ރިޔާދް، ސައުދީ އަރަބިއްޔާ (އޮކްޓޯބަރު 3) - ބޮޑެތި މައްސަލަތަކަށް ހައްލު ހޯދަން ވާދަވެރި ސައުދީ އަރަބިއްޔާ އާއި އިރާނުން މަޝްވަރާކޮށްފި އެވެ.
މެދުއިރުމަތީގައި ހިނގާ ހަމަނުޖެހުންތަކުގައި ސުންނީ ސައުދީ އަރަބިއްޔާ އާއި ޝިއައީ އިރާނުގެ ވިސްނުން އެއް ގޮތެއް ނޫނެވެ. ދެ ގައުމުން ވަނީ 2016 ވަނަ އަހަރު ގުޅުން ކަނޑާލައިފަ އެވެ.
ސައުދީ ފޮރިން މިނިސްޓަރު އަމީރު ފައިސަލް ބިން ފަރްހާދް އާދީއްތަ ދުވަހު ވިދާޅުވީ އޭޕްރިލް މަހު ފެށި މަޝްވަރާތަކުގެ ހަތަރު ވަނަ ބުރު ނިމުނީ ސެޕްޓެމްބަރު 21 ގައި ކަމަށެވެ.
"މި މަޝްވަރާތައް އަދިވެސް އޮތީ އަޖުމަ ބެލުމުގެ މަރުހަލާގައި. އަޅުގަނޑުމެންގެ އުއްމީދަކީ ދެ ފަރާތުގެ މެދުގައިވާ ހިޔާލު ތަފާތުވުންތައް ހައްލު ކުރަން އެޅޭ ބިންގަލަކަށް މި މަޝްވަރާތައް ވާނެ ކަމަށް،" ޔޫރަޕިއަން ޔޫނިއަން (އީޔޫ) ގެ ފޮރިން ޕޮލިސީ ޗީފް ޖޮސެޕް ބޮރެލްއާ އެކު އޮތް ޕްރެސް ކޮންފެރެންސެއްގައި ފައިސަލް ވިދާޅުވި އެވެ.
މަޝްވަރާތައް ބޭއްވި ތަނަކާއި ބައިވެރިވި ފަރާތްތަކުގެ ތަފްސީލް އޭނާ ހާމައެއް ނުކުރައްވަ އެވެ. ބޮރެލް ވިދާޅުވީ އިރާނާއި ސައުދީ އަރަބިއްޔާގެ މަޝްވަރާތަކަށް މަރުހަބާ ކިޔާ ކަމަށެވެ.
އިރާގުގެ މަސްދަރުތަކުން މިދިޔަ މަހު ބުނީ އިރާނާއި ސައުދީގެ އޮފިޝަލުން ބަގުދާދުގައި ބައްދަލުކުރި ކަމަށެވެ.
މެދުއިރުމަތީގެ މައްސަލަތަކުގައި ސުލްހައިގެ މެދުވެރިއެއްގެ ގޮތުގައި މަސައްކަތް ކުރަން އިރާގުން ބޭނުންވެ އެވެ. އިރާގުގައި ފެށި މަޝްވަރާތައް ލޯންޗުކުރީ އިރާނުގެ ކުރީގެ ރައީސް ހަސަން ރޫހާނީގެ ވެރިކަމުގަ އެވެ. މިދިޔަ އޯގަސްޓު މަހުން ފެށިގެން އެ ގައުމުގައި ވެރިކަން ކުރައްވަނީ ރައީސް، އިބްރާހިމް ރައިސީ އެވެ.
އިރާން ފޮރިން މިނިސްޓްރީގެ ތަރުޖަމާނު ސައީދް ހާތިބްޒާދޭ ސެޕްޓެމްބަރު 23 ވަނަ ދުވަހު ވިދާޅުވީ މަޝްވަރާތަކުގެ ސަބަބުން ގަލްފުގެ ސެކިއުރިޓީއާ ގުޅޭ ކަންކަމުގައި "ސީރިއަސް ކުރިއެރުންތަކެއް" ލިބިފައިވާ ކަމަށެވެ.
އިރާނާއި ސައުދީ އަރަބިއްޔާ އިން ދެބަސްވާ ގިނަ ކަންކަމުގެ ތެރޭގައި ޔަމަނާއި ސީރިއާގެ ހަނގުރާމަ ހިމެނެ އެވެ.
ބޮރެލް ވިދާޅުވީ އޭނާ ސައުދީ އަރަބިއްޔާ އަށް ކުރައްވަމުން ގެންދަވާ ދަތުރުގައި ޔަމަނުގެ ހާލަތާ ގުޅޭ ކަންކަމުގައި މަޝްވަރާ ކުރައްވާނެ ކަމަށާއި ޔަމަނުގެ ރައީސް މަންސޫރު ހާދީއާ ބައްދަލުކުރައްވާނެ ކަމަށެވެ.
"ޔަމަނުގައި ހިނގަމުންދާ ކަންކަމަކީ އެ ގައުމުގެ ރައްޔިތުންނަށް ބޮޑު ހިތާމައެއް. އޭގެ އަސަރު މުޅި ސަރަހައްދަށް ވަނީ ކޮށްފައި،" ބޮރެލް ވިދާޅުވި އެވެ.
ޔަމަނު ހަނގުރާމައިގެ ތެރެއަށް ސައުދީ އަރަބިއްޔާ އިން ވަނީ 2015 ވަނަ އަހަރުގެ ތެރޭގައި ބައިނަލްއަގްވާމީ މުޖުތަމައު ބަލައިގަންނަ ޔަމަނުގެ ގާނޫނީ ސަރުކާރުގެ ފަރާތުންނެވެ. އޭގެ ދުވަސްކޮޅޭއް ކުރިން އިރާނުގެ ތާއީދާއެކު އުޅޭ ހޫތީ ހަނގުރާމަވެރިން ވަނީ ވެރިރަށް ސަނާ ހިފާފަ އެވެ.
ހޫތީ ހަނގުރާމަވެރިން އަންނަނީ ބޯޑަރު ހުރަސްކޮށް ތަކުރާރުކޮށް ސައުދީ އަރަބިއްޔާ އަށް ހަމަލާތައް ފޮނުވަމުންނެވެ.
ޔަމަނުގެ ހަމަނުޖެހުމުގައި އެތައް ހާސް ބަޔަކު މަރުވެ، އެތައް މިލިއަން ބަޔަކު ރެފިއުޖީންނަށް ވެފައި ވާއިރު، އެއީ ދުނިޔެއަށް ދިމާވެފައިވާ އެންމެ ބޮޑު އިންސާނީ ކާރިސާގެ ގޮތުގައި އދ. އިން ސިފަކުރެ އެވެ.
ހަނގުރާމަ ނިމުމަކަށް ގެނައުމަށް އދ. އިން ޕްރެޝަރު ކުރަމުން ދާއިރު، ހޫތީން ބުނީ ސުލްހައިގެ މަޝްވަރާއަށް އިށީންނާނީ ސަނާ އެއާޕޯޓު އަލުން ހުޅުވުމުން ކަމަށެވެ. ދެހާސް ސޯޅަ ވަނަ އަހަރުން ފެށިގެން ސައުދީ އަރަބިއްޔާ އިން ވަނީ އެ އެއާޕޯޓު އޮޕަރޭޓް ނުކުރެވޭ ގޮތް ހަދާފަ އެވެ.
