ޕެރިސް (އޮކްޓޫބަރު 6) - ކީލިއަން އެމްބާޕޭގެ މުސްތަގުބަލާ ގުޅޭގޮތުން ރެެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް ދެއްކެވި ވާހަކަތަކެއްގެ މައްސަލައިގައި އެމްބާޕޭ މި ވަގުތު ކުޅެމުން އަންނަ ޕީއެސްޖީ ވަރަށް ބޮޑަށް ހިތްހަމަ ނުޖެހިއްޖެ އެެވެ.
މި ސީޒަނުގެ ނިޔަލަށް ޕީއެސްޖީގެ ކޮންޓްރެކްޓްގައި ހުރި އެމްބާޕޭ ހޯދަން ނިމިދިޔަ ޓްރާންސްފާ މާކެޓްގައި ރެއާލުން ވަރަށް މަސައްކަތްކޮށް، ތިން ބިޑެއް ކުރި ނަމަވެސް ޕީއެސްޖީން ދުލެއް ނުދިނެވެ. ދާދި ފަހުން ރެއާލްގެ ރައީސް ޕެރޭޒް ވަނީ "ޖެނުއަރީ މަހުގައި އެމްބާޕޭގެ ހަބަރެއް ރެއާލުން އިއުލާނުކުރާނެ" ކަމަށް ވިދާޅުވެފަ އެވެ.
އެ ވާހަކަތަކާ މެދު ވަރަށް ބޮޑަށް ހިތްހަމަ ނުޖެހުން ފާޅުކޮށް ޕީއެސްޖީގެ ސްޕޯޓިން ޑިރެކްޓަރު ލިއޮނާޑޯ ވަނީ ރެއާލަށް ބަހުގެ ހަމަލާތަކެއް ފޮނުވާލައިފަ އެވެ. ލިއޮނާޑޯ ވަނީ އުސޫލެއް ނެތި އެހެން ކްލަބެއްގެ ކުޅުންތެރިއަކާ ބެހޭގޮތުން ރެއާލުން ވާހަކަ ދައްކާތީ ހައިރާންވާ ކަމަށެވެ.
"އެއް ހަފްތާ ތެރޭގައި މި ފެންނަނީ ރެއާލްގެ ކެޕްޓަން (ބެންޒެމާ) ކޯޗު (އަންޗެލޮޓީ) ދެން އެ މީހުންގެ ރައީސް (ޕެރޭޒް) އެމްބާޕޭގެ ވާހަކަ ދައްކާ މަންޒަރު. އެމްބާޕޭ އަކީ އެ މީހުންގެ އަމިއްލަ ކުުޅުންތެރިއެއްގެ ގޮތުގައި ދެކުމަކީ އަދި ގޯހެއް. މިއީ އެމްބާޕޭ އަށް ވެސް އަދި ޕީއެސްޖީ އަށް ވެސް އިހުތިރާމް ކުޑަކޮށް ކުރާކަމެއް،" ލިއޮނާޑޯ ބުންޏެވެ.
ލިއޮނާޑޯގެ މި ވާހަކަތަކަށް ފަހު ޕެރޭޒް ވަނީ ސްޕެއިން ނޫހެއް މެދުވެރިކޮށް އޭނާ ދެއްކެވި ވާހަކަތައް އޮޅުން ފިލުވައިދީފަ އެވެ.
ޕެރޭޒް ވިދާޅުވީ އޭނާ ދެއްކި ވާހަކަތައް މީޑިއާގައި އޮތީ އޮޅުވާލެވިފައި ކަމަށެވެ. އަދި ޖެނުއަރީ މަހު އެމްބާޕޭގެ ހަބަރެއް ލިބޭނެ ކަމަށް ނުބުނާ ކަމަށާއި ދެއްކީ އަންނަ އަހަރު އެމްބާޕޭގެ މައްސަލައިގައި ހައްލެއް ލިބޭނެ ކަމުގެ ވާހަކަ ކަމަށެވެ. އެއީ އޭނާގެ ކޮންޓްރެކްޓް އޮތީ އަންނަ އަހަރު ޖޫންގެ ނިޔަލަށް ކަމަށްވާތީ އެވެ.
ފްރާންސްގެ ނޫހަކަށް ދިން އިންޓަވިއުއެއްގައި އެމްބާޕޭ ވަނީ މި ފަހަރުގެ ޓްރާންސްފާ މާކެޓްގައި ޕީއެސްޖީ ދޫކޮށްލަން ނިންމީ އެ ޓީމަށް ރަނގަޅަކަށް ކަންތައް ކުރުމުގެ ވިސްނުމުގައި ކަމަށް ބުނެފަ އެވެ. އެއީ މި ވަގުތު އޭނާ ވިއްކާލައިގެން ޕީއެސްޖީ އަށް ލިބޭ ފައިސާއިން އާ ކުޅުންތެރިއަކު ގަނެވޭނެތީ އެވެ.
ރިޕޯޓްތައް ބުނާގޮތުން ޖެނުއަރީ މަހު އެމްބާޕޭ، ރެއާލާ އެެކު ޕްރީ އެގްރިމެންޓެއްގައި ސޮއިކުރުމުގެ ފުރުސަތު ބޮޑެވެ. އެއީ ޖުލައި އެއް ވަނަ ދުވަހު އެ ޓީމާ ގުޅޭ ގޮތަށެވެ. ޕީއެސްޖީން އެމްބާޕޭ ވިއްކާލައިގެން ޓްރާންސްފާ ފީއެއް ހޯދާނަމަ އެންމެ ލަސްވެގެން އޭނާ ޖެނުއަރީ 31 ކުރިން ވިއްކާލަން ޖެހޭނެ އެވެ. ނޫނީ މި ސީޒަން ނިމުމުން އެމްބާޕޭ ޕީއެސްޖީ ދޫކޮށްލާނީ ހިލޭ އެވެ.
