އަންނަ ހުކުރު ދުވަހު މާލޭގައި ފެށުމަށް ހަމަޖެހިފައިވާ އުރީދޫ ސާފް ޗެމްޕިއަންޝިޕްގެ ޓިކެޓު ވިއްކަން މިއަދު މެންދުރު ފަހު ފަށަން ނިންމާފައިވާއިރު، ކޮންމެ މީހަކަށް ވެސް ގިނަވެގެން ފަސް ޓިކެޓް ވިއްކާނެ ކަމަށް އެފްއޭއެމުން ބުނެފި އެވެ.
އެފްއޭއެމުން ބުނީ ކޮންމެ މީހަކަށް ފަސް ޓިކެޓް ވިއްކާގޮތަށް ހަމަޖެހިފައިވީ ނަމަވެސް އެ ޓިކެޓަށް ދަނޑަށް ވަންނަ ކޮންމެ މީހެއްގެ ވެކްސިން ކާޑާއި އައިޑީ ކާޑު ޓިކެޓް ގަންނަން އަންނަ މީހާ ގެންނަން ޖެހޭނެ ކަމަށެވެ. މި ގޮތަށް ހަމަޖެއްސީ ޓިކެޓަށް ދަނޑަށް ވަންނަ މީހަކީ ރައްކާތެރިކަމުގެ ފިޔަވަޅުތައް ކަށަވަރުކޮށްފައިވާ މީހަކަށް ހެދުމަށެވެ.
މި ފަހަރުގެ މުބާރާތުގެ ޓިކެޓް ވިއްކާނީ ކޮންމެ "މެޗު ޑޭ" އެއް ވަކިންނެވެ. އެެހެން ކަމުން މިއަދާއި މާދަމާ ޓިކެޓް ވިއްކާނީ ހުކުރު ދުވަހު ކުޅޭ މުބާރާތުގެ ފުރަތަމަ ދެ މެޗަށެވެ.
ހުކުރު ދުވަހު ހަވީރު ސްރީލަންކާ އާއި ބަންގްލަދޭޝް ކުޅޭއިރު، އެރޭ ބައްދަލުކުރާނީ ރާއްޖެ އާއި ނޭޕާލް އެވެ. ކޮންމެ މެޗެއްގެ ޓިކެޓް ވެސް ވިއްކާނީ ވަކި ކައުންޓަރަކުންނެވެ. އެ ގޮތުން ރާއްޖެ މެޗުގެ ޓިކެޓް ވިއްކާނީ އޮލިމްޕަސް ކައިރި ކައުންޓަރުންނެވެ. އަދި ލަންކާ އާއި ބަންގްލަދޭޝް މެޗުގެ ޓިކެޓް ގަންނަން ލިބޭނީ ނިއު ރޭޑިއަންޓް ސަޕޯޓަރުންގެ ސިޑިބަރި ކައިރީ ކައުންޓަރުންނެވެ.
ސާފް ޗެމްޕިއަންޝިޕަށް ގޮނޑިބަރީގެ ޓިކެޓެއް ވިއްކާނީ 100ރ އަށެވެ. ސިޑިބަރީގެ ޓިކެޓުގެ އަގަކީ 75ރ އެވެ. މިއަދު މެންދުރު ފަހު 14:00 އިން ފެށިގެން މިރޭ 23:00 އަށް ޓިކެޓް ވިއްކާނެ އެވެ. އަދި މާދަމާ ޓިކެޓް ވިއްކަން ހަމަޖެހިފައިވާ ވަގުތުތަކަކީ 10:00 އިން 18:00 އަށާއި 20:00 އިން 23:00 އަށެވެ.
ސާފް ޗެމްޕިއަންޝިޕްގެ މެޗު ޝެޑިއުލް.
ކޮވިޑް-19ގެ ސަބަބުން ސިއްހީ ގައިޑްލައިންތަކަށް އަމަލުކުރުމުގައި ސަމާލުވުމުގެ ގޮތުން އެފްއޭއެމުން ވަނީ ބައެއް ކަހަލަ ފިޔަވަޅުތަކެއް އަޅަން ނިންމައިފަ އެވެ. ދަނޑުތެރޭގައި އުޅޭއިރު ސަޕޯޓަރުން އަމަލުކުރަން ޖެހޭ ގައިޑްލައިނެއްގެ ގޮތުގައި އެންމެ ބޮޑަށް ކަނޑައަޅާފައިވަނީ މާސްކް އެޅުމާއި ގައިދުރު ކަމަށް އިސްކަން ދިނުމަށެވެ. ދަނޑުގެ އެކި ސަރަހައްދުގައި ސެނިޓައިޒާ ފުޅިތަކެއް ބެހެއްޓުމަށް ވެސް އެފްއޭއެމުން ވަނީ ނިންމައިފަ އެވެ.
އެފްއޭއެމުން ނިންމާފައިވަނީ ދަނޑަށް މެޗު ބަލަން ވަނުމަށް ފަހު ނުކުމެވޭނީ މެޗު ނިމުމުން ކަމަށެވެ. މިއީ ކޮވިޑްގެ ހާލަތެއް ކަމަށްވާތީ ސަޕޯޓަރުން ވަދެ ނުކުމެ އުޅުން މަދުކުރަން ދަނޑުގައި ކެންޓީން ފަދަ ތަންތަން ހެދުމަށް ވަނީ ނިންމައިފަ އެވެ.
މި ފަހަރުގެ ސާފް ޗެމްޕިއަންޝިޕަކީ ކޮވިޑް-19ގެ ހާލަތަށް ފަހު ސަޕޯޓަރުން ވައްދައިގެން މެޗުތައް ކުޅޭނެ ފުރަތަމަ މުބާރާތެވެ. މިދިޔަ މަހު އޭއެފްސީ ކަޕްގެ ދެކުނު އޭޝިއާގެ ގްރޫޕް މެޗުތައް މާލޭގައި ހޯސްޓްކުރިއިރު، ސަޕޯޓަރުން ވައްދަން ހުއްދައެއް ނެތެވެ. ސާފް ޗެމްޕިއަންޝިޕަށް ސަޕޯޓަރުން ވައްދަން ހުއްދަ ލިބުނީ އެފްއޭއެމުން ސަރުކާރާ ގުޅިގެން ކުރި ގިނަ މަޝްވަރާތަކަށް ފަހު އެވެ.
