ސްޓެލްކޯގެ ވިޔަފާރި ފުޅާކުރަން އެ ކުންފުނިން މުސްތަގުބަލަށް ރާވާފައިވާ ކަންކަމުގެ ތެރޭގައި ކަރަންޓުން ދުވާ (އިލެކްޓްރިކް) ކާރު އުފައްދައިގެން ރާއްޖޭގެ ބާޒާރަށް ނެރެން ބޭނުންވާ ކަމަށް އެ ކުންފުނީގެ މެނޭޖިން ޑިރެކްޓަރު ހަސަން މުގުނީ ވިދާޅުވެއްޖެ އެވެ.
މުގުނީ މިކަން ހާމަކުރެއްވީ ސްޓެލްކޯއިން ކަރަންޓު އުފައްދާ ނިޒާމުތަކާއި ޖަނަރޭޓަރުތަކާއި ގުޅޭ ހިދުމަތްތައް ދޭން ހުޅުވި ސްޓެލްކޯ ވާކްޝޮޕް "ސްޓެވޯ" އިފްތިތާހުކުރަން އިއްޔެ ރޭ ބޭއްވި ހަފުލާގަ އެވެ.
"އަޅުގަނޑުމެން ބޭނުންވަނީ ތިމާވެއްޓާ ރަށްޓެހި އިލެކްޓްރިކް ވެހިކަލްތަކެއް ރާއްޖޭގައި އެސެމްބްލް ކުރަން" މުގުނީ ވިދާޅުވި އެވެ.
މި ހަފުލާގައި ސީދާ ތާރީހެއް ހާމަނުކުރެއްވި ނަމަވެސް ކަރަންޓު ކާރު އެސެމްބްލީ ދާދި އަވަހަށް ފަށާނެ ކަމަށް އޭނާ ވިދާޅުވި އެވެ.
ސްޓެލްކޯއިން މި ކާރުތައް އުފައްދަނީ ބޭރުން ބައިތައް ގެނެސްގެން ރާއްޖޭގައި އެސެމްބްލް ކުރާ ގޮތަށެވެ. މުގުނީ ވިދާޅުވީ މި ކާރުތައް ފަރުމާކުރަނީ ރާއްޖޭގެ ވެއްޓަށާއި މަގުތަކަށް ހާއްސަކޮށްގެން ކަމަށެވެ. އަދި މިއީ ދަތުރުފަތުރުގެ މުސްތަގުބަލަށް ތިމާވެއްޓާ ރައްޓެހި ހައްލެއް ކަމަށް އޭނާ ވިދާޅުވި އެވެ.
ކަރަންޓުން ދުވާ ކާރު އުފެއްދުމާ ގުޅޭ ޕްލޭންތަކުގެ އިތުރު ތަފުސީލިތަކެއް ސްޓެލްކޯއިން ހިއްސާކޮށްފައެއް ނުވެ އެވެ. އަދި މިކަމަށް ފައިސާ ހޯދާނެ ގޮތްތަކާއި ޕްލޭންގެ ފީސިބިލިޓީއެއް ނޭނގެ އެވެ.
އިލެކްޓްރިކް ވެހިކަލް އުފެއްދުން: ފުޅާވަމުން އަޔަސް، ގޮންޖެހުން ބޮޑު ސިނާއަތެއް
ސްޓެލްކޯއިން މުސްތަގުބަލުގައި މި ސިނާއަތަށް ނުކުންނަން ވިސްނުން ހުރި ނަމަވެސް، މިހާރުވެސް ކަރަންޓުން ދުވާ ކާރު އުފެއްދުމުގެ ސިނާއަތަކީ ގޮންޖެހުން ބޮޑު ސިނާއަތެކެވެ. އަދި އަހަރުން އަހަރަށް މިފަދަ ކާރުތައް ވިކޭ އަދަދުތައް އިތުރުވި ނަމަވެސް ބެޓަރި ފަދަ ސާމާނުތަކުގެ އަގު ބޮޑުކަމުން މަދު ކުންފުންޏަކަށް ނޫނީ މި ވިޔަފާރިން ފައިދާ ނުވެ އެވެ.
އޭގެ އިތުރުން ކަރަންޓު ވެހިކަލްތަކަށް ބޭނުންވާ ޗާޖިން ޕޯޓުތަކާއި އެހެނިހެން އިންފްރާސްޓްރަކްޗާ ގާއިމުކުރުމުގައި ހުރި އުނދަގޫތަކުގެ ސަބަބުން ވެސް މި ސިނާއަތަށް ވަނީ ހުރަސްތަކާ ކުރިމަތިލާން ޖެހިފަ އެވެ.
