ވެމްކޯގެ ބޭނުމަށް މިލިއަން ރުފިޔާ ހަރަދުކޮށްގެން ހެދި ސޮފްޓްވެއާއަކާ ގުޅޭ ކޮރަޕްޝަނުގެ މައްސަލައެއްގައި އެ ކުންފުނީގެ ކުރީގެ މެނޭޖިން ޑިރެކްޓަރު މުހައްމަދު ޝިފާއުގެ މައްޗަށް ދައުވާކުރަން އެންޓި ކޮރަޕްޝަން ކޮމިޝަން (އޭސީސީ)ން ޕީޖީ އޮފީހަށް ފޮނުވައިފި އެވެ.
އޭސީސީން ނެރުނު ބަޔާނުގައި ބުނީ، "ވެށިފާރަ" ނަމުގައި ކަސްޓަމާ މެނޭޖްމަންޓް ސޮފްޓްވެއާއެއްގެ މަސައްކަތް ޖޫން 11، 2017 ގައި އެއްވެސް އިއުލާނުކުރުމެއް ނެތި ނޮނި ސޮލިއުޝަންސް ޕްރައިވެޓް ލިމިޓެޑާ ހަވާލުކޮށްފައިވާ ކަަމަށެވެ. އަދި އެއް މިލިއަން ރުފިޔާއަށް މި މަސައްކަތް އެ ކުންފުންޏާ ހަވާލުކުރީ އެމަޖެންސީ މަސައްކަތެއްގެ ގޮތުގައި ކަމަށް އެ ކޮމިޝަނުން ބުންޏެވެ.
އޭސީސީން ތަހުގީގަށް ފާހަގަވި ގޮތުގައި، ނޮނި ސޮލިއުޝަންސްގެ ވެރިޔާއާއި ޝިފާއުއާ ދެ މީހުންގެ ގާތްގުޅުމެއް އޮވެ އެވެ. އަދި މިކަމާ ގުޅިގެން ކުރެވުނު ތަހުގީގުގައި މި ސޮފްޓްވެއާ ނޮޮނި ސޮލިއުޝަންސްއާ ހަވާލުކުރުކުމުގެ މަސައްކަތް ކުރެވުނީ ސީދާ ޝިފާއުގެ ބެލުމުގެ ދަށުން ކަން ފާހަގަކުރެވިފައިވާ ކަމަށް ބުންޏެވެ.
އޭގެ އިތުރުން މިކަމާ ގުޅޭ ހުރިހާ އެއްބަސްވުންތަކެއް ވެސް ސޮއިކުރީ ޝިފާއު ކަމަށް އޭސީސިން ބުންޏެވެ. އަދި އޭގެ ފަހުން އެކި ދުވަސްމަތިން ނޮނި ސޮލިއުޝަންގެ ވެރިޔާގެ އެކައުންޓުން ޝިފާއުގެ އެކައުންޓަށް ފައިސާ ޓްރާންސްފާކޮށްފައިވާ ކަމަށް އޭސީސީގެ ތަހުގީގަށް ވަނީ ފާހަގަވެފަ އެވެ.
މި މައްސަލައިގައި ޝިފާއުގެ މައްޗަށް އުފުލީ ރަސްމީ ހައިސިއްޔަތު ބޭނުންކޮށްގެން ނާޖައިޒު މަންފާ ހޯދައިދިނުމުގެ ދައުވާއަކާއި ނާޖާއިދު ފައިދާ ހޯދުމުގެ ދައުވާއެކެވެ.
މިއީ ޝިފާއު ވެމްކޯގެ މެނޭޖިން ޑިރެކްޓަރަކަށް ހުރި ދުވަސްވަރު ހިންގި ކަމަށް ތުހުމަތުކުރެވޭ ދެވަނަ ހިޔާނާތުގެ މައްސަލަ އެވެ. އަނެއް މައްސަލައިގައި އޭނާއަށް ދައުވާކުރަން ފޮނުވީ ބާ ޑަމްޕްޓްރަކެއް އާ އެއްޗެއްގެ ގޮތުގައި ގަނެގެން އެހެން މީހަކަށް ނާޖާއިޒު މަންފާއެއް ހޯދައި ދިނުމުގެ މައްސަލައެއްގަ އެވެ.
