ވޮޝިންޓަން، އެމެރިކާ (ސެޕްޓެމްބަރު 30) - ސަބްމެރީންތަކެއްގެ މައްސަލާގައި ހިތްހަމަނުޖެހި އަނބުރާ ގައުމަށް ގެންދިޔަ ފްރާންސްގެ އެމެރިކާ ސަފީރު އަނބުރާ އެމެރިކާ އަށް ވަޑައިގެންފި އެވެ.
ގާތްގަނޑަކަށް މީގެ ދެ ހަފުތާ ކުރިން ސަފީރު ފިލިޕީ އެޓިއެނޭ އެނބުރި ގައުމަށް އައުމަށް އަމުރު ކުރެއްވީ ފްރާންސްގެ ރައީސް ފިލިޕޭ އެޓިއެނޭ އެވެ.
ފްރާންސުން ހިތްހަމަނުޖެހުނީ އެ ގައުމުގެ ސަބްމެރީން ގަންނަން އެއްބަސްވި އޮސްޓްރޭލިއާ އިން އެއްބަސްވުމާ ހިލާފަށް އެމެރިކާގެ ނިޔުކްލިއާ ސަބްމެރީންތަކެއް ގަންނަން ނިންމުމުންނެވެ.
ފްރާންސްގެ ސަފީރު އަނބުރާ އެމެރިކާ އަށް ގެންދިޔުމަށް ނިންމީ ފްރާންސްގެ ރައީސް އާއި އެމެރިކާގެ ރައީސް ޖޯ ބައިޑެންއާ ދެމެދު ފޯނުން ކުރެއްވި މަޝްވަރާތަކަށް ފަހު އެވެ.
ސަބްމެރީންތަކުގެ މައްސަލާގައި ފްރާންސުން ތުހުމަތު ކުރަނީ އެމެރިކާ އާއި އޮސްޓްރޭލިއާ އިން "ގާތް އެކުވެރިއެއްގެ ބުރަކައްޓަށް ވަޅިއެއް ހަރާފައިވާ" ކަމަށެވެ.
އެމެރިކާ، އޮސްޓްރޭލިއާ އަދި އިނގިރޭސި ވިލާތް ހިމެނޭ ސެކިއުރިޓީ އެއްބަސްވުމުގެ ދަށުން އެމެރިކާގެ ނިޔުކްލިއާ ސަބްމެރީން ޓެކްނޮލޮޖީ އާއި ސައިބަ ޑިފެންސް އަދި އެޕްލައިޑް އާޓިފިޝަލް އިންޓެލިޖެންސާއި ކަނޑު އަޑީގެ އަސްކަރީ އުފެއްދުންތައް އޮސްޓްރޭލިއާއަށް ވިއްކާނެ އެވެ.
އެފަދަ އެއްބަސްވުމެއްގެ ބޭނުމަކީ ޗައިނާ ކުރިއަރަމުން އަންނާތީ އެކަމާ ދެކޮޅަށް އެއްބަައިވުމެވެ.
ނަމަވެސް އެއްބަސްވުމާ ހެދި ފްރާންސުން ވަނީ ވަރަށް ބޮޑަށް ހިތްހަމަނުޖެހިފަ އެވެ. އެއީ 36.5 ބިލިއަން ޑޮލަރުގެ އަގަށްވާ ފްރާންސްގެ ސަބްމެރީން އޮސްޓްރޭލިއާ އަށް ވިއްކަން 2016 ވަނަ އަހަރު އެއްބަސްވުމުގައި ސޮއިކޮށްފައި ވަނިކޮށް، އެ އެއްބަސްވުމަށް އިހްތިރާމް ނުކުރުމުންނެވެ.
