ގަތަރުގެ ދޯހާގައި މިހާރު ކުރިއަށްދާ އޭޝިއަން ޓޭބަލް ޓެނިސް ޗެމްޕިއަންޝިޕްގައި ރާއްޖޭގެ އަންހެން އަދި ފިރިހެން ޓީމުން ކުޅުނު ފުރަތަމަ މެޗުތަކުން ރަނގަޅު ކާމިޔާބެއް ހޯދައިފި އެވެ.
އެގޮތުން އިއްޔެ އަންހެން ޓީމު ވަނީ ޓީމު އިވެންޓް ބައިގައި ގަތަރާއި ބަންގްލަދޭޝް ބަލިކޮށްފަ އެވެ. ގަތަރުގެ މައްޗަށް ކުރިހޯދީ 3-1 އިންނެވެ. ފުރަތަމަ ޓައި އައިޝަތު ރަފާ ނާޒިމް ތިން ސެޓު އެއް ސެޓުން މޮޅުވިއިރު، ދެ ވަނަ ޓައި ފާތިމަތު ދީމާ ވަނީ ތިން ސެޓު ދެ ސެޓުން ބަލިވެފަ އެވެ. ތިން ވަނަ ޓައިގައި ލައިސާ ފަތުހުﷲ ވަނީ ސީދާ ތިން ސެޓުން މޮޅުވެފަ އެވެ. ދެން ކުޅުނު ޓައި އިން ދީމާ ވަނީ ތިން ސެޓުން މޮޅުވެފަ އެވެ.
އަންހެން ދެ ވަނަ މެޗުގައި ބަންގްލަދޭޝްގެ މައްޗަށް އަންހެން ޓީމުން ހޯދީ ފުރިހަމަ މޮޅެކެވެ. ރަފާ އާއި ދީމާ އަދި ލައިސާ ކުޅުނު ތިން ޓައި ވެސް ވަނީ ކާމިޔާބުކޮށްފަ އެވެ.
ފިރިހެން ޓީމަށް ބަލާއިރު، އޮމާންގެ މައްޗަށް ކުރިހޯދީ ފޯރިގަދަ މެޗަކަށް ފަހު 3-2 އިންނެވެ. ފުރަތަމަ ޓައި އިން މޫސާ މުންސިފް ވަނީ އޮމާން ކުޅުންތެރިޔާ އަތުން ބަލިވެފަ އެވެ. ދެ ވަނަ ޓައި އިން ޝައްފާން އިސްމާއިލް މޮޅުވީ 3-1 ސެޓުންނެވެ. އަނެއްކާ ވެސް އޮމާނުން ވަނީ ދެން ކުޅުނު ޓައި ގައި ރާއްޖޭގެ ޒީސްތު ނަސީމް 3-2 އިން ބަލިކޮށްފަ އެވެ. ހަތަރު ވަނަ ޓައިގައި މުންސިފް ވަނީ އޮމާންގެ ކުޅުންތެރިޔާ 3-2 ސެޓުން ބަލިިކޮށްފަ އެވެ. ފަސް ވަނަ ޓައިގައި ޝައްފާން ވަނީ 3-1 ސެޓުން އޮމާން ކުޅުންތެރިޔާ ބަލިކޮށް ރާއްޖެ މޮޅުކޮށްދީފަ އެެވެ.
ޓީޓީ އެސޯސިއޭޝަނުން އޭޝިއާ މުބާރާތެއްގެ ޓާގެޓެއްގެ ގޮތުގައި ކަނޑައަޅާފައިވަނީ ދެކުނު އެފްރިކާގައި މި އަހަރު ބޭއްވުމަށް ހަމަޖެހިފައިވާ ޓީމް ވޯލްޑް ޓޭބަލް ޓެނިސް ޗެމްޕިއަންޝިޕަށް ކޮލިފައިވުމެވެ. މި ފަހަރުގެ އޭޝިއާ މުބާރާތުގައި ގައުމީ ޓީޓީ ޓީމަށް އިރުޝާދުދޭނީ މިދިޔަ މާޗް މަހު ގައުމީ ޓީޓީ ޓީމާ ހަވާލުވި ގްރީސްގެ ފެންވަރު ރަނގަޅު ކޯޗު ކޮންސްޓަންޓީނޯސް ކޮސްޓޮޕޮލޮސް އެވެ.
މިއީ ކޮވިޑް-19ގެ ސަބަބުން އައި ހުއްޓުމަށް ފަހު ބައިނަލްއަގުވާމީ މުބާރާތެއްގައި ގައުމީ ޓީޓީ ޓީމު ވާދަކުރާ ފުރަތަމަ ފަހަރެެެވެ. ގައުމީ ޓީޓީ ޓީމު މި ގޮތަށް އެންމެ ފަހުން ވާދަކުރީ 2019 ވަަނަ އަހަރު ޑިސެމްބަރުގައި ކަތުމަންޑޫގައި ބޭއްވި ސައުތު އޭޝިއަން ގޭމްސްގަ އެވެ. މިދިޔަ މަހު މާލޭގައި ބާއްވަން ބެލި ބައިނަލްއަގުވާމީ ދެ ޓީޓީ މުބާރާތް ވަނީ އަންނަ އަހަރަށް ފަސްކޮށްފަ އެވެ.
