ރާއްޖޭގައި ހުންނަ އިންޑިއާ ހައިކޮމިޝަން ގޮއްވާލާނެކަމަށް ބުނެ އިންޒާރުދީ ޓްވީޓްކުރިކަމަށް ތުހުމަތުކުރާ މީހާއަށް ދައުވާކޮށްފައިވާއިރު، އޭނާ ބަންދުގައި އިތުރަށް ބަހައްޓަންޖެހޭ ސަބަބެއް ނެތުމުން ދޫކޮށްލައިފި އެވެ.
ފޭކް އެކައުންޓެއްގެ ގޮތުގައި ހިންގާ، "ރޯޔަލް ހުސެއިން ތަކުރު" ކިޔާ އެކައުންޓަކުން ކުރި ޓްވީޓެއްގައި ބުނެފައިވަނީ އިންޑިއާ ހައިކޮމިޝަން ގޮއްވާލަން އާރްޑީއެކްސްއެއް ބޭނުންވާ ކަމަށާއި އެކަން ވަރަށް ކުރާނެ ކަމަށެވެ.
ޓެރަރިޒަމްގެ އަމަލެއް ހިންގާނެ ކަމުގެ އިންޒާރު ދިނުން ނުވަތަ ބިރުދެއްކުމުގެ ކުށުގެ ތުހުމަތުގައި މއ. ރެސްޓިންހައުސް، މުހައްމަދު އިނާދު ހައްޔަރު ކުރީ މިދިޔަ ޖުލައި މަހުގެ ތިންވަނަ ދުވަހު އެވެ.
ނަމަވެސް ބަންދުގައި އިތުރަށް ބަހައްޓަން ޖެހޭނެ ކަމަށް ގަބޫލުނުކުރެވޭތީ ޕްރޮސެކިއުޓާ ޖެނެރަލް (ޕީޖީ) އިން ވަނީ އޭނާ ދޫކޮށްލަދިނުމަށް ކްރިމިނަލް ކޯޓުގައި އެދިފަ އެވެ.
ޕީޖީގެ މީޑިޔާ އޮފިޝަލް އަދި ޕަބްލިކް ޕްރޮސެކިއުޓާ އަހްމަދު ޝަފީއު ވިދާޅުވީ އިނާދު ދޫކޮށްލުމަށް އެދުނީ ޝަރީޢަތް ނިމެންދެން މީހަކު ބަންދުގައި ބެހެއްޓުމުގައި ރިއާޔަތްކުރަންޖެހޭ ކަމަށް ގާނޫނުއަސާސީގެ 49 ވަނަ މާއްދާއާއި، ޖިނާއީ އިޖުރާއަތުގެ ގާނޫނުގެ އިތުރުން ޝަރީއަތްކުރުމާބެހޭ ޖިނާއީ އިޖުރާއަތުގެ ގަވާއިދުގައި ބަޔާންކޮށްފައިވާ ކަންކަމަށް ރިއާޔަތް ކުރުމަށްފަހުގައި ކަމަށެވެ.
titledesc
އިނާދު ބަންދުން ދޫކޮށްލުމަށް ކްރިމިނަލް ކޯޓުން ނިންމާފައި ވަނީ މިދިޔަ ބުރާސްފަތި ދުވަހު އެވެ.
އެދުވަހު ޕީޖީއިން ވަނީ އޭނާގެ މައްޗަށް ދައުވާ ކޮށްފަ އެވެ. ޕީޖީ އޮފީހުން ބުނީ އޭނާގެ މައްޗަށް އުފުލައިފައިވަނީ ޓެރަރިޒަމްގެ އަމަލެއް ހިންގާނެ ކަމުގެ އިންޒާރު ދިނުން ނުވަތަ ބިރުދެއްކުމުގެ ކުށުގެ ދައުވާ ކަމަށެވެ.
އިނާދު ހައްޔަރު ކުރަން ކޯޓުން ކުރި އަމުރުގައި ބުނި ގޮތުގައި، އިނާދުގެ މައްޗަށް ތުހުމަތުވާ ކުށަކީ މުޖުތަމައުގެ އާންމު މަސްލަހަތާ ގުޅިފައިވާ ކުށެކެވެ. އެ މައްސަލާގައި މިހާތަނަށް ހެކި ބަސް ހޯދިފައިނުވާތީ އާއި މައްސަލާގެ ބާވަތުން އިނާދު ދޫކޮށްލައިފިނަމަ ހެކި ނައްތާލާ، ހެކިބަސް ދޭން ހުރި މީހަކަށް ނުފޫޒު ފޯރުވަދާނެ ކަމަށް ބެލެވޭ ކަމަށެވެ. އެހެންނަމަވެސް މިހާރު އޭނާ މިވަނީ މިނިވަންވެފައެވެ.
އިނާދުގެ މައްޗަށް މި ދައުވާ ސާބިތުވެއްޖެނަމަ އޭނާގެ މައްޗަށް ހަތަރު އަހަރާއި ހަ އަހަރާ ދެމެދުގެ މުއްދަތުގެ ޖަލު ހުކުމެއް އަންނާނެ އެވެ.
