ގުދުސް (ސެޕްޓެމްބަރު 30) - ގުދުސްގައި އިޒްރޭލް ފުލުހުންގެ ގަޔަށް ވަޅި ހަރަން އުޅުނު ކަމަށް ބުނެ، ފަލަސްތީނު އަންހެނެއްގެ ގަޔަށް ބަޑި ޖަހައި މަރާލައިފި އެވެ.
އިޒްރޭލް ފުލުހުންގެ ބަޔާނެއްގައި ބުނީ އަލް އަގްސާ މިސްކިތަށް ދާން އޮންނަ މަގެއްގައި ފުލުހެއްގެ ގަޔަށް ވަޅި ހަރަން އަންހެން މީހާ މަސައްކަތް ކުރި ކަމަށެވެ.
އެ ސަރަހައްދުގައި ތިބި ނޫސްވެރިންނަށް ބަޑި ޖެހި އަޑު އިވިފައި ވާއިރު، އަންހެން މީހާގެ ހަށިގަނޑު ބިންމަތީގައި އޮތް މަންޒަރު ވެސް ފެނިފައި ވެ އެވެ.
އިޒްރޭލް ފުލުހުން ބުނީ "ހަމަލާ ދޭން އުޅުނު މީހާގެ ގަޔަށް" ބަޑި ޖެހި ކަމަށާއި އެ ތަނަށް އައި ސިއްހީ އެހީތެރިން އޭނާ މަރުވެފައިވާ ކަމަށް ކަނޑައެޅި ކަމަށެވެ.
އުމުރުން 30 އަހަރުގެ އަންހެން މީހާގެ ނަން ހާމަކޮށްފައި ނުވާއިރު، އޭނާގެ ގަޔަށް ބަޑި ޖަހައި މަރާލީ އަލް އަގްސާ މިސްކިތުން ނުކުމެގެން ދަނިކޮށެވެ.
އަލް އަގްސާ މިސްކިތުގެ ކޮމްޕައުންޑަށް ވަދެވެން އޮންނަ ހުރިހާ ދިމާލެއްގައި އިޒްރޭލު ފުލުހުން ތިބެ އެވެ. ނަމަވެސް މިސްކިތް ހުންނަ އިރުމަތީ ގުދުސް އަކީ ފަލަސްތީނުގެ ބިމެކެވެ.
އިޒްރޭލުން 1967 ވަނަ އަހަރުން ފެށިގެން އެ ބިމަށް އަރައިގެން އުޅުނު ނަމަވެސް ބައިނަލްއަގްވާމީ މުޖުތަމައިން އެކަން ބަލައެއްނުގަނެ އެވެ.
މިދިޔަ މޭ މަހު އަލް އަގްސާ މިސްކިތުގެ ކޮމްޕައުންޑުގައި ފަލަސްތީނު ރައްޔިތުންނާއި އިޒްރޭލް ފުލުހުންނާ ދެމެދު ގިނަ ކުރިމަތިލުންތަކެއް ހިނގުމަށް ފަހު 11 ދުވަސް ވަންދެން އިޒްރޭލާއި ގާޒާގައި ވެރިކަން ކުރާ ހަމާސްއާ ދެމެދު ހަމަލާ ބަދަލުކުރި އެވެ.
އިޒްރޭލުން އަރައިގެން އުޅޭ ފަލަސްތީނުގެ ހުޅަނގު އައްސޭރީގައި ވެސް މިދިޔަ އާދީއްތަ ދުވަހު ފަލަސްތީނުގެ ފަސް މީހުން މަރުވި އެވެ. އެ އެންމެންނަކީ ހަމާސްގެ މެމްބަރުންނެވެ.
