ސިޑްނީ، އޮސްޓްރޭލިއާ (ސެޕްޓެމްބަރު 25) - މޫސުމީ ބަދަލުގެ ސަބަބުން ކުރާ އަސަރާ ގުޅޭ ގާނޫނީ ލަފަޔެއް ހޯދުމަށް ވަނުއަޓޫ އިން އދ. ގެ އެންމެ މަތީ ކޯޓަށް ދާން މަސައްކަތް ފަށައިފި އެވެ.
ވަނުއަޓޫ އަކީ ޕެސިފިކް ކަނޑުގައި އޮންނަ ކުޑަ، ޖަޒީރާ ގައުމެކެވެ. ރާއްޖެއާ އެއް ގޮތަށް، ވަނުއަޓޫއަކީ ކަނޑުގެ ލޮނުގަނޑު އުފުލުމުގެ ނުރައްކާ އެންމެ ބޮޑަށް ކުރިމަތިވެފައިވާ އެއް ގައުމެވެ.
އދ. ގެ އެންމެ މަތީ ކޯޓަށް ދާން ވަނުއަޓޫ އިން ނިންމިކަން އިއުލާނުކޮށްފައި ވާއިރު، މޫސުމީ ބަދަލާ ގުޅޭ އދ. ގެ ބޮޑު ބައްދަލުވުން އޮންނާނީ އަންނަ ނޮވެމްބަރު މަހު އިނގިރޭސިވިލާތުގަ އެވެ.
ވަނުއަޓޫގެ އަމާޒަކީ މޫސުމީ ބަދަލުގެ ސަބަބުން އުފެދިފައިވާ ކާރިސާގެ ބޮޑުކަން ދުނިޔޭގެ އެންމެ މަތީ ގާނޫނީ އިދާރާ މެދުވެރިކޮށް ހާމަކުރުމެވެ.
ނަމަވެސް އެ ކޯޓުން ނެރޭ ގާނޫނީ ލަފަޔަކީ އެއަށް އަމަލު ކުރުން ކޮންމެހެން މަޖުބޫރު އެއްޗެއް ނޫނެވެ. ނަމަވެސް ވަނުއަޓޫ އިން އުއްމީދު ކުރަނީ އެ ލަފާގެ މައްޗަށް ބިނާކޮށް، ދުނިޔޭގެ މުސްތަގްބަލަށް ބޭނުންވާ ބައިނަލްއަގްވާމީ ގާނޫނުތައް ހެދުމުގެ މޫސުމީ ބަދަލުން އިންސާނީ ހައްގު ގެއްލޭ ގޮތުގެ މައްޗަށް ބަލާނެ ކަމަށެވެ.
ނަމަވެސް ނެދަލޭންޑްސްގެ ދަ ހޭގްގައި ހުންނަ ބައިނަލްއަގްވާމީ ކްރިމިނަލް ކޯޓުގެ ލަފަޔަކަށް އެދި އެއްވެސް ދައުލަތަކަށް ހުށަނޭޅޭނެ އެވެ.
އެހެންވެ، 300،000 މީހުންގެ އާބާދީއެއް އޮންނަ ވަނުއަޓޫ އިން މަސައްކަތް ކުރާނީ ކޯޓުގެ ލަފާ ހޯދަން ދިޔުމަށް އެހެން ގައުމުތަކުގެ ތާއީދު ހޯދުމަށެވެ.
ވަނުއަޓޫ ސަރުކާރުގެ ތަރުޖަމާނު ޔްވޮން ބެސިލް ވިދާޅުވީ 2022 ވަނަ އަހަރުގެ ސެޕްޓެމްބަރު މަހު ފަށާ އދ. ގެ އާއްމު މަޖިލީހުގައި އެކަމާ ގުޅޭ ވޯޓަކަށް ދާން މަސައްކަތް ކުރާނެ ކަމަށެވެ.
ފާއިތުވި ފަސް އަހަރުގެ ތެރޭގައި ކެޓެގަރީ ދޭއްގައި ހިމެނޭ ތެ ތޫފާން އަރައި ބޮޑެތި ގެއްލުންތަކެއް ވެފައިވާ ވަނުއަޓޫ އަށް ލޮނުގަނޑު އުފުލުމުގެ މައްސަލަ އާޢި ރަށް ގިރުމުގެ މައްސަލަ ވެސް ދިމާވެ އެވެ.
އެ ގައުމުން ބުނީ ޕެސިފިކް ކަނޑުގައި އޮންނަ އެހެން ގައުމުތަކާއި މޫސުމީ ބަދަލާ ގުޅޭ ކަންކަމުގައި އެއް ވިސްނުމެއް ގެންގުޅޭ ގައުމުތަކުގެ ތާއީދު ހޯދާނެ ކަމަށެވެ.
"މޫސުމީ ބަދަލާ ގުޅިގެން ހިނގާ ކަންކަމުގައި ބޮޑެތި ގެއްލުންތައް ލިބުމުގެ ވާހަކަތަކަކީ މިހާރު މާ ހާއްސަ ވާހަކަތަކެއް ނޫން،" އެ ގައުމުގެ ސަރުކާރުން ނެރުނު ބަޔާނެއްގައި ބުންޏެވެ.
"އޭގެ ބަދަލުގައި މިހާރު އެއީ އާދައިގެ ކަމަކަށް ވެއްޖެ. ޖަޒީރާ ހުރިހާ ގައުމަކާއި އެހެން ބައެއް ގައުމުތަކާއި ހިސާބުތަކުގައި ވެސް އެއީ މިހާރު ނިއު ނޯމަލް."
މޫސުމީ ބަދަލުގެ މައްސަލަ އދ. ގެ ކޯޓަށް ގެންދަން އަޑު އުފުލަމުން ދިޔަ ޕެސިފިކް ޖަމިއްޔާއަކުން ވަނީ ވަނުއަޓޫ ސަރުކާރުގެ ނިންމުމަށް މަރުހަބާ ކިޔާފަ އެވެ.
"ޕެސިފިކް ރައްޔިތުންނާއި އެހެން ފްރަންޓްލައިން ކޮމިއުނިޓީތަކުގެ ހައްގު ހޯދުމަށް، މި ކާރިސާ ހައްލު ވާނެ ގޮތްތައް ބަލަން ޖެހޭ،" ޕެސިފިކް އައިލެންޑްސް ސްޓުޑެންޓްސް ފައިޓިން ކްލައިމެޓް ޗޭންޖުގެ ބަޔާނެއްގައި ބުންޏެވެ.
