ބާސެލޯނާ (ސެޕްޓެމްބަރު 22) - ބާސެލޯނާގެ ކޯޗު ރޮނާލްޑް ކޫމަން އަށް ޕްރެޝަރު ބޮޑުވެފައިވަނިކޮށް ނޫސްވެރިންގެ ބައްދަލުވުމުގައި މީޑިއާތަކަށް އެއްވެސް ފުރުސަތެއް ނުދީ ބައްދަލުވުން ނިންމާލައިފި އެވެ.
އެންމެ ފަހުން ބާސެލޯނާ ކުޅުނު ދެ މެޗުން އަމިއްލަ ދަނޑުގައި ބަޔާން މިއުނިކް އަތުން 3-0 އިން ބަލިވިއިރު، ގްރަނާޑާއާ ވަނީ ފަހު ވަގުތު 1-1 އިން އެއްވަރުވެފަ އެވެ. އެހެންވެ، ކޫމަން މަގާމުން ދުރުކުރަން އުޅޭ ވާހަކަ މީޑިއާގައި އޮތީ ދެކެވިފަ އެވެ.
އުމުރުން 58 އަހަރުގެ ކޫމަން މިއަދު ނޫސްވެރިންގެ ބައްދަލުވުން ފެށި ގޮތަށް އޭނާ ދެކޭ ގޮތަށް ބައެއް ކަންތައްތައް ވަނީ ނޫސްވެރިންނަށް ކިޔައިދީފަ އެވެ.
އެ ގޮތުން ކޫމަން ބުނީ ބާސެލޯނާ އަށް މިހާރު ދިމާވެފައިވާ މާލީ މައްސަލަތަކުގެ ސަބަބުން ޓީމަށް ވެސް ވަރަށް ބޮޑަށް އަސަރުކޮށްފައިވާ ކަމަށާއި މީގެއިން ހައްލެއް އޮތީ މިހާރު ތިބި ކުޅުންތެރިންނަށް ވަގުތު ދީގެން ކަމަށެވެ.
"މި ޓީމުން މިހާރު ފުރުސަތު ދެމުން މި އަންނަ ޒުވާން ކުޅުންތެރިންނަކީ މުސްތަގުބަލުގައި ދުނިޔޭގެ ފެންވަރުގެ ތަރިންނަށް ވުމުގެ ފުރުސަތު އޮތް ކުޅުންތެރިން. ޒަވީ އާއި އިނިއެސްޓާ އަށް ވެސް ފުރުސަތު ލިބުނު ގޮތަށް މިހާރު ތިބި ކުޅުންތެރިންނަށް ވަގުތު ބޭނުންވޭ. އަހަރެމެން ކެތްތެރިވާން ޖެހޭ،" ކޫމަން ބުންޏެވެ.
މިހާރު ބާސެލޯނާ އޮތް ހާލަތުން ބަޔާން ފަދަ ޓީމުތަކާ ވާދަކުރާއިރު، ނަތީޖާ ނުކުންނަނީ މި ވަގުތު ކަންތައްތައް ހުރި ގޮތުން ކަމަށް ކޫމަން ވަނީ ބުނެފަ އެވެ. އަދި ބާސެލޯނާ އިން މުސްތަގުބަލަށް ވިސްނައިގެން މަސައްކަތް ކުރާނަމަ މި ވަގުތަށް ވިސްނަންވީ ހަމައެކަނި މެޗުތަކުގެ ނަތީޖާ އާއި ލީގުގައި އެ ޓީމު އޮތް މަގާމަށް އެ ނޫން ކަމަށް ވެސް ކޫމަން ބުންޏެވެ.
"މި އުނދަގޫ ވަގުތުގައި ކްލަބާ ގުޅުންހުރި އެންމެންގެ ފަރާތުން އެހީ އަށް އަހަރެން އެދެން. އެންމެ ފަހުން ގްރަނާޑާ މެޗުގައި އެ ލިބުނު ކަހަލަ ސަޕޯޓެއް ލިބުނީތީ ވަރަށް އުފާކުރަން،" ކޫމަން ބުންޏެެވެ.
ކޫމަންގެ ވާހަކަތަކަށް ފަހު ނޫސްވެރިން ސުވާލު ކުރަން އަތްނަގައިގެން ތިއްބައި ކޫމަން ވަނީ ނޫސްވެރިންގެ ބައްދަލުވުން ދޫކޮށް ގޮސްފަ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން ކޫމަން މި ގޮތަށް ކަންތައް ކޮށްފައިމިވަނީ ބާސެލޯނާގެ ސީނިއާ އެއްވެސް މީހަކާ މަޝްވަރާ ކުރުމެއް ނެތި އެވެ.
މި ސީޒަނުގެ ނިޔަލަށް (އަންނަ އަހަރުގެ ޖޫން 30 ގެ ނިޔަލަށް) ބާސެލޯނާގެ ކޮންޓްރެކްޓްގައި ކޫމަން ހުރިއިރު، އޭނާ މިހާރު މަގާމުން ވަކިކޮށްފިނަމަ ކޮންޓްރެކްޓްގެ މުއްދަތަށް މުސާރަ ދޭން ޖެހޭނެ އެވެ. އަނެއް ކޮޅުން މަގާމުން ވަކިކޮށްގެން ކޫމަން ބަދަލު ހޯދަން ކޯޓަށް ހުށަހަޅައިފިނަމަ ކޮންޓްރެކްޓާ ހިލާފުވާ ޖޫރިމަނާއާ އެކު ބާސެލޯނާ ދައްކަން ޖެހޭ އަދަދު އިތުރުވާނެ އެވެ. މިކަމުގައި ހައްލެއް ލިބެން އޮތީ ކޫމަންގެ ރުހުމުގައި އޭނާގެ ކޮންޓްރެކްޓް ކެންސަލް ކޮށްގެންނެވެ.
ސްޕެއިނާއި އިޓަލީގެ މީޑިއާ ރިޕޯޓްތައް ބުނާގޮތުން ކޫމަން ވަކިކުރުމަށް ފަހު ބާސެލޯނާ އިން ގެންނަން މަސައްކަތްކުރާ ކޯޗުންގެ ލިސްޓުގެ ކުރީގައި އޮތީ ބެލްޖިއަމް ގައުމީ ޓީމާ ހަވާލުވެ ހުރި ސްޕެއިނުގެ ކޯޗު ރޮބާޓޯ މާޓީނޭޒް އެވެ.
