އަންނަ އަންގާރަ ދުވަހު ގަތަރުގެ ދޯހާގައި ފަށާ އޭޝިއަން ޓޭބަލް ޓެނިސް ޗެމްޕިއަންޝިޕްގައި ވާދަކުރަން ރޭ ގައުމީ ޓޭބަލް ޓެނިސް ޓީމު ގަތަރަށް ފުރައިފި އެވެ.
އަންނަ މަހުގެ ފަސް ވަނަ ދުވަހުގެ ނިޔަލަށް ކުރިއަށްދާ އޭޝިއާގެ ޓީޓީ ޗެމްޕިއަންޝިޕަށް ނެގި ސްކޮޑުގައި ހިމެނެނީ ޖުމްލަ އަށް ކުޅުންތެރިންނެވެ. އެއީ އަންހެން ހަތަރު ކުޅުންތެރިންނާއި ފިރިހެން ހަތަރު ކުޅުންތެރިންނެވެ.
ސްކޮޑުގައި ހިމެނުނު ކުޅުންތެރިންގެ ތެރެއިން ހަތަރު އަންހެން ކުުޅުންތެރިންނަކީ ފުރަތަމަ ފަހަރަަށް ބައިނަލްއަގުވާމީ މި ފެންވަރުގެ މުބާރާތެއްގައި ވާދަކުރާ އުމުރުން 13 އަހަރުގެ މިޝްކާ މުހައްމަދު އިބްރާހިމް އާއި ފާތިމަތު ދީމާ އަލީ، އައިޝަތު ރަފާ ނާޒިމް އަދި ލައިސާ ފަތުހުﷲ އެވެ. ފިރިހެން ހަތަރު ކުޅުންތެރިންނަކީ އަކްޔާލް، މޫސާ މުންސިފް، ޝައްފާން އިސްމާއިލްގެ އިތުރުން ޒީސްތު ނަސީމް އެވެ.
ޓީޓީ އެސޯސިއޭޝަނުން އޭޝިއާ މުބާރާތެއްގެ ޓާގެޓެއްގެ ގޮތުގައި ކަނޑައަޅާފައިވަނީ ދެކުނު އެފްރިކާގައި މި އަހަރު ބޭއްވުމަށް ހަމަޖެހިފައިވާ ޓީމް ވޯލްޑް ޓޭބަލް ޓެނިސް ޗެމްޕިއަންޝިޕަށް ކޮލިފައިވުމެވެ.
މިއީ ކޮވިޑް-19ގެ ސަބަބުން އައި ހުއްޓުމަށް ފަހު ބައިނަލްއަގުވާމީ މުބާރާތެއްގައި ގައުމީ ޓީޓީ ޓީމު ވާދަކުރާ ފުރަތަމަ ފަހަރެެެވެ. ގައުމީ ޓީޓީ ޓީމު މި ގޮތަށް އެންމެ ފަހުން ވާދަކުރީ 2019 ވަަނަ އަހަރު ޑިސެމްބަރުގައި ކަތުމަންޑޫގައި ބޭއްވި ސައުތު އޭޝިއަން ގޭމްސްގަ އެވެ. މިދިޔަ މަހު މާލޭގައި ބާއްވަން ބެލި ބައިނަލްއަގުވާމީ ދެ ޓީޓީ މުބާރާތް ވަނީ އަންނަ އަހަރަށް ފަސްކޮށްފަ އެވެ.
މި ފަހަރުގެ އޭޝިއާ މުބާރާތުގައި ގައުމީ ޓީޓީ ޓީމަށް އިރުޝާދުދޭނީ މިދިޔަ މާޗް މަހު ގައުމީ ޓީޓީ ޓީމާ ހަވާލުވި ގްރީސްގެ ފެންވަރު ރަނގަޅު ކޯޗު ކޮންސްޓަންޓީނޯސް ކޮސްޓޮޕޮލޮސް އެވެ. ކޮންސްޓަންޓީނޯސްގެ އެދުމަށް މިދިޔަ މަހު ގްރީސްގެ މަޝްހޫރު ޓީޓީ ކުޅުންތެރިޔާ ޕެނަޖިއޯޓިސް ޖިއޯނިސް ވަނީ ދިވެހި ކުޅުންތެރިންނާ އެކު ސެޝަނެއް ކުރިއަށް ގެންގޮސްފަ އެވެ. ޖިއޯނިސް ރާއްޖެ އައީ ޓޯކިޔޯ އޮލިމްޕިކްސް އަށް ފަހު ޗުއްޓީ އަކަށެެވެ.
