ލިވަޕޫލް (އޮކްޓޫބަރު 3) - އިނގިރޭސި ޕްރިމިއާ ލީގުގެ އެންމެ ފަހު ދެ ސީޒަން ޗެމްޕިއަނުން ކަމަށްވާ، ލިވަޕޫލާއި މެންޗެސްޓާ ސިޓީ ކުޅުނު މެޗު 2-2 އިން އެއްވަރުވެ، ދެ ޓީމަށް ޕޮއިންޓަކުން ފުއްދާލަން ޖެހިއްޖެ އެވެ.
މި ނަތީޖާއާ އެކު އެންމެ ބޮޑު ހިތްހަމަ ޖެހުމެއް ލިބޭނީ އެއް ވަނައިގައި އޮތް ޗެލްސީ އަށެވެ. ބައިނަލްއަގުވާމީ މެޗުތަކަށް ލީގު މެދުކަނޑާލާއިރު، ޗެލްސީ އެއް ވަނައިގައި އޮތީ އެއް ޕޮއިންޓުގެ ލީޑަކާ އެކު އެވެ.
އެއް ވަނައިގައި އޮތް ޗެލްސީ އަށް ހަތް މެޗުން 16 ޕޮއިންޓް ލިބިފައިވާއިރު، ލިވަޕޫލް ދެ ވަނައިގައި އޮތީ ހަތް މެޗުން 15 ޕޮއިންޓް ހޯދައިގެންނެވެ. ތިނެއްގައި އޮތް ސިޓީ އަށް ވަނީ ހަތް މެޗުން 14 ޕޮއިންޓް ލިބިފަ އެވެ. ސިޓީއާ އެއްވަރަށް ތިން ޓީމަކުން ވަނީ 14 ޕޮއިންޓް ހޯދައިފަ އެެވެ. އެއީ މެންޗެސްޓާ ޔުނައިޓެޑާއި އެވަޓަން އަދި ބްރައިޓަން އެވެ.
ލިވަޕޫލްގެ އެންފީލްޑް ސްޓޭޑިއަމްގައި މިރޭ ކުޅުނު މެޗު ފަށައިގެން ލިވަޕޫލުން 15 ވަރަކަށް މިނިޓަށް ކުރިއަށް ޖެހިގެން ކުޅުނު ނަމަވެސް ފުރަތަމަ ހާފްގެ ބާކީ އެއްކޮށް ސިޓީން ވަނީ މެޗުގެ ކޮންޓްރޯލް ނަގައިގެން ކުޅެފަ އެވެ. ސިޓީގެ ފިލް ފޯޑެން ޖެހި ބޯޅައެއް ލިވަޕޫލްގެ ކީޕަރު އެލިސަން ބެކާ މަތަކުރިއިރު، ކެވިން ޑިބްރޭނާ ބޮލުން ޖެހި ބޯޅަ ދިޔައީ ހުރަސްދަނޑި މަތިންނެވެ.
ދެ ވަނަ ހާފް ފެށިގެން ލިވަޕޫލުން ކުޅުން ރަނގަޅުކުރި އެވެ. ނަތީޖާ އަކަށްވީ މެޗުގެ 59 ވަނަ މިނިޓްގައި ސަޑިއޯ މާނޭ އެ ޓީމަށް ލީޑުނަގައިދިނުމެވެ. މުހައްމަދު ސަލާހު ހުސްކޮށްލާފައި މާނޭ އަށް ދިން ބޯޅަ އޭނާ ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ. ސިޓީން ނަތީޖާ ހަމަހަމަކުރީ އޭގެ 10 މިނިޓް ފަހުން ފޯޑެން ޖެހި ގޯލުންނެވެ. ގަބްރިއެލް ޖީސޫސް ދިން ބޯޅަ ކޮންްޓްރޯލް ކޮށްލުމަށް ފަހު ފޯޑެން ވަނީ ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
ސިޓީގެ ފޯޑެން (މ) ލިވަޕޫލް ގޯލަށް ބޯޅަ ފޮނުވާލަނީ.-- ފޮޓޯ: އޭއެފްޕީ
ލިވަޕޫލުން ދެ ވަނަ ފަހަރަށް ލީޑުނެގީ ސަލާހު ޖެހި މޮޅު ގޯލުންނެެވެ. މެޗުގެ 76 ވަނަ މިނިޓްގައި ސިޓީގެ ތިން ކުޅުންތެރިން ކައިރިން ނައްޓާފައި ގޮސް ސަލާހު ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ. މިއީ މި ފަހަރުގެ ސީޒަނުގައި މިހާތަނަށް ފެނުނު އެންމެ މޮޅު އިންޑިވިޖުއަލް ގޯލެވެ.
އެކަމަކު، އެ ލީޑު ވެސް ހިފެހެއްޓުނީ ފަސް މިނިޓް ވަންދެނެވެ. ޑި ބްރޭނާ އޭރިއާތެރެއިން ޖެހި ޝޮޓް ލިވަޕޫލްގެ ޖޮއެލް މަޓިޕް ގައިގައި ޖެހިފައި ވަނީ ގޯލަށް ވަދެފަ އެވެ.
މެޗުގައި ތިން ވަނަ ފަހަރަށް ލިވަޕޫލަށް ލީޑުނަގައިދޭން ފަބީނިއޯ އަށް ރަނުގެ ފުރުސަތެއް ލިބުނެވެ. ހިލޭ ޖެހުމަކުން އަވަހަށް ކުޅުމަށް ފަހު ސަލާހު އޭރިއާތެރެއަށް މަތިން ހުރަސްކޮށްލި ބޯޅަ ފަބީނިއޯ އަށް ލިބުނުއިރު، އޭނާ ހުސްކޮށް އޮތް ގޯލުގެ ތެރެއަށް ފޮނުވާލި ބޯޅަ ސިޓީގެ ރޮޑްރީ ވަނީ ސަލާމަތްކޮށްފަ އެވެ.
މި މެޗުގެ ދެ ވަަނަ ހާފްގައި ސިޓީގެ ކޯޗު ޕެޕް ގާޑިއޯލާ ވަނީ ރެފްރީ ޕޯލް ޓިއޭނީގެ ނިންމުންތަކާ މެދު ތަކުރާރުކޮށް ހިތްހަމަނުޖެހުން ފާޅުކޮށްފަ އެވެ. ގާޑިއޯލާ އެންމެ ބޮޑަށް ހިތްހަމަ ނުޖެހުނީ ލިވަޕޫލްގެ ޖޭމްސް މިލްނާ އަށް ދެ ވަނަ ރީނދޫ ކާޑު ނުދެއްކުމުންނެވެ. ގާޑިއޯލާ އަށް ވަނީ ރީނދޫ ކާޑެއް ދައްކައިފަ އެވެ.
ލީގުގައި މިރޭ ކުޅުނު އެހެން މެޗުތަކަށް ބަލާއިރު، ތިން މެޗަށް ފަހު ޓޮޓެންހަމް ވަނީ މޮޅެއް ހޯދައިފަ އެވެ. އެސްޓަން ވިލާ އަތުން ޓޮޓެންހަމް މޮޅުވީ 2-1 އިންނެެވެ. ލެސްޓާ ސިޓީން ދެ ގޯލުގެ ލީޑެއް ނަގާފައިވަނިކޮށް ކްރިސްޓަލް ޕެލަސް އިން ވަނީ 2-2 އިން އެއްވަރުކޮށްފަ އެވެ. ވެސްޓް ހޭމް ދަނޑުގައި ބްރެންޓްފޯޑް ވަނީ އިތުރު ވަގުތު ޖެހި ގޯލާ އެކު 2-1 އިން މޮޅުވެފަ އެވެ.
