ސްޕޯޓްސް އިވެންޓް މެނޭޖްމަންޓް ކުންފުނި، ޓެކާސް އިން އިންތިޒާމްކުރާ ބޮޑު ފުޓްސަލް މުބާރާތް ކަމަށްވާ، "ޓެކާސް މައިލޯ ޗެމްޕިއަންޝިޕް" ގެ ގްރޭޓާ މާލޭ ކަޕް އަންނަ ހުކުރު ދުވަހު ފަށާ ގޮތަށް ހަމަޖައްސައިފި އެވެ.
އަންނަ ހުކުރު ދުވަހު ފަށާ ގްރޭޓާ މާލޭ ކަޕް މި މަހުގެ 30 ވަނަ ދުވަހުގެ ނިޔަލަށް ކުރިއަށްދާނެ އެވެ. ފުރަތަމަ މެޗުގައި ޓީމު އިނގުރައިދޫ ބައްދަލުކުރާނީ އެފްސީ ފައިގަތަޅާއާ އެވެ.
ގްރޭޓާ މާލެ ކަޕްގައި 32 ޓީމު ވާދަކުރާއިރު، ޗެމްޕިއަން ޓީމަށް 50،000 ރ ދޭނެ އެވެ. އަދި ރަނަރަޕަށް ދާ ޓީމަށް 25,000ރ ގެ ފައިސާގެ އިނާމެއް ދޭ ގޮތަށް ވަނީ ނިންމައިފަ އެވެ.
ޓެކާސް އިން މުބާރާތް ކުރިއަށް ގެންދާއިރު ފޯރިގަދަ ކުރުމުގެ ގޮތުން ވަނީ ކޮމެންޓްރީ ދިނުމަށް ދިވެހި ދެ ފަންނާނުން ހަމަޖައްސައިފަ އެވެ. އެއީ ލަވަކިޔުންތެރިޔާ އިބްރާހިމް އަމާން ހުސެއިންގެ އިތުރުން ޓިކްޓޮކްގައި ފާހަގަކޮށްލެވޭ އައިމިނަތު ޝާނާ އެވެ.
ޓެކާސް ކަޕްގެ ގުރުއަތުލުމުގެ އިވެންޓްގެ ތެރެއިން.-- ފޮޓޯ: ޓެކާސް
ގްރޭޓާ މާލެ ކަޕަކީ "ޓެކާސް މައިލޯ ޗެމްޕިއަންޝިޕް" އެއް ބަޔެވެ. އެއަށް ފަހު އޮންނަ "ޓެކާސް ރިސޯޓް ކަޕް" ގައި ރާއްޖޭގެ 60 ރިސޯޓް ބައިވެރިކުރާނެ އެވެ. އަދި "ޓެކާސް މޯލްޑިވްސް ކަޕް" ގެ ނަމުގައި ރަށްރަށަށް ހުޅުވާލައިގެން ބާއްވާ މުބާރާތް އޮންނާނީ އަތޮޅު ފެންވަރުން ފެށިގެން މުޅި ރާއްޖޭން ޗެމްޕިއަނެއް ހޮވާ ގޮތަށެވެ. ދެން އޮންނާނީ ޓެކާސްގެ ގްރޭންޑް މުބާރާތް ޗެމްޕިއަންސް ކަޕް އެވެ.
ރާއްޖޭގެ ފުޓްސަލްގައި ބޭއްވޭ އެންމެ އޮގަނައިޒް މުބާރާތުގެ ގޮތުގައި ކުރިއަށް ގެންދިއުމަށް ޓެކާސް އިން އަމާޒު ހިފާފައިވާއިރު، މުބާރާތުގެ މެޗުތައް އައިސްޓީވީ އިންނާއި ޓެކާސްގެ ސޯޝަލް މީޑިއާ ޕްލެޓްފޯމްތަކުން ފެންނާނެ އެވެ. އަދި މުބާރާތާ ބެހޭ އެންމެ ފަހުގެ މައުލޫމާތު ޓެކާސްގެ ސޯޝަލް މީޑިއާ އެކައުންޓްތަކާއި ޓެކާސްގެ ވެބްސައިޓުން ފެންނާނެ އެވެ.
ސްޕޯޓްސް މިނިސްޓްރީ އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެންޑޯސްކޮށްފައިވާ މި މުބާރާތުގެ ޕްލެޓިނަމް ސްޕޮންސަރުގެ ގޮތުގައި ޓައިޓަލް ނަގާފައިވަނީ "މައިލޯ" އެވެ. ގޯލްޑް ޕާޓްނަރުންނަކީ އުރީދޫ މޯލްޑިވްސް، އަލް ޝާލީ މެރިން މޯލްޑިވްސް، އެމްޓީސީސީ، ވެލިގާ ހާޑްވެއާ، މޯލްޑިވްސް ގޭސް، މޯލްޑިވިއަން، ވެލްވޮލިން، މީޑިއާނެޓް އަދި ޕާސަނަލް ކޮމްޕިއުޓާސް އެވެ. ސިލްވާ ޕާޓްނަރުންނަކީ ސަން ފްރަންޓް، ސޮނީ ސްޕޯޓްސް، ކޮޕިއާ ޕްލަސް، ލިންކް ސާވް، ޕްރިންޓް ލެބް، ދިވެހި އިންޝުއަރެންސް އަދި އިވެންޓް މޯލްޑިވްސް އެވެ. މުބާރާތުގެ މީޑިއާ ޕާޓްނަރަކީ "އަދަދު" އެވެ.
