ގާޒާ ސިޓީ، ފަލަސްތީން (އޮކްޓޯބަރު 6) - ފަލަސްތީނުގެ މަސައްކަތްތެރިން އިޒްރޭލަށް އެތެރެވުމަށް ގާޒާގެ ގޭޓުތައް އަލުން ހުޅުވަން ފެށުމުން އެތައް ހާސް ބަޔަކު ވޯކް ޕާމިޓަށް އެދި ހުށަހަޅައިފި އެވެ.
އުތުރު ގާޒާގައި ހުންނަ ޖަބަލިއާ ރެފިއުޖީ ކޭމްޕަށް އެތައް ހާސް ބަޔަކު ޖަމާވީ ލިޔެކިޔުންތައް ހިފައިގެން، އިޒްރޭލުގައި މަސައްކަތް ކުރަން ބޭނުންވާ ހުއްދަ ހޯދުމަށެވެ.
"ގާޒާގައި އަހަރުމެން ކުރާނެ މަސައްކަތެއް ނެތް،" އުމުރުން 40 އަހަރުގެ ފަތި އަބޫ ނޫރު ބުންޏެވެ.
"އިޒްރޭލަށް މަސައްކަތް ކުރަން ދާން ޕާމިޓަށް އެދި ރަޖިސްޓްރީ ކުރަން ފެށިކަން އަހަންނަށް އެނގުނީ އިއްޔެ. އަހަރެންގެ އުއްމީދަކީ ކަންކަން ރަނގަޅުވުން. މިހާރުގެ ހާލަތު އަހަރުމެންނަށް ވަރަށް އުނދަގޫ.
އިޒްރޭލުގެ ސެކިއުރިޓީ އޮފިޝަލަކު ބުނީ ވޯކް ޕާމިޓް ދޫކުރާނީ ގާޒާގައި އުޅޭ ފަލަސްތީނުގެ 7،000 މީހުންނަށް ކަމަށެވެ. މިދިޔަ އޯގަސްޓު މަހު ވޯކް ޕާމިޓް ދޫކުރީ 5،000 މީހުންނަށެވެ.
މިދިޔަ މޭ މަހު އިޒްރޭލާއި ގާޒާގައި ވެރިކަން ކުރާ ހަމާސްއާ ދެމެދު 11 ދުވަސް ވަންދެން ހަމަލާ ބަދަލު ކުރުމަށް ފަހު، ހަމަލާތައް ހުއްޓާލަން އެއްބަސްވި އެވެ.
އެއަށްފަހު އިޒްރޭލުން ދަނީ އޭރު އެޅި ބައެއް ފިޔަވަޅުތަކަށް މަޑުމަޑުން ލުއިދެމުންނެވެ. އެގޮތުން ބޯޑަރު ކްރޮސިންތައް ހުޅުވައި، މަސް ބާނަން ހާއްސަ ޒޯނު ފުޅާކޮށް، ބައެއް ކަހަލަ މުދާ އެތެރެ ކުރަން ހުއްދަ ދީފައި ވެއެވެ.
ފަލަސްތީނުގެ ގިނަ ބަޔަކު އިޒްރޭލުގައި މަސައްކަތް ކުރަން ބޭނުން ވަނީ އެ ތަނުގައި އެ މީހުންނަށް ލިބޭ އުޖޫރަ މަތިވުމުންނެވެ.
ގާތްގަނޑަކަށް ދެ މިލިއަން މީހުން ދިރިއުޅޭ ގާޒާގެ 50 ޕަސެންޓު މީހުންނަކީ ވަޒީފާ ނުލިބިފައި ތިބި މީހުންނެވެ. ފާއިތުވި 15 އަހަރު އިޒްރޭލުން ވަނީ ގާޒާ ވަށާލައިގެން ބަންދުކޮށްފަ އެވެ.
