ފަލަސްތީނުގެ ރައްޔިތުންނާ މެދު އިޒްރޭލުން އަނިޔާވެރިވާ މައްސަލައިގައި ކަންބޮޑުވުން ފާޅުކުރައްވައި ރާއްޖޭގެ ރައީސް އިބްރާހިމް މުހައްމަދު ސޯލިހު، އދ. ގައި މިރޭ އެކަމުގެ ހައްލަކަށް ގޮވާލެއްވުމުން ފަލަސްތީނުން އުފާކޮށް, ރާއްޖެއަށް ޝުކުރު އަދާކޮށްފި އެވެ.
ފަލަސްތީނުން ރާއްޖެއަށް ޝުކުރު އަދާކުރީ, އދ. ގެ އަހަރީ އާއްމު ޖަލްސާގައި ވާހަކަ ދައްކަވަމުން ރައީސް ސޯލިހު ފަލަސްތީނުގެ ރައްޔިތުންގެ ހައްގުގައި ދުނިޔެއަށް ވަރުގަދަ މެސެޖެއް ދެއްވާފައިވާކަން ފާހަގަކޮށް އދ.އަށް ފަލަސްތީނުން ކަނޑައަޅާފައިވާ މިޝަންއިން ކުރި ޓްވީޓެއްގަ އެވެ.
ރައީސްގެ ތަގުރީރުގައި، ފަލަސްތީނުގެ މިނިވަން ދައުލަތެއް ގުދުސްގައި ބިނާ ކުރުމަށް ރާއްޖޭން ކުރަމުން އަންނަ ވަކާލާތު ތަކުރާރު ކުރައްވައި، "ދިވެހި ސަރުކާރާއި ދިވެހި އެންމެހާ ރައްޔިތުން ތިބީ" ފަލަސްތީނާއެކު އެކުކަމުގެ ޔަގީންކަން އެރުއްވި އެވެ.
"އދ. ގެ އެތައް އަހަރެއްގެ މަސައްކަތުން ވެސް އެމީހުންގެ ހައްގުތައް ވަނީ ކަށަވަރުކޮށްނުދެވި. އިޒްރޭލުން ފަލަސްތީނުގެ އަންހެނުން، ފިރިހެނުން، އަދި ކުދިބޮޑު އެތައް ބައެއްގެ ހައްގުތައް ތަކުރާރުކޮށް އެބަ ނިގުޅައިގަނޭ،" އެކަމިނުފާނު ވިދާޅުވި އެވެ.
އާބާދީ މަދު، ދިވެހިރާއްޖެއަކީ މިނިވަން ދައުލަތެއްގެ ގޮތުގައި އދ. އިން ބަލައިގަނެފައިވާއިރު މިލިއަނުން އާބާދީގައި މީހުން ހިމެނޭ ފަލަސްތީނު އެއީ ދައުލަތެއްގެ ގޮތުގައި ބަލައިނުތަމުގެ އުޒުރަކީ ކޮބައިތޯ ރައީސް މިރޭ ސުވާލު އުފެއްދެވި އެވެ.
"އދ. ގެ އާންމު މަޖިލީހާއި ސެކިއުރިޓީ ކައުންސިލުން ފަަލަސްތީނުގެ ހައްގުގައި ނެރުނު ގަރާރުތަކާއި ނިންމުނު ނިންމުންތައް ގިނަ. މަދު އެއްޗަކީ، އަމުދުން ނުވެސް ނެތް އެއްޗަކީ، ފަަލަސްތީނުގެ ހައްގު،" ރައީސްގެ ތަގުރީރުގައި ވިދާޅުވި އެވެ.
"އެބަޔަކު، އަޅުގަނޑު މިތާ ހުރެ ތަމްސީލު ކުރާ ދިވެހީން ބޭނުންވަނީ އދ. އިންނާއި މުޅި ދުނިޔެއިން މިނިވަން ގައުމެއްގެ ގޮތުގައި ފަަލަސްތީނު ބަލައިގަތުން."
ރައީސް ސޯލިހު, 2019 ވަނަ އަހަރު އދ.ގެ އާންމު މަޖިލީހަށް ވަޑައިގެން ކުރެއްވި ތަގުރީރުގައި ވެސް ފަލަސްތީނުގެ ހައްގުގައި ވަކާލާތު ކުރެއްވި އެވެ. އަދި, އޭގެއިތުރުން ވެސް ފަލަސްތީނުގެ ހައްގުގައި ރާއްޖެ އޮތްކަން އެކި ފަހަރު މަތިން ހާމަކުރައްވާފަ އެވެ.
މިފަހުން ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގި ކަންކަމާއި ދެމުންދިޔަ ހަމަލާތަކާ ގުޅިގެން މުޅި ރާއްޖޭގައި އަޑުއުފުލި އެވެ. އަދި, ފަލަސްތީނުގެ ދިދައާއެކު ގިނަ ބަޔަކު މަގުތަކަށް ނުކުތެވެ.
