހުނު ކަމަށެވެ.
އެމެރިކާ އިން ވަނީ ޖަބޫރީ ހިފައި ހައްޔަރު ކުރާ ފަރާތަކަށް ފަސް މިލިއަން ޑޮލަރުގެ ފައިސާގެ އިނާމެއް ދޭނެ ކަމަށް މީގެ ކުރިން އިއުލާނުކޮށްފަ އެވެ.
އެމެރިކާގެ "ރިވޯޑްސް ފޯ ޖަސްޓިސް" ޕްރޮގްރާމުން ބުނީ އައިއެސްގެ ތެރޭގައި ޖަބޫރީ އަދާކުރީ ފިނޭންސް މިނިސްޓަރާ އެއްވަރުގެ ޒިންމާތަކެއް ކަމަށެވެ. އެގޮތުން ވަގަށް ތެލާއި، ގޭސް، މިނެރަލް އަދި އެހެން ސާމާނު ވިއްކައިގެން ލިބޭ އާމްދަނީ މެނޭޖު ކުރަނީ އޭނާ ކަމަށް ތުހުމަތު ކުރެވެ އެވެ.
ދެހާސް ސާދަ ވަނަ އަހަރުގެ ތެރޭގައި އައިއެސްގެ އިރާގުގެ ބޮޑު ބައެއް ހިފައި، އިރާގާއި ސީރިއާގައި އައިއެސްގެ ދައުލަތެއް ގާއިމްކުރި ކަމަށް އިއުލާނުކުރި އެވެ.
ނަމަވެސް 2017 ވަނަ އަހަރު އިރާގުގެ ފައުޖުން ވަނީ އައިއެސް ބަލިކޮށްފަ އެވެ. އައިއެސްގެ ލީޑަރު ބަގްދާދީ މަރާލީ ހުޅަނގު އުތުރު ސީރިއާގައި އެމެރިކާގެ ހާއްސަ ފައުޖުން ހިންގި އޮޕަރޭޝަނެއްގައި އޮކްޓޯބަރު 2019 ގަ އެވެ.
