މިހާރު ކުރިއަށްދާ އުރީދޫ ސާފް ޗެމްޕިއަންޝިޕްގައި ރާއްޖޭގެ ގައުމީ ފުޓްބޯޅަ ޓީމުން ބޭނުންކުރާ އޮފިޝަލް ޖޯޒީ، ހުއްދަ ނެތް ފަރާތްތަކުން ނުވިއްކުމަށް އެފްއޭއެމުުން އެދިއްޖެ އެވެ.
ސާފް ޗެމްޕިއަންޝިޕްގެ އޮފިޝަލް ޖޯޒީ ވިއްކުމުގެ ކަންކަން އެފްއޭއެމުން ކޮންޓްރެކްޓެއްގެ ދަށުން ހަވާލުކޮށްފައިވަނީ އައިލެންޑް އެޕެރަލްސްއާ އެވެ. މިއީ މި ފަހަރުގެ ސާފް ޗެމްޕިއަންޝިޕަށް ގައުމީ ޓީމުގެ ޖޯޒީ ދިވެހިވަންތަ ގޮތަކަށް ތައްޔާރުކޮށް ހާއްސަ ޖޯޒީއެއް ލައިގެން އަމިއްލަ ފަސްގަނޑުގައި މުބާރާތް ކުޅުމުގެ ބޭނުމުގައި ނިންމި ނިންމުމެކެވެ.
މައުލޫމާތު ލިބިފައިވާ ގޮތުގައި ގައުމީ ޓީމުގެ އޮފިޝަލް ޖޯޒީ ހުރި ޑިޒައިނަށް ފަރުމާކޮށް އެހެން ފަރާތްތަކުން ވެސް އަންނަނީ ޖޯޒީ ވިއްކަމުންނެވެ.
އެފްއޭއެމުން ރޭ ނެރުނު ބަޔާނުގައި ބުނެފައިވަނީ އެ އެސޯސިއޭޝަންގެ ފަރާތުން ސާފް ޗެމްޕިއަންޝިޕްގައި ބޭނުންކުރަން ތައްޔާރުކޮށްފައިވާ އޮފިޝަލް ޖޯޒީ އަކީ ވަކި އެއްބަސްވުމެއްގެ ދަށުން ވަކި ބަޔަކަށް ރައިޓްސް ދީގެން ވިއްކުމަށް ހުއްދަދީފައިވާ ޖޯޒީ އެއް ކަމަށެވެ.
"އެ ޖޯޒީ ވިއްކުމުގެ ހުއްދަ ދީފައިވާ ފަރާތް ފިޔަވައި އެހެން ފަރާތަކުން އޮފިޝަލް ޖޯޒީ ވިއްކުން ހުއްޓާލުމަށް ތިޔަ އެންމެހާ ފަރާތްތަކަށް އިލްތިމާސްކުރަމެވެ،" އެފްއޭއެމުން ރޭ ނެރުނު ބަޔާނުގައިވެ އެވެ.
އެފްއޭއެމުން ބުނީ ކޮޕީރައިޓް ގާނޫނުގައި ބަޔާން ކުރާ ހަމަތަކާ ހިލާފަށް އެފްއޭއެމްގެ ހުއްދަ ނެތި ގައުމީ ޓީމުގެ އޮފިޝަލް ޖޯޒީ ވިއްކަމުންދާ ނަމަ އެފަދަ ފަރާތްތަކާ ދެކޮޅަށް އެފްއޭއެމުން ގާނޫނީ ހައްލު ހޯދާނެ ކަމަށެވެ.
"ވީމާ މި އެސޯސިއޭޝަންގެ ފަރާތުން އެދެނީ ހުއްދަނެތި ވިއްކަމުންދާ ސާފް ޗެމްޕިއަންޝިޕް މުބާރާތުގައި ބޭނުންކުރުމަށް، ފަރުމާކޮށްފައިވާ އޮފިޝަލް ޖޯޒީ ވިއްކުމަށް ބޭނުންވަނަމަ ހަމަޖެހިފައިވާ އުސޫލާ އެއްގޮތަށް ތިޔަ އެހެންމެހާ ފަރާތްތަކުން އަމަލުކޮށް ދެއްވުމަށެވެ." އެފްއޭއެމްގެ ބަޔާނުގައިވެ އެވެ.
ގައުމީ ޓީމުން ބޭއްވި ޕްރެކްޓިހެއް ފެށުމުގެ ކުރިން: (ކ.ވ) ދަަގަނޑޭ، އީސަ، އުމެއިރު އަދި ސެންޓޭ.-- ފޮޓޯ: ހުސެއިން ޝަޔާހު/ އަދަދު
އައިލެންޑް އެޕަރަލްސް އިން ވަނީ ގައުމީ ޓީމު ބޭނުންކުރާ އޮފިޝަލް ޖޯޒީ އަށް އޯޑާ ކުރަން ބޭނުންވާ ފަރާތްތަކަށް އެ ފުރުސަތު ހުޅުވާލައިފަ އެވެ. އަދި ޖޯޒީ ގަންނަން ބޭނުންވާ ފަރާތްތަކުން 9721111 އަށް ވައިބާ ކުރުމަށް އައިލެންޑް އެޕެރަލްސް އިން އެދެ އެވެ.
ސާފް ޗެމްޕިއަންޝިޕްގައި ގައުމީ ފުޓްބޯޅަ ޓީމުން ބޭނުންކުރާ ޖޯޒީގެ ހުރިހާ މަސައްކަތެއް ކުރާނީ ރާއްޖޭގައި ކަމަށް އައިލެންޑް އެޕަރަލްސް އިން މައުލޫމާތު ދެ އެވެ. ގައުމީ ޓީމުގެ ޖޯޒީ ޑިޒައިންކޮށްފައިވަނީ ޑިޒައިނަރު، ޢަބްދުﷲ ނަޝާތު އެވެ.
މީގެ ކުރިން ގައުމީ ޓީމުން ރާއްޖޭގައި ކުޅުނު އެކި މުބާރާތްތަކުގެ ޖޯޒީގެ ޑިމާންޑް ވަރަށް ބޮޑުވި އެވެ. އެ ގޮތުން 2008 ވަނަ އަހަރުގެ ސާފް ޗެމްޕިއަންޝިޕްގެ ޖޯޒީ އާއި 2014 ވަނަ އަހަރުގެ އޭއެފްސީ ޗެލެންޖް ކަޕްގައި ގައުމީ ޓީމުން ބޭނުންކުރި ޖޯޒީ ގިނަ ބަޔަކު ވަނީ ގަނެފަ އެވެ.
މި ފަަހަރުގެ މުބާރާތުގައި އެކި ކުންފުނިތަކާއި ސަޕޯޓަރުންގެ ގްރޫޕްތަކުން ވެސް ވަނީ ހާއްސަ ޖޯޒީތަކެއް އެކި ޑިޒައިންތަކަށް ފަރުމާކޮށްފަ އެވެ. އެ ގޮތަށް ފަރުމާކޮށްފައިވާ ޖޯޒީތަކުގެ ޑިމާންޑް ވެސް ވަރަށް ބޮޑެެވެ.
