ކާބުލް، އަފްގާނިސްތާން (ސެޕްޓެމްބަރު 20) - އަފްގާނިސްތާނުގައި އަންހެނުން ވަޒީފާ އަދާކުރުން މަނާކޮށްފައި ވާތީ އާއްމުން ހިތްހަމަނުޖެހުން ފާޅުކުރަމުން އެބަ ދެ އެވެ.
އަންހެނުންގެ ހައްގުތައް ދިނުމަށް ޑިމާންޑު ކުރަމުން ދަނިކޮށް، އަންހެން މުވައްޒަފުންނާ އެކު އަންހެން ދަރިވަރުންނަށް ކިޔަވައިދޭ ހައި ސްކޫލުތައް ހުޅުވަން ހުއްދަދީފައި ނުވާތީ، އާއްމުން ތިބީ ރުޅިގަދަވެފަ އެވެ.
މިދިޔަ މަހު ވެރިކަމަށް އައި ތާލިބާނުން ކުރިން ބުނީ އަންހެނުންގެ ހައްގުތަކަށް އިހްތިރާމް ކުރާނެ ކަމަށެވެ. ނަމަވެސް 1990 ގެ އަހަރުތަކުގައި އޮތް އުސޫލު އަދިވެސް ބަދަލެއް ނުވެ އެވެ.
"އަހަރެން މިހާރު ދެން މިހެން އުޅުމުގެ ބޭނުމެއް ނެތް،" ފޮރިން މިނިސްޓްރީގެ އިސް މަގާމަކުން ކަނޑާލި އަންހެނަކު ބުންޏެވެ.
"އަހަރެން ހުރީ މުޅި ޑިޕާޓްމަންޓުގެ ވެރިޔަކަށް. އަހަރެންގެ ދަށުން ގިނަ އަންހެން މުވައްޒަފުން ތިބި. މިހާރު އެ އެންމެންގެ ވަޒީފާ ވެސް ގެއްލިއްޖެ،" އޭނާ ބުންޏެވެ.
ވެރިރަށް ކާބުލްގެ ވަގުތީ މޭޔަރު އިއުލާނު ކުރައްވާފައިވާ ގޮތުގައި މި ވަގުތު މުނިސިޕަލް ވަޒީފާތަކުގައި ތިބި އަންހެނުންގެ ބަދަލުގައި ފިރިހެނުން މަސައްކަތަށް ނެރޭނެ ކަމަށެވެ.
މިދިޔަ ހޮނިހިރު ދުވަހު ހައި ސްކޫލުތައް ހުޅުވާފައި ވާއިރު، ކިޔެވުމުގެ ފުރުސަތު ލިބެނީ ހަމައެކަނި ފިރިހެން ކުދިންނަށެވެ. އަންހެން ކުދިންގެ ސްކޫލުތައް ހުޅުވުމާ ބެހޭ ގޮތުން ތާލިބާނުން ވަކި އެއްޗެއް ނުބުނެ އެވެ.
އޭގެ އިތުރުން މިދިޔަ ހުކުރު ދުވަހު އަންހެނުންގެ ކަންކަމާ ބެހޭ މިނިސްޓްރީ އުވާލުމަށް ފަހު، ކުރީގެ ތާލިބާން ވެރިކަމުގައި ހިންގި "ރަނގަޅު ކަންކަން ކުރިއަރުވައި ނުބައި ކަންކަން މަނާކުރާ މިނިސްޓްރީ" ވަނީ ގާއިމްކޮށްފަ އެވެ.
އަންހެނުން ވަޒީފާއަށް ދިޔުން މަނާކޮށް ރަސްމީކޮށް ތާލިބާން ސަރުކާރުގެ ސިޔާސަތު އިއުލާނުކޮށްފައެއް ނުވެ އެވެ. ނަމަވެސް ވަކިވަކި އޮފީސްތަކުން ދަނީ އަންހެނުން ވަޒީފާއިން ކަނޑާލިކަން އަންގަމުންނެވެ.
މީގެ ދެ ހަފުތާ ކުރިން އިއުލާނު ކުރި ތާލިބާން ސަރުކާރުގައި އެއްވެސް އަންހެނަކު ނުހިމެނެ އެވެ. މިއީ ފާއިތުވި 20 އަހަރު ތެރޭގައި އަފްގާން އަންހެނުން ހޯދާފައިވާ ކުރިއެރުމަށް ލިބުނު ދެރައެކެވެ.
އަފްގާނިސްތާނުގެ އަންހެނުން އަންނަނީ ވަކީލުކަމާއި، ފަނޑިޔާރުކަމާއި، ޕައިލެޓުކަމާއި ފުލުސްކަން ވެސް އަދާކުރަމުންނެވެ. ނަމަވެސް މިހާރު އެ އެންމެންނަށް ވަނީ ގޭގައި ތިބެން ޖެހިފަ އެވެ.
އަހަރުތަކަކަށް ދެމިގެން ގޮސްފައިވާ އަފްގާން ހަމަނުޖެހުމުގައި ވަރަށް ގިނަ އާއިލާތަކުގެ ފިރިހެނުން މަރުވެފައި ވާތީ ބަޔެއް އަންހެނުން ވަޒީފާ އަދާކުރަން ފެށީ މަޖުބޫރުވެގެންނެވެ.
އެހެންކަމުން، ވަޒީފާ ގެއްލުމުން ވަރަށް ގިނަ އާއިލާތަކެއްގެ އާމްދަނީ ހުއްޓި ހާލުގައި ޖެހޭނެ އެވެ. ތާލިބާނުން ބުނާ ގޮތުގައި ގޭގައި ތިބެން ޖެހެނީ ރައްކާތެރިކަން ހޯދުމަށެވެ.
ފިރިހެނުންނާއި އަންހެނުންނަށް ވަކިވަކިން ވަޒީފާ އަދާކުރާ މާހައުލުގައި އުޅެވޭނެ ގޮތް ފަހިވުމުން އަންހެނުން ވަޒީފާއަށް ނުކުންނަން ހުއްދަ ދޭނެ ކަމަށް ތާލިބާނުން ބުނެ އެވެ.
"އެކަން ވާނީ ކޮން އިރަކުން؟،" އަންހެން ޓީޗަރަކު ބުންޏެވެ.
"ކުރިން ވެސް ދިމާވީ ހަމަ މިގޮތަށް. ތާލިބާނުން ބުނަމުން ދިޔެއީ ހަމަ މިހެން. ވަޒީފާއަށް ދާން ފުރުސަތު ދޭނަމޭ. އެކަމަކު އެ ދުވަހެއް ދުވަހަކު ވެސް ނައި."
ތާލިބާނުން 1996 އިން 2001 އަށް ވެރިކަން ކުރިއިރު، އާއްމު ދިރިއުޅުމުގެ ކަންކަމުގައި އަންހެނުންނާ ގިނަ ހުރަސްތަކާ ކުރިމަތިވި އެވެ. އެގޮތުން އާއިލާގެ ފިރިހެން މެމްބަރަކު ނެތި ގެއިން ނުކުތުން ވެސް މަނާކުރި އެވެ.
"ރަނގަޅު ކަންކަން ކުރިއަރުވައި ނުބައި ކަންކަން މަނާކުރާ މިނިސްޓްރީ" އަކީ އޭރު އިސްލާމީ ހުކުމްތައް ތަންފީޒު ކުރަން ތާލިބާނުން އުފެއްދި ތަނެވެ.
މިދިޔަ އާދީއްތަ ދުވަހު، އަންހެނުންތަކެއް ވަނީ އެ މިނިސްޓްރީ ކައިރިއަށް ޖަމާވެ މުޒާހަރާކޮށްފަ އެވެ. ނަމަވެސް ތާލިބާން އޮފިޝަލުން ފަހުން އައިސް އެ މީހުން ފޮނުވާލި އެވެ.
