"ފެއްސާ ރަތާ ހުދުގެ ލަޝްކަރޭ މީ، ހަލުވިކޮށް ދުވާނެ ރަތް މަސްތަކޭމީ،"
"ހޯދާނެ ފަހަރެމީ ސާފްކަޕްގެ ރަސްކަމެއްމީ، ހަށިން ނެރެ ދައްކާ ގަދަ ފަންވަރޭ މީ،"
މާދަމާ، ސާފް ޗެމްޕިއަންޝިޕްގެ ގަދަ އަޑު ދިވެހި ޖައްވުގައި ފަޅައިގެންދާ އިރު، ސިމްބޮލިކް ރިކޯޑްސްގެ މި އަސަރުގަދަ ލަފްޒުތަކުން ހިއްސުތަކަށް އެނގުން ކޮށްލާނެ އެވެ. ހިތުގެ ހިނގުން އަވަސްކޮށްލައި، ގައުމީ ލޭ ކައްކުވައިލާނެ އެވެ. ފުޓްބޯޅައިގެ ފޯރިން އެންމެން އެތަންކޮށްލާނެ އެވެ. ރެޕުގެ ތަހުތުގައި އޮވެ، ސިމްބޮލިކުން މިރޭ "އަދަދާ" އެކު ނެރުނު ވީޑިއޯ ލަވަ، "މީ އެ ފަހަރޭ" އިން ދެނީ މި ޔަގީން ކަމެވެ.
"މިއީ ރެޕާއި ހިޕްހޮޕް ގެ ފޯރި ގަދަ، ޖޯޝު ހުރި ލަވައެއް. މި ކަހަލަ ގައުމީ މުނާސަބަތެއްގައި ހިދުމަތެއް ކޮށްދެވިފަ އޮތުމަކީ ލިބޭ ފަހުރެއް ކަމަށް ސިމްބޮލިކުން ދެކޭތީ، ރާއްޖޭގެ ހިޕްހޮޕް ކޮމިއުނިޓީގެ ފަރާތުން މި މުބާރާތަށް ސަޕޯޓްކުރުމުގެ ގޮތުން އަދަދާ ގުޅިގެން މި މަސައްކަތް ކުރެވުނީ،" ސިމްބޮލިކްގެ މެނޭޖިން ޑިރެކްޓަރު އަހުމަދު މުހައްމަދު (އޭޑީ) ބުންޏެވެ.
އެހެންވީމަ، "މީ އެ ފަހަރޭ" އަކީ ސިމްބޮލިކް ރިކޯޑްސް އާއި "އަދަދު" ނޫހުން މިފަހަރު ސާފް ޗެމްޕިއަންޝިޕްގެ މުނާސަބަތުގައި ދިވެހިންނަށް ދޭނެ އެންމެ ހިތްގައިމު ހަދިޔާ އަށް ވާނެ އެވެ.
މި ލަވަ ކިޔާފައިވަނީ ސިމްބޮލިކްގެ އަށް އާޓިސްޓެކެވެ. ލިރިކްސް ލިޔުނީ ވެސް އެ ލަވަކިޔުންތެރިން އަމިއްލަ އަށެވެ. ވީޑިއޯ ޕްރޮޑަކްޝަން ގެ މަސައްކަތް ކޮށްފައިވަނީ އަދަދުގެ ކްރިއޭޓިވް ޓީމުންނެވެ. ވީޑިއޯ ޝޫޓްކޮށް، ޑައިރެކްޓްކުރީ އަދަދުގެ ވީޑިއޯ ކޮންޓެންޓް ކްރިއޭޓާ އާއިމް ޒަމީރު އެވެ.
"މީ ފަހަރޭ" ގެ ވޯކަލިސްޓުން
ޑރ. ފާތިމަތު ޝިފްނާ (ޝިފޫ)
މުހައްމަދު މާހިދު (މާޓު)
ހުސައިން އަދީލް (ލިމިޓްސް)
އަހުމަދު ޖައިލަމް (ބޭ)
ހުސައިން ޒިޔާދު (ޒިޔާ)
މުހައްމަދު ނަބީލް ނިޔާޒް (ޓޯއި)
އިބްރާހިމް އަރުޝަދު (އަރޭ)
ރައްޔާން މުހައްމަދު (ރައިޑޭ)
އުރީދޫގެ ޗީފް ކޮމާޝަލް އޮފިސަރު ނިޔާ (ކ) އާއި އަދަދުގެ ސީއީއޯ ފިޔާޒް މިރޭ ލަވަ ލޯންޗުކުރަނީ.
"މިއީ އަޑު އިވުނީމަ ވަރަށް ކިކު އަންނާނެ ގައުމީ ޖޯޝާއި ފީލް ވަރުގަދަ ލަވައެއް. އެހެންވީމަ އަދަދުން އަސްލު ބޭނުންވީ މި ފަހަރުގެ ސާފު ޗެމްޕިއަންޝިޕަށް ހާއްސަކޮށް އައިކޮނިކް ލަވަ އެއް ހަދަން. ލަވަ އާ އެއްވަރަށް ވީޑިއޯ ވެސް ރީތިކޮށް ހަދަން،" އަދަދުގެ ކްރިއޭޓިވް އެޑިޓަރު އަބްދުﷲ ޝަފީއު (އަބޯ) ބުންޏެވެ.
އަބޯ ބުނީ އޭނާގެ ޓީމުން ލަވަ ޝޫޓްކޮށް އެއްކޮށް ނިންމަން ހޭދަކުރީ ޖުމްލަ ތިން ދުވަސް ކަމަށެވެ. އެހެންވީމަ، "މީ ފަހަރޭ" އަކީ ސިމްބޮލިކާއި، ހާއްސަކޮށް އަދަދުގެ ޓީމަށް ވަރަށް ހާއްސަ ލަވައެއް ކަމަށެވެ.
"މި ލަވައިން ފެންނާނެ ބޮޑު ބެރު، ގައުމީ ނެށުން. ފުޓުބޯޅައިގެ ފޯރި. އެހެންވީމަ މިހާ ފުރިހަމަކޮށް ދެތިން ދުވަސް ތެރޭ ވީޑިއޯ ޝޫޓް މި ކޮށްލެވުނީ ވަރަށް ގިނަ މީހުންގެ އެހީތަކާ އެކު. ހާއްސަކޮށް ފާހަގަކޮށްލަން އެފްއޭއެމުން ދިން ބޮޑު އެއްބާރުލުން،" އަބޯ ބުންޏެވެ.
މި ލަވަ، ސިންބޮލިކްގެ ސައުންޑްކްލައުޑް އެކައުންޓުންނާއި ޔޫޓިއުބް އަދި އަދަދުގެ ފޭސްބުކް ޕޭޖު ވެސް އަޑުއަހައިލެވޭނެ އެވެ.
ލަވަ ލޯންޗުކޮށްދެއްވީ ސާފް ޗެމްޕިއަންޝިޕުގެ ފޯރިގަދަކުރަން މާޒިޔާ ސްޕޯޓްސް އެންޑް ރެކްރިއޭޝަނުން މާފަންނުކޮޅުގައި މިރޭ ބޭއްވި ހަރަކާތެއްގައި، މުބާރާތުގެ ޓައިޓަލް ސްޕޮންސަރު އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސެއިން ނިޔާޒް އެވެ.
