ގުދުސް (އޮކްޓޯބަރު 3) - މިސްރުގެ ގައުމީ އެއާލައިން، އިޖިޕްޓުއެއާގެ ލޯގޯ ޖެހި ފްލައިޓެއް ފުރަތަމަ ފަހަރަށް އިޒްރޭލުގެ ފަސްގަނޑަށް ޖައްސައިފި އެވެ.
އިޒްރޭލުގެ އެއާޕޯޓްސް އޮތޯރިޓީން އެކަން ސިފަކުރީ "ތާރީހީ" ދަތުރެއްގެ ގޮތުގަ އެވެ.
އަރަބި ގައުމުތަކުގެ ތެރެއިން އިޒްރޭލާއެކު އެންމެ ފުރަތަމަ ގުޅުން ގާއިމް ކުރީ މިސްރުންނެވެ. ދެ ގައުމުން 1979 ގައި ސޮއިކުރި ސުލްހައިގެ އެއްބަސްވުމުގެ ދަށުން ސީދާ ދަތުރުތައް ވެސް ފެށި އެވެ.
ނަމަވެސް މީގެ ކުރިން މިސްރުން އިޒްރޭލަށް ދަތުރު ކުރީ އިޖިޕްޓުއެއާގެ ސަބްސިޑަޔަރީ ކުންފުނީ އެއާ ސައިނާ އިން އެކަންޏެވެ. އެ ކުންފުންޏަކީ އިޒްރޭލު ރޫޓަށް ހާއްސަކޮށް އުފެއްދި ކުންފުންޏެކެވެ.
އިޒްރޭލުގެ އެއާޕޯޓްސް އޮތޯރިޓީގެ ތަރުޖަމާނު އޯފާ ލެފްލާ ވިދާޅުވީ މިއަދުން ފެށިގެން އިޖިޕްޓުއެއާގެ ހަތަރު ފްލައިޓު ކޮންމެ ހަފުތާއަކު ވެސް އިޒްރޭލަށް ދަތުރު ކުރާނެ ކަމަށެވެ.
މިސްރުގެ ގައުމީ އެއާލައިނުން އިޒްރޭލަށް ދަތުރު ފަށާފައި މި ވަނީ އިޒްރޭލުގެ ބޮޑު ވަޒީރު ނަފްތާލީ ބެނެޓް މިދިޔަ މަހު މިސްރަށް ވަޑައިގެން އެ ގައުމުގެ ރައީސް އަބްދުލް ފައްތާހް އަލް ސިސީއާ ބައްދަލުކުރައްވާފައި ވަނިކޮށެވެ.
އެ ދަތުރާ ގުޅޭ ގޮތުން ބެނެޓް ވިދާޅުވީ ދެ ލީޑަރުން އެއްބަސްވީ "މުސްތަގްބަލުގައި ގުޅުން ދަމަހައްޓަން ބޭނުންވާ ބިންގާ އެޅުމަށް" ކަމަށެވެ.
ކޮންމެ އަހަރަކު ވެސް އެތައް ހާސް އިޒްރޭލް ފަތުރުވެރިން މިސްރަށް ދަތުރުކުރެ އެވެ. މިސްރުގެ މަގްބޫލް ރެޑް ސީ ރިސޯޓުތަކާއި ސައިނާގެ ސަހަރާތަކަށް އެ މީހުން ޒިޔާރަތް ކުރެ އެވެ.
މިސްރަށް ފަހު އިތުރު ފަސް އަރަބި ގައުމަކުން ވަނީ އިޒްރޭލާއެކު ގުޅުން ގާއިމްކޮށްފަ އެވެ. އެއީ 1994 ވަނަ އަހަރު އުރުދުން އާއި 2020 ވަނަ އަހަރު ޔޫއޭއީ، ބަހްރެއިން، ސޫދާން އަދި މޮރޮކޯ އެވެ.
