ނިއުކާސަލް (އޮކްޓޫބަރު 7) - ސައުދީ އަރަބިއްޔާ ވަލީ އަހުދު މުހައްމަދު ބިން ސަލްމާންގެ ހިއްސާއާ އެކު އިނގިރޭސި ޕްރިމިއާ ލީގުގެ ކްލަބް، ނިއުކާސަލް ޔުނައިޓެޑް ގަންނަން ކުރާ މަސައްކަތް އަލުން ފަށާފައިވާއިރު، އެ ޑީލް ވަރަށް އަވަހަށް ނިމުމުގެ ފުރުސަތު އެބައޮތް ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން މިދިޔަ އަހަރު ނިއުކާސަލް ގަންނަން ހުށަހެޅީ ޕީއައިއެފް އަށް ބޮޑު ހިއްސާއެއް ލިބޭ ގޮތަށް އަމަންޑާ ސްޓަވިލީސްގެ ޕީސީޕީ ކެޕިޓަލް ޕާޓްނާސްގެ ފަރާތުންނެވެ. ހުރިހާ ލިޔެކިއުންތަކެއް ހުށަހަޅައި މަސައްކަތްތައް ކުރިއަށްގެންދިޔަ ނަމަވެސް ތަފާތު ގިނަ ޕްރެޝަރުތަކަކާ ހެދި ޕްރިމިއާ ލީގުން ނިއުކާސަލްގެ އާ ބޯޑު ރަޖިސްޓްރީ ނުކޮށްދިނެވެ. އެއީ މި ޑީލްގައި ސައުދީގެ ބައިވެރިވުން އޮތުމުން ސިޔާސީ ގޮތުންނާއި އެހެނިހެން ގޮތްގޮތުން ކުރިމަތިވެފައިވާ ފާޑުކިޔުންތަކާ ހެދި އެވެ. އެންމެ ފަހުން އޭރު ޕީއައިއެފް އިން ނިންމީ ޑީލް އަނބުރާ ގެންދާށެވެ.
ޕީއައިއެފް އިން މި ފަހަރު ޕްރިމިއާ ލީގަށް ހުށަހެޅި ބޯޑުގައި ވަނީ ސައުދީ ސަރުކާރާ ގުޅޭ އެންމެންގެ ނަން އުނިކޮށްފަ އެވެ. އެހެންވެ، ވަރަށް އަވަހަށް އާ ބޯޑުގެ ރަޖިސްޓްރީ ކަންކަން ނިމޭނެ ކަމަށް ރިޕޯޓްތައް ބުނެ އެވެ.
ސައުދީގެ ހިއްސާ ބޮޑު ބަޔަކަށް ނިއުކާސަލް ވިއްކާނުލަން ޕީއެސްޖީގެ ރައީސް ނާސިރު ހެއްލާފީގެ ބޮޑު ހިއްސާއެއް އޮންނަ މީޑިއާ އެއް ކަމަށްވާ ބީން ސްޕޯޓްސް އިން ވެސް ވަނީ މީގެ ކުރިން ގޮވާލައިފަ އެވެ. ބީން ސްޕޯޓްސް އިން އޭރު ތުހުމަތުކުރި ގޮތުގައި ހޯސްޓް ބްރޮޑްކާސްޓް އެގްރީމެންޓެެއް ނެތި ސައުދީ ސަރުކާރުގެ އިސް މަގާމުތަކުގައި ތިބި އޮފިޝަލުންގެ ހިއްސާ އޮންނަ ގިނަ ކުންފުނިތައް އަޑީގައި އޮވެގެން ޕްރިމިއާ ލީގުގެ މެޗުތައް ސައުދީގައި ދައްކަ އެވެ. އަދި ނިއުކާސަލް ޑީލް ކުރިއަށް ގޮސްފިނަމަ ސައުދީ އޮފިޝަލުން މިކަން ފުޅާ ދާއިރާއެއްގައި ކުރުމުގެ ދޮރު ހުޅުވިގެންދާނެ ކަމަށް ބީން ސްޕޯޓްސް އިން އޭރު ބުނެފައިވެ އެވެ.
ރިޕޯޓްތައް ބުނާގޮތުން ސައުދީން މި ފަހަރު ނިއުކާސަލް ގަންނަން މަސައްކަތް މި ފެށީ ބީން ސްޕޯޓްސްއާ އެކު ވެސް ގިނަ މަޝްވަރާތަކެއް ކުރުމަށް ފަހު އެވެ. އެ ބައްދަލުވުމުގައި ވަނީ ވަގަށް މެޗުތައް ސްޓްރީމް ކުރުން ހުއްޓުވަން ހުރިހާ ފަރާތެއް ގުޅިގެން މަސައްކަތް ކުރުމަށް އެއްބަސްވެފަ އެވެ.
މައިކް އެޝްލީ، 2007 ވަނަ އަހަރު 134 މިލިއަން ޕައުންޑަށް ގަތް ނިއުކާސަލް ސައުދީ ޑީލްގެ ތެރެއިން ވިއްކާލަން ނިންމާފައި އޮތީ 300 މިލިއަން ޕައުންޑަށެވެ. ނިއުކާސަލްގެ މި ޑީލް ކުރިއަށްދާނީ ކްލަބްގައި ޕީއައިއެފްގެ ޗެއާމަންގެ ހައިސިއްޔަތުން ސައުދީގެ ވަލީ އަހުދު މުހައްމަދު ބިން ސަލްމާނަށް 80 ޕަސެންޓް ލިބޭ ގޮތަށެވެ. ބާކީ 20 ޕަސެންޓް ބެހިފައި އޮތީ ދެ ކުންފުންޏަކަށެވެ. އޭގެ ތެރެއިން ކޮންމެ ބަޔަކަށް 10 ޕަސެންޓް ލިބޭނެ އެވެ.
ނިއުކާސަލް ސަޕޯޓަރުންގެ ޓްރަސްޓް ގްރޫޕްގެ ސާވޭ އަކުން ދައްކާ ގޮތުގައި 93 ޕަސެންޓް މީހުން ބޭނުންވަނީ ސައުދީ ޑީލް ކުރިއަށް ދިއުމަށެވެ. ގިނަ ބަޔަކު މައިކް އެޝްލީގެ ލީޑަޝިޕާ މެދު ހިތްހަމަނުޖެހި މިދިޔަ 14 ވަރަކަށް އަހަރު ވަނީ ދަނޑުތެރޭގަޔާއި ދަނޑު ބޭރުގައި އަޑުއުފުލައިފަ އެވެ.
