އދ. ގެ 76 ވަނަ އާއްމު މަޖިލީހުގައި ބައިވެރިވެވަޑައިގެން ތަގުރީރުކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެމެރިކާގެ ނިއު ޔޯކަށް ކުރެއްވި ދަތުރުފުޅު ނިންމަވާލައްވައި ރާއްޖެ ވަޑައިގެންފި އެވެ.
ރައީސް އދ. ގެ އާއްމު މަޖިލީހުގައި ބައިވެރިވެވަޑައިގަތުމަށް ފުރާވަޑައިގަތީ ސެޕްޓެމްބަރު 18 ވަނަ ދުވަހު އެވެ. އެމެރިކާއިން ރައީސްއަށް މަރުހަބާ ވިދާޅުވީ މިހާރު އދ. ގެ އާއްމު މަޖިލީހުގެ ރިއާސަތުގައި އިންނަވާ ރާއްޖޭގެ ފޮރިން މިނިސްޓަރު އަބްދުﷲ ޝާހިދެވެ.
އދ. ގައި މިމަހުގެ 21 ވަނަ ދުވަހު ރައީސް ދެއްވި ތަގުރީރާއެކު، އެ މަނިކުފާނު ވެވަޑައިގެންފައިވަނީ ދިވެހި ބަހުން އާއްމު މަޖިލީހުގައި ތަގުރީރެއް ދެއްވި ދެވަނަ ބޭފުޅާ އަށެވެ.
މިއީ ރައީސް ސޯލިހު އދ. ގައި ތަގުރީރު ކުރެއްވި ދެވަނަ ފަހަރެވެ. އޭގެ ކުރިން ރައީސް ސޯލިހު ވަނީ ވެރިކަމަށް ވަޑައިގަތް އަހަރު ނޫން ޖެހިގެން އައި 2019 ވަނަ އަހަރު ވެސް އދ. ގައި ތަގުރީރުކުރައްވާފަ އެވެ.
ރައީސްގެ ތަގުރީރުގައި އެމަނިކުފާނު ވަނީ މޫސުމަށް އަންނަ ބަދަލުތަކާއި، ފަލަސްތީނުގެ ހަމަނުޖެހުމާއި އަފްގާނިސްތާނު ފަދަ ގައުމުތަކުގެ ހާލަތާ ބެހޭގޮތުން ވަކާލާތުކުރައްވާ ވާހަކަފުޅުދައްކަވާފަ އެވެ.
ޖުމްލަ 193 ގައުމުގެ މައްޗަށް އެކުލެވޭ އދ. ގެ މި އަހަރުގެ އާއްމު މަޖިލީހުގައި ރައީސް ތަގުރީރުކުރެއްވިއިރު، ރިޔާސަތު ބެލެހެއްޓެވީ ޝާހިދު އެވެ.
އދ. ގެ ބައްދަލުވުމަށްފަހު ރައީސް ވަނީ ގިނަ ގައުމުތަކެއްގެ އިސްވެރިންނާ ވެސް ބައްދަލުކުރައްވާފަ އެވެ. އެގޮތުން ސްވިޓްޒަލޭންޑާއި ބަންގްލަދޭޝް އާއި ކުވެއިތު އަދި ޕަލާއު ފަދަ ގައުމުތަކުގެ ލީޑަރުންނާއެކު ބައްދަލުވުންތަކެއް ބޭއްވެވި އެވެ.
އަދި އޭގެ އިތުރުން އެލަޔަންސް އޮފް ސްމޯލް އައިލެންޑް ސްޓޭޓްސް (އެއޮސިސް) ގެ ބައްދަލުވުމެއްގައި ވެސް ރައީސް ވަނީ ބައިވެރިވެ، ވާހަކަފުޅުދައްކަވާފަ އެވެ.
