މެންޗެސްޓާ (ސެޕްޓެމްބަރު 21) - އިނގިރޭސި ލީގު ކަޕްގައި މިރޭ ނޯވިޗް ސިޓީ އަތުން ލިވަޕޫލް 3-0 އިން މޮޅުވިއިރު، މެންޗެސްޓާ ސިޓީން 6-1 އިން ވައިކަމްބް ބަލިކޮށް ލީގު ކަޕްގެ ހަތަރު ވަނަ ބުރުން ފުރުސަތު ހޯދައިފި އެވެ.
އާންމުކޮށް ފުރަތަމަ އެގާރައިގައި ހިމެނޭ ގިނަ ކުޅުންތެރިންތަކެއް ނުލައި ލިވަޕޫލުން ކުޅުނު މި މެޗުގައި އެ ޓީމަށް ހަތަރު ވަނަ މިނިޓްގައި ލީޑުނަގައިިދިނީ ޖަޕާނުގެ ފޯވާޑް ޓަކޫމީ މިނަމީނޯ އެވެ. ނޯވިޗަށް ފުރަަތަމަ ހާފުގައި ނަތީޖާ ހަމަހަަމަކުރަން ރަނުގެ ފުރުސަތެއް ލިބި ބޭނުމެއް ނުކުރެވުނެވެ. މެޗުގެ 42 ވަނަ މިނިޓްގައި ނޯވިޗްގެ ކްރިސްޓޯސް ޒޯލިސް ފޮނުވާލި ޕެނަލްޓީ ލިވަޕޫލްގެ ކީޕަރު ކޯމްހިން ކެލަހާ ވަނީ މަތަކޮށްފަ އެވެ.
ލިވަޕޫލަށް މެޗުގެ 50 ވަނަ މިނިޓްގައި ދެ ވަނަ ގޯލު ޖަހައިދިނީ ކޮސްޓަސް ސިމިކާސް ނަގައިދިން ހުރަހަކުން ޑިވޮކް އޮރީގީ ބޮލުންނެވެ. އަލެކްސް އޮކްސްލޭޑް ޗެމްބަލެއިން ދިން ބޯޅައަކުން މެޗުގެ 80 ވަނަ މިނިޓްގައި ލިވަޕޫލްގެ ތިން ވަނަ ގޯލު ޖެހީ ވެސް މެޗުގައި މޮޅު ކުޅުމެއް ދެއްކި މިނަމީނޯ އެވެ. މިއީ މި ސީޒަނުގައި މިނަމީނޯ ފުރަތަމަ އެގާރައިގައި ހިމެނިގެން ކުޅުނު ފުރަތަމަ މެޗެވެ.
ލަނޑު ޖެހުމަށް ފަހު ސިޓީގެ ޑިބްރޭނާ (ވ) އާއި ޓޮރޭޒް އުފާފާޅުކުރަނީ.-- ފޮޓޯ: އޭއެފްޕީ
ސިޓީގެ ދަނޑުގައި ކުޅުނު މެޗުގެ 22 ވަނަ މިނިޓްގައި ވައިކަމްބް އިން ލީޑުނެގީ ބްރެންޑަން ހަންލަން ޖެހި ގޯލުންނެވެ. ސިޓީން ވަނީ ފުރަތަމަ ހާފު ނިމުމުގެ ކުރިން ތިން ގޯލު ޖަހައިފަ އެވެ. އެ ޓީމުގެ ގޯލުތައް ޖެހީ ކެވިން ޑިބްރޭނާ، ފިލް ފޯޑެން އަދި ރިޔާދު މާރޭޒް އެވެ. ދެ ވަނަ ހާފްގައި ސިޓީގެ އަނެއް ތިން ގޯލު ޖެހީ މާރޭޒާއި ފެރާން ޓޮރޭޒް އަދި ކޯލް ޕާމާ އެވެ.
ލީގު ކަޕްގެ އެހެން ނަތީޖާތަކަށް ބަލާއިރު، އެވަޓަން ވަނީ ޕެނަލްޓީ ޖަހައިގެން 8-7 އިން ކުއީންސްޕާކް ރޭންޖާސް (ކިއުޕީއާރް) އަތުން ކަޓައިފަ އެވެ. ވަޓްފޯޑް އަތުން 3-1 އިން ސްޓޯކް ސިޓީ މޮޅުވިއިރު، ބާންލީ ވަނީ 4-1 އިން ރޮޗްޑޭލް ބަލިކޮށްފަ އެވެ.
ލީޑްސް ޔުނައިޓެޑާއި ސައުތެމްޓަނުން މިރޭ ކުޅުނު މެޗުން ވަނީ ޕެނަލްޓީ ޖަހައިގެން މޮޅުވެފަ އެވެ. ޕެނަލްޓީގައި ލީޑްސް އިން ފުލަމް ބަލިކުރީ 6-5 އިންނެެވެ. އަދި ސައުތެމްޓަނުން ޝެފީލްޑްގެ މައްޗަށް ކުރިހޯދީ 4-2 އިންނެވެ.
ލީގު ކަޕްގައި މާދަމާރޭ ކުޅޭ ފާހަގަކޮށްލެވޭ މެޗުތަކަށް ބަލާއިރު، މެންޗެސްޓާ ޔުނައިޓެޑް ނުކުންނާނީ ވެސްޓް ހޭމްއާ ދެކޮޅަށެވެ. ޗެލްސީން އެސްޓަން ވިލާއާ ބައްދަލުކުރާއިރު، ޓޮޓެންހަމް ކުޅޭނީ ވުލްވްސްއާ އެވެ. އަދި އާސެނަލުން ވިމްބަލްޑަންއާ ކުޅޭނެ އެވެ.
