ކާށިދޫ ދާއިރާގެ މެމްބަރު، އަދި ދިވެހި ރައްޔިތުންގެ ޕާޓީ (ޑީއާރުޕީ)ގެ ލީޑަރު، އަބްދުﷲ ޖާބިރުއަށް ސެކިއުރިޓީ ދޭން ރައްޔިތުން މަޖިލީހުން އެމްއެންޑީއެފްއަށް އަންގައިފި އެވެ.
މަޖިލީހުގެ ކޮމިޔުނިކޭޝަން ޑިރެކްޓަރު، ހަސަން ޒިޔާއު "އަދަދު"އަށް ވިދާޅުވީ އއ. މަތިވެރީ ރައްޔިތުންގެ ތެރެއިން ބަޔަކު ޖާބިރާ ދެކޮޅަށް އަޑުއުފުލައި، އޭނާއަށް ހަމަލާ ދިން މައްސަލާގައި މެމްބަރުގެ ސަލާމަތާއި ރައްކާތެރިކަން ކަށަވަރުކޮށްދިނުމަށް އޭނާ މަޖިލީހުގައި އެދިވަޑައިގެންފައިވާ ކަމަށެވެ.
އެހެންވެ, ޖާބިރު އެދިވަޑައިގެންނެވި ގޮތަށް އޭނާއަށް ރައްކާތެރިކަން ދިނުމުގެ ގޮތުން ސެކިއުރިޓީ ފޯރުކޮށްދެން އެމްއެންޑީއެފްގައި މަޖިލީހުގެ ފަރާތުން އެދިފައިވާނެ ކަމަށް ޒިޔާއު ވިދާޅުވި އެވެ.
ރައްޔިތުން މަޖިލީހަށް ޖާބިރު ފޮނުއްވި ސިޓީގައި ވަނީ އޭނާ މަރާލާނެ ކަމުގެ އިންޒާރު ތަކުރާރުކޮށް ލިބެމުންދާކަން ފާހަގަކުރައްވާފަ އެވެ. އަދި އެމްއެންޑީއެފްގެ އެންމެ މަތީ ދަރަޖައިގެ ސެކިއުރިޓީއަށް އެދިވަޑައިގެންފަ އެވެ.
މި ސިޓީގެ އިތުރުން ޖާބިރު ވަނީ ޑިފެންސް މިނިސްޓަރު މާރިޔާ ދީދީއާ ދެ ސުވާލެއް ކުރައްވަން ހުށަހަޅުއްވާފަ އެވެ.
titledesc
މަތިވެރީ ރައްޔިތުންގެ ތެރެއިން ބަޔަކު ޖާބިރާ ދެކޮޅަށް އަޑުއުފުލަން ނިކުތީ އޭނާގެ ގެސްޓްހައުސްއެއް ހަދާފައިވާ އެރަށުގެ ބިމަކަށް ކުލި ނުދައްކާ ކަމަށް ބުނެ އެވެ. ކައުންސިލްގެ ބެލުމުގެ ދަށުގައި އޮންނަ އެ ބިމުގެ ކުލީގެ ގޮތުގައި ޖާބިރު 4.7 މިލިއަން ރުފިޔާ ދައްކަން އެބައޮތް ކަމަށް މަތިވެރީ ރައްޔިތުން ބުނެ އެވެ. ތުހުމަތު ކުރާ ގޮތުގައި 2017 ވަނަ އަހަރުން ފެށިގެން އެ ބިމަށް ކުލި ނުދައްކަ އެވެ.
މިފަހުން ޖާބިރު މަތިވެރި ކައުންސިލް ރައީސްއަށް އިންޒާރުތަކެއް ދިނުމަށްފަހު ހުތުރުބަހުން މުއާމަލާތު ކުރައްވާ އޯޑިޔޯއެއް ވެސް އާންމުވެފައިވެ އެވެ. އެ ރަށަށް ޖާބިރު ވަޑައިގެންނެވުމުން ހަމަނުޖެހުން ހިނގީ އެ އޯޑިޔޯ ލީކްވުމަށްފަހު އެވެ.
މަތިވެރީ ރައްޔިތުންގެ ތެރެއިން ބަޔަކު ޖާބިރާ ދެކޮޅަށް އަޑުއުފުލައި، އޭނާއަށް ހަމަލާ ދިނުމުން ޖާބިރު އެންމެ ފުރަތަމަ ވަޑައިގެން ހިމާޔަތް ހޯއްދެވީ ޕޮލިސް ސްޓޭޝަނުންނެވެ.
ފަހުން އެސްއޯ ފުލުހުންގެ ފައުޖެއްވެސް ވަނީ އެ ރަށަށް އަރާ މެމްބަރަށާއި އާއިލާއަށް ހިމާޔަތް ދީފަ އެވެ. ޖާބިރާއެކު އޭނާ ދަރިއެއް ވެސް އެ ރަށުގައި ހުއްޓެވެ.
ޖާބިރަށް ހަމަލާދޭން އުޅުނީ ޓެރެރިސްޓުންގެ ޖަމާއަތެއް ކަމަށް ބުނެ އޭނާ ލީޑްކުރާ ޑީއާރުޕީއިން ވަނީ މިއަދު ބަޔާނެއް ނެރި، އެ އަމަލު ކުއްވެރިކޮށްފަ އެވެ. އަދި, ޖާބިރު މަޖިލީހުގައި ވާހަކަ ދައްކަވަމުން ވެސް މަތިވެރީގައި ހަރުކަށި ފިކުރުގެ ބަޔަކު އޮޕަރޭޓް ކުރަމުންދާ ކަމަށް ވިދާޅުވެ, އެކަން ބެލުމަށް ގޮވާލައްވާފައިވެ އެވެ.
