އުރީދޫ ސާފް ޗެމްޕިއަންޝިޕްގައި ބުދަ ދުވަހު ކުޅެން ހަމަޖެހިފައިވާ ރާއްޖެ އާއި އިންޑިއާ ބައްދަލުކުރާ މެޗުގެ ޓިކެޓް ވިއްކަން ހަމަޖެހިފައިވަނީ މާދަމާ ކަމަށް އެފްއޭއެމުން ބުނެފި އެވެ.
ސާފް ޗެމްޕިއަންޝިޕްގައި ދެން ބާކީ އޮތީ ތިން މެޗެވެ. އެއީ ލީގު ބުރުގެ ފަހު ދެ މެޗާއި ފައިނަލް މެޗެވެ. ލީގު ބުރުގެ ފަހު ދެ މެޗުގެ ތެރެއިން ބުދަ ދުވަހު ހަވީރު ކުޅޭނީ ބަންގްލަދޭޝް އާއި ނޭޕާލް އެވެ. އަދި އެރޭ ކުޅޭ މެޗުގައި ބައްދަލުކުރާނީ ރާއްޖެ އާއި އިންޑިއާ އެވެ. މިހާރު އޮތްގޮތުން މި ދެ މެޗުން މޮޅުވާ ޓީމެއް ފައިނަލަށް ދާއިރު، ދެ މެޗު ވެސް އެއްވަރުވެއްޖެނަމަ ފައިނަލް ކުޅޭނީ ރާއްޖެ އާއި ނޭޕާލް އެވެ.
އެފްއޭއެމުން މިއަދު ނެރުނު ބަޔާނެއްގައި ބުނެފައިވަނީ ސާފް ޗެމްޕިއަންޝިޕްގައި ބުދަ ދުވަހު ކުޅޭ ދެ މެޗުގެ ޓިކެޓްތައް ވިއްކަން ހަމަޖެހިފައިވަނީ މާދަމާ ކަމަށެވެ.
"ޓިކެޓް ވިއްކާ ގަޑި އާއި ތަން ފަހުން އިއުލާން ކުރެވޭނެ ވާހަކަ ދަންނަވަމެވެ." އެފްއޭއެމުން ބުންޏެވެ.
ރާއްޖެ އާއި ސްރީ ލަންކާ ކުޅުނު މެޗަށް އާއްމުކޮށް ވިއްކަން ހުޅުވާލި ޓިކެޓުތައް ކުޑަވަގުތު ކޮޅެއްގެ ތެރޭގައި ވިކި ހުސްވުމުން ކިޔޫގައި އެތައް އިރެއް ވަންދެން ތިބި މީހުންނަށް ވެސް ޓިކެޓް ނުލިބުނެވެ. އެކަމާ ގިނަ ސަޕޯޓަރުންތަކެއް ހިތްހަމަނުޖެހިގެން ދަނޑުތެރެއަށް ވެސް ވަނެވެ. އަދި މަގުމަތީގައި ނުރުހުމުގެ ޝުއޫރުތައް ވެސް ފާޅުކުރި އެވެ.
އެ ހުރިހާ ކަމަކަށް ބަލައި އެފްއޭއެމުން ވަނީ އިންޑިއާ އާއި ލަންކާގެ މެޗުގެ ހާއްސަ ކެޓަގަރީން 1000 ޓިކެޓް ސަޕޯޓަރުންނަށް ވިއްކައިފަ އެވެ. އެއީ ސްޕޮންސަރުންނާއި ކުޅުންތެރިންގެ އާއިލާ އަށް ހާއްސަކުރި ޓިކެޓްތަކުގެ ތެރެއިންނެވެ. އެ ޓިކެޓްތައް ސަޕޯޓަރުންނަށް ވިއްކީ ސޯޝަލް ސެންޓަރުގަ އެވެ.
ޔޫތު މިނިސްޓަރު އަހުމަދު މަހުލޫފް ވަނީ އެފްއޭއެމާ ވާހަކަ ދައްކައިގެން ޓިކެޓް ވިއްކުމަށް ރަނގަޅު އިންތިޒާމެއް ހަމަޖައްސައިދޭނެ ކަމަށް ވިދާޅުވެފަ އެވެ.
ކޮވިޑް-19ގެ ސަބަބުން އަޅާފައިވާ ފިޔަވަޅުތަކާއި ގަލޮޅު ދަނޑުގެ ސީޓީން ކެޕޭސިޓީ އަށް ބަލާއިރު، މި ފަހަރުގެ މުބާރާތުގެ ކޮންމެ މެޗަކަށް ވެސް ގިނަ ވެގެން ދަނޑަށް ވަދެވޭނީ 5000 މީހުންނަށެވެ.
