ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ކުރީގެ ޓޫރިޒަމް މިނިސްޓަރު އަލީ ވަހީދު ރޭ ކުރެއްވި ތުހުމަތުތައް ތަހުގީގު ކުރުމަށް އިދިކޮޅު ކޯލިޝަނުން ގޮވާލައްވައިފި އެވެ.
ރޭޕާއި ޖިންސީ ގޯނާގެ ދައުވާ އުފުލާފައި ވަނިކޮށް، ބޭސްފަރުވާ އަށް ކަމަށް ވިދާޅުވެ އިނގިރޭސިވިލާތުގައި ހުންނަވާ ބޭއްވި ތިން ގަޑިއިރުގެ ނޫސްވެރިންގެ ބައްދަލުވުމުގައި އަލީ ވަނީ ރައީސަށް ބޮޑު ތުހުމަތެއް ކުރައްވައިފަ އެވެ.
އެގޮތުން އަލީ ވިދާޅުވީ އޭރު އެމްޑީޕީގެ ލީޑާޝިޕްގައި ތިބި އެންމެ އިސް ފަސް މީހުންގެ ތެރެއިން މީހަކު ރެހެންދި ފްލެޓުން އެމްއެމްޕީއާރްސީގެ ހިޔާނާތުގެ ފައިސާގެ ތެރެއިން 35 މިލިއަން ރުފިޔާއާ ހަވާލުވި ކަމަށެވެ.
އޭގެފަހުން ނޫސްވެރިއެއްގެ ސުވާލަކަށް ޖަވާބު ދެއްވަމުން އަލީ ވަހީދު ވިދާޅުވީ އެމްއެމްޕީއާރްސީގެ ހިޔާނާތުގެ ފައިސާގެ ތެރެއިން 35 މިލިއަން ރުފިޔާއާ މިހާރުގެ ރައީސް ސޯލިހް ހަވާލުވެވަޑައިގެން ކަމަށެވެ.
އެ ތުހުމަތާ ގުޅިގެން އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެ ކޯލިޝަނުގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވީ ރާއްޖޭގެ ރައީސުލްޖުމްހޫރިއްޔާގެ މައްޗަށް އެފަދަ ބޮޑު ތުހުމަތެއް ކުރެވުމަކީ ނުހަނު ކަންބޮޑުވާ ކަމެއް ކަމަށެވެ.
އަދި އެކަން ވަރަށް ރަނގަޅަށް ބެލުމަށްވެސް އިދިކޮޅުން ވަނީ ގޮވާލާފަ އެވެ.
"ރައީސް ސޯލިހަށް ގޮވާލަން މި މައްސަލަ އިންސާފުވެރިކަމާ އެކީގައި ތަހުގީގު ކުރުމަށް ޖާގަ ދެއްވުމަށްޓަކައި މަނިކުފާނު އިސްތިއުފާ ދެއްވާށޭ،" އަބްދުއްރަހީމް ވިދާޅުވި އެވެ.
ރައީސް ފައިސާ ނެންގެވިކަން އޭރު ފުލުހުންގެ ވެރިންނަށް އެނގޭނެ ކަމަށް އަލީ ވަހީދު ތުހުމަތުކޮށްފައިވާތީ، އަބްދުއްރަހީމް މިއަދު ވަނީ ޕޮލިސް ކޮމިޝަނަރު މުހައްމަދު ހަމީދާއި އެސިސްޓެންޓް ކޮމިޝަނަރު އޮފް ޕޮލިސް މުހައްމަދު ރިޔާޒު ވެސް އިސްތިއުފާ ދެއްވަން ގޮވާލައްވާފަ އެވެ.
އެމްއެމްޕީއާރުސީގެ މައްސަލާގައި ފައިސާ ލިބުނު މީހުންގެ ލިސްޓެއް އާންމުކޮށްފައިވާއިރު އެއްވެސް ތަހުގީގެއްގައި ރައީސް ސޯލިހާ ހިޔާނާތުގެ ފައިސާ އެއްވެސް ގުޅުމެއް އޮތް ކަމަކަށް ހާމަވެފައެއް ނުވެ އެވެ.
އަލީ ވަހީދު ދެން ވިދާޅުވީ ކީކޭ؟
ރޭ ބޭއްވި ބައްދަލުވުމުގައި އަލީ ވަނީ އޭނާއަށް ކުރާ ޖިންސީ ގޯނާގެ ތުހުމަތު ތަކަށްވެސް ހޫނު ރައްދުތަކެއް ދެއްވާފަ އެވެ. އެގޮތުން މާގިރި ހޮޓަލުގައި ޖިންސީ ގުޅުން ހިންގަން ތިބި ކަމަށް ބުނާ ވީޑިއޯ މިހާރު ނައްތާލާފައިވާ ކަމަށް އޭނާ ތުހުމަތު ކުރެ އެވެ.
މީގެ އިތުރުން ޔާމީންގެ ވެރިކަން ބަދަލުކުރަން މަސައްކަތް ކުރެވުނީތީ ރައްޔިތުންގެ ކިބައިން އޭނާ ވަނީ މައާފަށް އެދިފަ އެވެ.
އަލީ ވިދާޅުވީ މި ސަރުކާރުން ފުރަތަމަ މަސައްކަތް ކުރީ ޔާމީން ޖަލަށް ލެއްވުމަށް ނޫން ކަމަށެވެ. ނަމަވެސް އިދިކޮޅުން "މާބޮޑެތި" ޖަލްސާތަކެއް ބޭއްވެވުމުން ޖަލަަށް ލުމަށް ނިންމީ ކަމަށް އަލީ ވިދާޅުވި އެވެ.
އެގޮތުން ކާނިވާ ސަރަހައްދުގައި ތިން ޖަލްސާއެއް ބޭއްވުމުން ޔާމީން ޖަލަށް ލެއްވުމުގެ މަސައްކަތް ސަރުކާރުން ފެށި ކަމަށްވެސް އޭނާ ވިދާޅުވި އެވެ.
"ރައީސް އަބްދުﷲ ޔާމީން މިރެއިން މިރެއަށް މިނިވަން ކުރަން ޖެހޭ. އެމްއެމްޕީއާރުސީގެ މައްސަލާގައި ރައީސް ޔާމީނަށްގެ މައްޗަށް އެއްވެސް ދައުވާއެއް ނުކުރެވޭނެ،" އަލީ ވިދާޅުވި އެވެ.
އެކަން މި ސަރުކާރުގެ ވެރިންނަށް ވަރަށް ސާފުކޮށް އެނގިވަޑައިގަންނަވާނެ ކަމަށް ވެސް އޭނާ ވިދާޅުވި އެވެ.
