ގުދުސް (އޮކްޓޯބަރު 3) - އިޒްރޭލުގެ ހައި ސެކިއުރިޓީ ޖަލަކުން ފިލި ފަލަސްތީނުގެ ހަ މީހުންނާ ދެކޮޅަށް ދައުވާ އުފުލާފައިވާ ކަމަށް އިޒްރޭލުގެ ޖަސްޓިސް މިނިސްޓްރީން ބުނެފި އެވެ.
އެ މިނިސްޓްރީގެ ބަޔާނެއްގައި ބުނީ ގިލްބޯއާ ޖަލުން ފިލިކަމުގެ ދައުވާ ހަ މީހަކަށް އުފުލާފައިވާ ކަމަށާއި އިތުރު ފަސް މީހުންގެ މައްޗަށް އުފުލީ އެ މީހުންނަށް އެހީވިކަމުގެ ދައުވާ ކަމަށެވެ.
ފިލި ހަ ގައިދީންގެ ތެރެއިން އެކަކު ނިސްބަތްވަނީ ފަތަހް ޖަމާއަތަށެވެ. އަނެއް ފަސް މީހުންނަކީ އިސްލާމިކް ޖިހާދު ގްރޫޕުގެ މެމްބަރުންނެވެ. އެންމެން ވެސް ބަންދުކޮށްފައި ތިބީ ޔަހޫދީ ދައުލަތަށް ހަމަލާދިންކަމުގެ ތުހުމަތަށެވެ.
ދައުވާ ޝީޓުގައިވާ ގޮތުން 2020 ވަނަ އަހަރުގެ ފަހުކޮޅު އެ މީހުން ވަނީ ޖަލުގޮޅީގެ ފާހާނާގެ ސިންކު ދަށުން ބިމު އަޑީގެ ބިންގަރާހެއް ކޮންނަން ފަށާފަ އެވެ.
"ތުހުމަތުވާ މީހުން ކޮންމެ ދުވަހަކު ވެސް ޝިފްޓުތަކަށް ބަހައިގެން ކޮނުމުގެ މަސައްކަތް ކުރި،" ދައުވާ ޝީޓުގައި ބުނެފައި ވެ އެވެ.
ފިލި ހަ ގައިދީންގެ ތެރޭގައި ހިމެނޭ މަހްމޫދު އަބްދުﷲ އަރްދާހް ހައްޔަރު ކުރުމުން ބުނެފައި ވަނީ ކޮނުމަށް ބޭނުން ކުރީ ސަމުސަލާއި ތައްޓާއި ކުރައެއްގެ އަތްގަނޑު ކަމަށެވެ.
ސެޕްޓެމްބަރު ފަސް ވަނަ ދުވަހާ ހަމައަށް ދިޔައިރު، 30 މީޓަރު ދިގު ބިންގަރާހުގެ މަސައްކަތް ނިމުނީ ޖަލުގެ ފާރުން ބޭރާ ހަމައަށް ފޯރުމުންނެވެ. ގައިދީންތައް ފިލީ އެ ރޭ ދަންވަރު އެވެ.
އެ ހަ މީހުންނަކީ ބަތަލުންގެ ގޮތުގައި ފަލަސްތީނު ރައްޔިތުން ބަލައިގެންފައި ވާއިރު، އެ އެންމެން ވެސް ފިލައިގެން އުޅެނިކޮށް ހައްޔަރު ކުރީ ސެޕްޓެމްބަރު މަހު އެވެ.
ފިލި ގައިދީންގެ ތެރޭގައި ހިމެނޭ އަރްދާހް އަކީ އިސްލާމިކް ޖިހާދުގެ މެމްބަރެކެވެ. ޖަލުން ފިލާނެ ގޮތް ރޭވުމުގެ "މާސްޓާމާއިންޑަކީ" އޭނާ ކަމަށް އިޒްރޭލުގެ މީޑިއާ އިން ސިފަކުރެ އެވެ.
ދެން ހިމެނޭ ގައިދީންނަކީ ފަތަހްގެ ޒަކަރިއާ ޒުބެއިދީ އަދި އިސްލާމިކް ޖިހާދުގެ އައިހަމް ކަމާމްޖީ، މުނާދިލް އިންފިއާތު، ޔައުގޫބް ގަދްރީ އަދި މުހައްމަދު އަރްދާހް އެވެ.
ހައި ސެކުއިރިޓީ ޖަލަކުން ގައިދީންތަކެއް ފިލުމުން، އިޒްރޭލުން ވަނީ އެކަން ހިނގައިދިޔަ ގޮތް ބަލަން ތަހުގީގެއް ފަށާފަ އެވެ.
